Te varua o te Fare Menemene
Te ti‘a nei te Fare Menemene… mai te hoê tutau e ua riro ei tapa‘o no te faahoiraa mai o te evanelia a Iesu Mesia.
Ua piihia vau e maha ahuru ma ono matahiti i teie nei ei tauturu i roto i te Pŭpŭ no te Tino Ahuru ma Piti Aposetolo. Ua haere mai au i teie vahi no te taime matamua. E 37 matahiti to‘u i taua taime ra. Ua ite au ia‘u iho i te ti‘araa i rotopu i te mau peropheta e te mau aposetolo paari e tei faaturahia, e mai ta te himene i parau, « ua faatura paatoa tatou i to ratou mau i‘oa » (« Oh, Holy Words of Truth and Love », Hymns, no. 271). Ua ite mau vau i to‘u paruparu.
I taua taime ra ua tupu te hoê ohipa ia‘u i roto i te Fare Menemene o tei haamaitai rahi i to‘u oraraa i muri mai. Na te reira i horo‘a mai ia‘u te haapapûraa e te itoito.
I taua mau tau ra ua faaterehia te amuiraa paraimere hou te amuiraa rahi no eperera. Ua tomo mai au na te hoê opani i te pae apatoerau a himenehia’i te himene matamua e te hoê pûpû rahi a te mau tamarii paraimere. Te arata‘i ra te tuahine Lue S. Groesbeck, e melo no te piha faatere no te paraimere, ia ratou. Ua himene ratou :
Ma te tura, ma te hau, ma te here te mana‘o nei matou ia Oe ;
Ma te tura, ma te hau, ma te mărû, te himene nei matou i ta matou himene.
Ma te tura, ma te hau, ma te haehaa te pure nei matou i teie nei,
Ia parahi mai to Oe Varua Mo‘a i roto i to matou mau aau i teie mahana.
(« Reverently, Quietly », Children’s Songbook, no. 26)
Ua himene hau noa te mau tamarii. Aita te taata faata‘i hamonia, tei taa e eita te maitai e noaa mai te mea e faahaere mai oia te mata o te mau taata i ni‘a iho ia’na, i faata‘i i te hoê pehe ona ana‘e. Ma te aravihi, ma te ite-ore-hia, ua ano‘i oia te mau reo apî i roto i te hoê himene no te faaurûraa, no te heheuraa. O tera te taime faufaa rahi roa. Na te reira i haamau hohonu e i tamau noa i roto i to‘u varua te parau tumu i hinaaro-rahi-hia e au no te turu ia‘u na roto i te mau matahiti i muri mai.
Ua ite paha vau i te mea ta Elia te peropheta i ite. Ua tapiri oia i te mau ra‘i i te tau no te arii ino o Ahaba e ua horo ti‘atu oia i roto i te hoê ana no te imi i te Fatu :
« O te mata‘i rahi ihora e te etaeta, i te haaparariraa i te mou‘a, e te vavahiraa i te mato… ; aita râ Iehova i roto i taua mata‘i ra ; e mure a‘era te mata‘i, o te aueue fenua ihora ; aita râ Iehova i roto i taua aueueraa fenua :
« E oti a‘era te aueueraa fenua, e auahi ; aita râ Iehova i roto i taua auahi ra ; e oti a‘era te auahi, e reo iti ha‘iha‘i [maira]
Te parau nei te papa‘iraa mo‘a « e ite a‘era Elia i taua parau nei, ua purou oia i to’na mata i to’na ra ahu, haere atura i rapae au, ti‘a noa ihora i te tomoraa i roto i te ana ra » no te aparau i te Fatu (1 Te mau Arii 19:11–13)
Ua ite au i te tahi mea mai ta te Ati Nephi i farii i to te Fatu fâraa mai ia ratou : « Faaroo a‘era ratou i te hoê reo mai te mea no ô mai ïa mai te ra‘i ra ; nana a‘era ratou i to ratou mata, aita hoi ratou i ite papû i te reo ta ratou i faaroo ra ; e ere ïa i te reo maniania, e ere atoa ïa i te reo rahi ; iti ha‘iha‘i noâ te reo, ua patia mai i te aau mau iho, rurutaina noa ihora to ratou mau tino ; oia mau, ua patia mai i te varua mau iho â, e ua anaanatae to ratou aau » (3 Nephi 11:3)
O teie te reo iti mărû ta Elia e ta te mau Ati Nephi i faaroo ta te peropheta Iosepha Semita i taa a papa‘i ai oia, « te na o maira te reo iti mărû, o te parau mărû noa na roto e o te haaputa hoi i te mau mea atoa » (PH&PF 85:6)
I roto i taua taime faufaa rahi ra, ua taa ia‘u e e itehia te reo iti ha‘iha‘i hau atu i te faaroohia. Mai te mea e faaroo vau i te reira reo, e mea maitai roa ïa i roto i ta‘u taviniraa.
I muri a‘e i to‘u fariiraa i te haapapûraa e tei reira te Faao, te Varua Maitai no te mau taata atoa o te pahono i te aniraa ia ani, ia imi, ia patoto (a hi‘o Mataio 7:7–8 ; Luka 11:9–10 ; 3 Nephi 14:7–8 ; PH&PF 88:63). Ua ite au i taua taime ra e e maitai au. Na roto i te mau matahiti i muri mai ua maitai ihoa vau.
Ua haapii atoa mai au i te mana e vai nei i roto i te pehe. Ia hautihia ana‘e te pehe ma te tura, e nehenehe te reira e riro mai te heheuraa. I te tahi mau taime, i to‘u feruriraa, eita te reira e nehenehe e faataaêhia’tu i te reo o te Fatu, te reo hau o te Varua.
E ti‘ara to te mau huru pehe maitai atoa. Te vai nei te mau vahi hope ore i reira te pehe e nehenehe ai e faaroohia. Area te Fare Menemene i Temple Square nei e mea taaê ïa i te mau vahi atoa.
Na roto i te mau u‘i e rave rahi, ua haamata te pŭpŭ himene a te Fare Menemene i ta’na haapurororaa hepetoma ma te himene i teie mau parau tei papa‘ihia e William W. Phelps :
Himene ma te mărû,
No te sabati mo‘a;
Faaea tatou, i te ohipa.
A haamori tatou i te Atua,
No to’na mau maitai,
No to’na ra mau maitai. (« Himene ma te mărû », Te mau Himene, no. 79)
Hau atu i te 100 matahiti i teie nei, ua horo‘a te peresideni Wilford Woodruff e au ra e ta’na paha a‘oraa hopea, e 91 matahiti to’na i taua taime ra, mai teie atu vahi. Tei roto o Legrand Richards i taua amuiraa ra e 12 matahiti to’na matahiti. Ua afa‘i mai to’na metua tane, o George F. Richards (tei faatoro‘ahia ei aposetolo i muri mai), i ta’na mau tamaroa i te Fare Menemene no te faaroo i te mau taea‘e. Aita roa o Legrand i haamo‘e noa‘e i taua ohipa ra tei tupu.
Hau atu i te 20 matahiti, ua faaea piri roa vau ia Elder Legrand Richards. I te 96raa o to’na matahiti ua vai noa taua parau poro‘i ra i roto i to’na ra aau. Aita i nehenehe ia’na ia haamana‘o i te mau parau ta te peresideni Woodruff i parau, eita roa râ e nehenehe ia’na ia haamo‘e i te mea ta’na i ite a parauhia’i taua mau parau ra.
I te tahi mau taime, ua ite au i te varua o te feia tei patu e tei atuatu i teie Fare Menemene. Na roto i te himene e te parau, ua tape‘a taua mau taata tei ora na mua’tu i te ohieraa o te evanelia e te iteraa papû no ni‘a ia Iesu Mesia. Ua riro taua iteraa papû ra ei mori arata‘i i roto i to ratou oraraa.
Ua tupu te mau oro‘a faahiahia tei arata‘i i te oraraa o te Ekalesia i roto i teie Fare Menemene i Temple Square.
Ua paturuhia te mau peresideni atoa o te Ekalesia, maori râ o Iosepha Semita e o Brigham Young, i roto i te hoê amuiraa hanahana i roto i teie Fare Menemene. Na reira atoahia te paturaa i te mau matahiti atoa i roto i te amuiraa rahi e e tapiti-atoa-hia te reira patururaa i roto i te mau tītī, te mau paroita e te mau amaa mai tei titauhia e te heheuraa.
Ua parau te Fatu, « e ore roa e horohia’tu i te hoê taata ia haere atu e ia poro haere i ta‘u nei evanelia, e aore râ ia faatupu i ta‘u nei Ekalesia, maori râ ia oti oia i te faatoro‘ahia e te hoê o tei mau i te mana, e ua itehia hoi e to te Ekalesia e e mana to’na e ua faaotoro‘a-ti‘a-hia hoi e te mau upoo faatere no te Ekalesia » (PH&PF 42:11).
Na roto i teie raveraa, eita roa e nehenehe ta te hoê taata ĕê e haere mai i rotopu ia tatou ma te parau mai e e mana to’na no te tamata i te arata‘i ê atu i te Ekalesia.
I ô nei i te matahiti 1880 ua fariihia te Buka Poe Tao‘a Rahi mai te hoê o te mau papa‘iraa mo‘a a te Ekalesia.
I ô nei atoa ua amuihia na heheuraa e piti i te Parau Haapiiraa e te Parau Fafau, tei itehia i teie nei mai te mau tuhaa 137 e 138. Te faaite nei te tuhaa 137 i te hoê orama tei horo‘ahia ia Iosepha Semita i roto i te hiero no Ketelani, e te tuhaa 138 o te hoê ïa orama tei horo‘ahia i te peresideni Joseph F. Smith no ni‘a i te tere farerei o te faaora i te mau varua o te mau taata i pohe.
I ô nei i te matahiti 1979, i muri a‘e i te mau matahiti faaineineraa, ua faaitehia i to te Ekalesia te tatararaa a te feia mo‘a i te mau mahana hopea nei no te Bibilia a te Arii Iakobo.
Ua faaitehia i to te Ekalesia i ô nei te mau nene‘iraa apî no te Buka a Moromona, te Parau Haapiiraa e te Parau Fafau, e te Buka Poe Tao‘a Rahi.
I te amuiraa rahi no te matahiti 1908, ua tai‘o te peresideni Joseph F. Smith i te tuhaa 89 no te Parau Haapiiraa e te Parau Fafau—te Ture no te Parau Paari. I muri iho, ua a‘o mai oia, to’na na tauturu toopiti, e te peresideni no te Tino Ahuru ma Piti Aposetolo i ni‘a i taua ihoa parau tumu ra, te ture no te parau paari. I muri iho ua paturuhia te reira ei faaueraa na te taatoaraa o te mau melo o te Ekalesia.
Te haamata nei taua heheuraa : « No te mau ino e te mau uma e vai nei e o te vai â hoi i roto i te aau o te mau taata opuaraa ino i te mau mahana hopea, ua faaara vau ia outou na, e te faaara nei hoi au ia outou na mua roa, na roto i te horo‘araa’tu ia outou teie parau no te paari na roto i te heheuraa » (PH&PF 89:4).
E parururaa te reira no to outou ihoa ra feia apî. Ua riro te reira ei tuhaa no taua « haana tama‘i » a te Atua tei fafauhia mai i roto i te mau heheuraa no te paruru ia ratou i te mau « ihe auahi » o taua varua ino ra (a hi‘o PH&PF 27:15-18).
Ua arohia na, e te arohia ra i teie nei, e e arohia e a muri noa’tu te Ekalesia e to’na mau melo tata‘itahi e te enemi. E tapo‘i oia, e e tuma atoa oia i te reo iti ha‘iha‘i na roto i te pehe maniania e te au ore tei î i te mau parau eita e nehenehe ia taa—aore râ, te mea ino roa’tu, te mau parau e nehenehe e taahia. E arata‘i maitai ê atu oia ia tatou na roto i te mau faahemaraa atoa ta’na e nehenehe e feruri.
I ô nei na roto i te heheuraa ua haamaramarama mai te Fatu i te haapa‘oraa o te autahu‘araa. Na teie e iriti i te uputa no te faatupu i te faaueraa a te Faaora ia afa‘i te evanelia « i te mau nunaa atoa, e te mau opu atoa e te mau reo atoa e te mau fenua atoa » (PH&PF 133:37) e no te haamau i Ta’na Ekalesia i rotopu ia ratou.
I ô nei te Buka a Moromona i topahia’i « te tahi faahou ite no Iesu Mesia ». I muri mai, te taata atoa o te tatara i te buka e ite ïa oia i te upoo parau tei horo‘ahia i roto i taua buka ra.
E faahaerehia te mau haapiiraa, te mau a‘oraa, te himene, e te mau mana‘o e te Varua mai roto atu i teie fare mo‘a ma te faaiti-ore-hia i roto i te fare amuiraa rahi i reira ratou e faaroohia ai e te mau tauasini mau taata, iritihia na roto i te mau reo e rave rahi, e haapurorohia i te mau amuiraa na te ao taatoa nei.
Hau atu i te reira, e tomo atu taua Varua ra i roto i te mau fare o te mau milioni feia mo‘a i te mau mahana hopea nei. I roto i te mau utuafare, e pure te mau metua no te maitai o ta ratou mau tamari. E nehenehe ta te mau tane e te mau vahine e, mai ta te Buka a Moromona i fafau, te mau tamarii rii atoa e farii i te iteraa papû no ni‘a ia Iesu Mesia (a hi‘o Mosia 24:22 ; Alama 32:23 ; 3 Nephi 17:25) e no ni‘a i te faahoi-faahou-raa mai Ta’na evanelia.
Ua riro teie Fare Menemene i Temple Square nei ei « fare no te pure, e fare no te haapaeraa maa, e fare no te faaroo, e fare no te hanahana e no te Atua, oia hoi o [To’na iho] na fare » (PH&PF 109:16). Ua titauhia i te mau taata tei piihia no te a‘o aore râ no te faaite i te tahi ohipa e aore râ no te faaite i te mau parau e aore râ te pehe e aore râ te taere ia faaite mai i te mea parau-ti‘a mau.
Te ma‘imiraa i te arueraa a te taata, te faaara mai nei te mau papa‘iraa mo‘a, o te arata‘ihia ê hia’tu ïa i te hoê ana‘e e‘a paruruhia ia rave i roto i te oraraa nei (a hi‘o Ioane 12:43 ; 1 Nephi 13:9 ; 2 Nephi 26:29 ; Helamana 7:21 ; Moromona 8:38 ; PH&PF 58:39)
E ere roa te mea faufaa rahi o te faaroohia i roto i te mau a‘oraa o te mea râ o tei itehia. E nehenehe te Varua Mo‘a e haapapû i te mau taata atoa o te farii i te mana o taua Varua ra e e parau mau te mau parau poro‘i, e teie ihoa te Ekalesia a Iesu Mesia i te feia mo‘a i te mau mahana hopea nei.
Te ti‘a nei te Fare Menemene i ô nei i piha‘i iho i te hiero mai te hoê tutau e ua riro ei tapa‘o no te faahoiraa mai. Ua patuhia te reira e te mau taata vĕvĕ, te mau taata mai te mau taata atoa te huru. Ua itehia to’na roo na te ao atoa nei.
I riro na te pŭpŭ himene a te Fare Menemene, tei topahia i te i‘oa o teie fare, e reo no te Ekalesia. Aita roa ratou i hahi ê atu aore râ i faati‘a ia ratou ia huti-ê-hia’tu i te misioni tumu tei riro ei ohipa na ratou no te mau u‘i e rave rahi.
Mai te mau u‘i e te mau u‘i ua haamata e ua opani te pŭpŭ himene i te mau haapurororaa atoa ma te hoê parau poro‘i no te faaurûraa, tei î i te parau tumu e tei niuhia i roto i te haapiiraa no te faahoiraa mai, ma te haamata na roto i te himene « Himene ma te mărû » (Te mau Himene no 79) e e faaoti ma te himene « Mai te hupe po‘ipo‘i » (Te mau Himene, no. 74).
Te ti‘a nei te Fare Menemene i roto i te ao nei mai te hoê o te mau pû faahiahia no te himeneraa parau-ti‘a e te ta‘ere. Hau atu râ i te mau mea atoa, te ti‘a nei te reira mai te tapa‘o no te faahoi-raa-hia mai te evanelia a Iesu Mesia. Ua haamau hohonuhia taua iteraa papû ha‘iha‘i ra i roto ia‘u nei i ô nei i roto i teie fare e taua mau tamarii paraimere tei himene na roto i te tura e te heheuraa.
Ia haamaitai mai te Atua i teie fare mo‘a e te mau mea atoa o te tupu mai i roto i to’na mau papa‘i fare. Auê ïa tatou i te mauruuru no to’na faaapî-raa-hia ma te ore i ere i to’na huru mo‘a.
Ua tai‘o o Elder Parley P. Pratt no te Tino Ahuru ma Piti Aposetolo i teie mau parau no roto mai i te tuhaa 121 o te Parau Haapiiraa e te Parau Fafau :
« Ia faaunauna noa te taiata ore i to outou mau feruriraa i te mau taime atoa ; ei reira to otou ti‘aturiraa e puai roa ai i mua i te aro no te Atua ; e e ma‘iri mai ai te haapiiraa no te autahu‘araa i ni‘a i to outou aau mai te hupe no te ra‘i maira.
« E e riro te Varua Maitai ei apiti no outou i te mau taime atoa, e to outou sepeta ei sepeta taui ore no te parau-ti‘a e te parau mau ; e e riro to outou mana ei mana mure ore, e e tahe mai te reira ia outou ma te faahepo ore e a muri e a muri noa’tu » (PH&PF 121:45–46).
No te putapû rahi o to’na aau, ua feruri oia i te hoê himene tei riro mau ei pure. Ua maitihia te reira himene e rave rahi matahiti i teie nei e te pŭpŭ himene no te faaoti i ta’na haapurororaa hepetoma :
Mai te hupe po‘ipo‘i
Te ma‘iri mai i raro,
E faarari, e faaapî
I te fenua marô nei.
E te Fatu,
Ho mai ta oe Evanelia,
Haamaitai mai ia matou,
Mai te hupe fenua.
Hi‘o mai, e te Atua,
I te feia faaroo nei
A ninii mai i to Varua
I ni‘a ia matou nei.
Faaroo mai e te Fatu
I ta matou e ani
Ma te aau haehaa,
E te haamori mau.
(« Mai te hupe po‘ipo‘i », Te mau Himene, no. 74)
Te amui nei au i to‘u iteraa papû no Iesu te Mesia, o teie to’na fare, e mahana mo‘a teie no te pûpûraa i te i‘oa o Iesu Mesia. Amene.