E Dua na iVakadinadina Me Baleti Ira na Parofita
Ena gauna au a se qai yabaki 12 tiko kina, au a laki vakatakilaitaki rau na daukaulotu vei iratou na noqu matavuvale. Au a sotavi rau e gaunisala, ka rau a marautaki au sara. Erau a mai veivuke talega ki na Lotu ni kena tara tiko e dua na valenilotu ena neimami siti e Brazil, ka rau a sureti au meu laki vukei rau, kau a laki vakayacora ena gauna au galala kina. Au se bera mada vakadua ni raica eso na cauravou vakaoqo me ra laki vakayagataka tu na nodra gauna ena tara valenilotu.
Au a taleitaki rau dina kau sa nanuma meu laki vakatakilaitaki rau vei rau na noqu itubutubu, ka rau sa sureti me rau gade mai ki neitou vale. Erau a tubera sara na noqu matavuvale ena imatai ni lesoni. Keitou a sega ni dau vakatavako, ka keitou sa vakamuria rawa toka mai kina na ivakavuvuli ni Vosa ni Vuku, ka keitou dau lotu vakamatavuvale ena veibogi e neitou vale. Keitou sega ni vakatoka me lotu vakamatavuvale, ia sai koya sara ga o ya na ka keitou cakava tiko. Keitou a lotu Katolika, ka keitou dau laki lotu vakawasoma, ka sa mani tukuna kina o tamaqu ni keitou sa na lotu tikoga ena neitou lotu o ya.
Erau a qai lesu tale na daukaulotu, ia erau a vola toka na neitou matavuvale ena nodrau ivola ni daukaulotu ka dau laki maroroi toka ena nodra itikotiko, kei na nodrau vakanuinui ni keitou na laki lewena na Lotu.
Vulica na Veika e Baleta na Matavuvale Tawamudu
Ni oti e tini na yabaki au sa laki vakaitikotiko sara ki na dua tale na siti ka rau sa lesi yani e rua na daukaulotu vou ki na vanua eratou tiko kina na noqu matavuvale. Sa sega sara tu ga na tamata me rau vakavulica ka rau nanuma sara me rau raica na ivola ni daukaulotu e kea. Erau raica rawa sara na yacadrau na noqu itubutubu ka rau sa nanuma me rau laki sikovi rau mada. Erau a masu na daukaulotu ni bera ni rau gole yani, ka a vakauqeti rau kina na Turaga. E dina ga ni tamata gugumatua ena nona lotu o tamaqu, e a taroga o tamaqu e dua na taro. E sega ni vakabauta vakadua o koya ni gauna ena mate kina ena sega ni laki watina tikoga o watina. E vakabauta dina o koya ni sa dodonu ga me tomani tikoga na isema vakamatavuvale ni oti na mate. E a tarogi ira na italatala ni veimatalotu tale eso me baleta na ka oqo, ka ra kaya kece vua, “E sega, ni oti na mate sa na laki ganemu o watimu, kei na luvemu tagane ena laki okati me tacimu.”
Ena gauna erau sa tukituki kina na daukaulotu ena katuba ni noqu itubutubu, a dolava sara na katuba o tamaqu ka tukuna vei rau ni sa rogoca oti na nodrau itukutuku ka sega tale ni via rogoca. Ia erau a qai kaya na daukaulotu, “E tiko tale oqo e dua na itukutuku me nomu. O kila beka ni rawa ni laki bula tawamudu vata na nomu matavuvale?” Na vosa oqori a vakauqeti koya. A sureti rau sara o tamaqu me rau curu yani ka vakavulici koya. Ena veidusimaki ni Yalotabu, erau a cauraka na daukaulotu ki na noqu matavuvale na veika e baleta na vakamau tawamudu kei na matavuvale tawamudu. Mai na isevu ni ivakamacala oqo me baleta na kosipeli, eratou a tomana tikoga na noqu matavuvale na veiwasei kei rau na daukaulotu me yacova ni bucini rawa e dua na nodratou ivakadinadina ka ratou sa gadreva me ratou papitaisotaki ka vakadeitaki.
Rawata na Noqu iVakadinadina
Ni oti e lima na yabaki—kau sa yabaki 27 tiko kina—ka dua na gauna au a gole ki na vale nei tamaqu. Ena gauna o ya sa iliuliu ni kaulotu ena tabanalevu tiko kina o tamaqu, ka rau sa vakavulica tiko kina o irau na goneyalewa daukaulotu e dua tale na tamata ena noqu vale. Au a rogoca sara ni rau vakavulica tiko na iVola i Momani kei Josefa Simici, kau sa nanuma meu masulaka mada. E a vakaibalebale vei au na veika o ya ni kevaka sa parofita dina o Josefa Simici, sa qai ka dina na iVola i Momani ka dina na Lotu.
Ena bogi o ya au sa tekivu meu wilika na itukutuku kei Josefa Simici kei na nona raivotu ena loma ni Veikau Tabu. Au a cegu vakalailai, kau a masu vua na Turaga. Ena bogi taucoko au a vakayacora tiko vaka o ya, au a wiliwili kau masulaka sara na veiparakaravu yadua. Au a wiliwili tiko me 14 na auwa. E dua na ka a yaco vei au niu sa tekivu meu tugana ki lomaqu. E sa vaka sara ga keirau a tucake vata tu kei Josefa ena loma ni veikau o ya. E makare dina vei au kau vakila ni sa yaco dina tiko. Sa vaka sara ga meu raica na veika sa yaco tiko. Ni sa cava na noqu masu ena mataka ka tarava, au sa kila deivaki kina ni sa parofita dina o Josefa Simici
Au sa maqusa yani meu laki raici rau na daukaulotu. Ena sigalevu, ni rau sa yaco mai na daukaulotu goneyalewa me rau laki vakasigalevu e nodrau vale, au sa dabe toka ena mata ni nodrau katuba ka waraki rau toka yani. Au a kerei rau me rau vakavulica vei au na lesoni. Ni oti na nodrau vakavulica vei au na vitu na lesoni ena dua ga na gauna lekaleka, au a papitaiso ka vakadeitaki sara meu sa lewena na Lotu.
Vakamuria na Parofita
Ni oti e dua na vula na noqu sa mai lewe ni Lotu, au a sotavi Magareth kina, na watiqu, ka keirau a vakamau ni oti ga e dua na yabaki. Ena gauna keirau a veigadivi tiko kina, au a tukuna vua ni baleta ga ni’u sa kila ni sa parofita dina o Josefa Simici, au sa nanuma kina me sa tauyavutaki na neirau matavuvale ena nodra ivunau kei na ivakavuvuli na parofita. Me kena ivakaraitaki, e a parofita tiko ena gauna o ya o Peresitedi Spencer W. Kimball (1895–1985), ka a vunauci ira kina na lewe ni Lotu me ra kakua ni dau dinau. E volekata ni 29 na yabaki ni neirau vakamau, keirau a sega mada ga ni bau sauma vakaveiwatini e dua na tubu ni dinau. E sega vakadua.
Mai na gauna au sa vakadinadinataki Josefa Simici kina, au sa vakamuria vakavinaka sara tiko mai na nodra veivakasala yadua na Mataveiliutaki Taumada kei ira na iApositolo Le Tinikarua, kau sa bulataka sara ga na veika era sa veivakavulici mai kina. Me baleta ga ni’u sa kila ni sa parofita o Josefa Simici, sa sega tale ni ka dredre vei au me’u vakamuria na nodra vosa na Veitacini. Sa rawa me ratou tukuna ga na veika meu vakayacora, kau na cakava sara me baleta ga ni’u sa kila ni ra sa parofita, daurairai, ka dauvakatakila.
Kevaka mo na cakacakataka me dua na nomu ivakadinadina me baleti ira na parofita, ena yaco mo kaukauwa cake. Sai koya oqo e dua na idola ki na bula marau. Ena gauna era sa vosa kina vei iko na parofita ka vakamuria sara, ko na marautaka na nomu talairawarawa vei ira.