Lesi o Wheelwright Me sa Peresitedi Vou e BYU–Awai

E sa mai kacivaka o Peresitedi Gordon B. Hinckley na nona sa lesi o Steven C. Wheelwright, na parofesa dokai ka iliuliu levu ena Harvard Business School, me sa peresitedi ni Brigham Young Univesiti–Awai ena ika 5 ni June, 2007.

“Au sa kila deivaki tu ni na kauta cake o Peresitedi Wheelwright na BYU–Awai ki na dua na ivakatagedegede vou,” a kaya vakaoqori o Peresitedi Hinckley mai na Vale ni Koniferedi mai Salt Lake City, e Utah. “Ena kila vakavuku sa tu vua kei na nona veikilai raraba e vuqa au sa nuidei kina ni na vakatetea yani o koya na irogorogo kei BYU–Awai ka na vakalougatataki na nodra bula o ira era na mai vuli ki na koronivuli rogolevu oqo.”

Ni oti na itukutuku raraba oqo, a gole yani o Peresitedi Wheelwright ka laki kidavaki ira na gonevuli ni BYU–Awai ena kakaburaki ena setilaite ka vakabula yani vei ira ena marau “Aloha” ka kaya ni sa dua dina na ka dokai vua me ciqoma e dua na ilesilesi vakaoqo.

“Au sa nuitaka tiko na BYU–Awai kei na kena ilesilesi baleta ni umanaki ruarua kina na veika vakayalo kei na vuli vakayago ka vakatabakidua ki na nodra vakatorocaketaki ka vakavukui na nodra bula o ira na itabagone totoka oqo,” e kaya o Peresitedi Wheelwright.

E a kaya o Peresitedi Hinckley mai na gauna a dola kina na BYU–Awai me dua na koronivuli torocake ena 1955, sa yaco sara oqo me dua na univesiti ena vanua taucoko e veicurumaki kina na dui kaikai, ka ra lewena tiko e rauta ni 2,400 na gonevuli mai na 70 na veimatanitu.

E buta vinaka tu o Peresitedi Wheelwright ena veicakacaka ni nodra tuberi na gonevuli duidui itovo ni vanua kei na ivakarau, oka kina na veiwasewase e Esia. Taumada e a taura tu o koya na itutu ni dini ena Harvard Business School ena parokaramu ni MBA, ka cakacaka sara vakavoleka kei ira na gonevuli mai na veiyasai vuravura taucoko ka a vukei ira me ra rawata na nodra cakacaka ena veikabani lelevu. E kaya o Elder Henry B. Eyring ena Kuoramu ni iApositolo Le Tinikarua ni cakacaka veisemati oqo ena vukei ira sara vakalevu na gonevuli ni BYU–Awai ni oti na nodra tauri ivola ka lesu yani ki na nodra dui vanua.

Ni oti na nona tauri ivola mai Stanford ena koroi ni MBA kei na Ph.D, e a laki cakacaka vakalailai o Peresitedi Wheelwright me baleta na veika vakavuli e INSEAD, oqo e dua na koronivuli ni vuli bisinisi e tiko mai Fontainebleau e Varanise, ni oti o ya a laki tosoya tale na vo ni nona cakacaka vakavuli e Harvard kei Stanford.

Mai Harvard ena 30 na yabaki sa oti a sotava kina na dini vakacegu mai Harvard Business School ka peresitedi tiko oqo ni BYU–Idaho, o Kim Clark. E kaya o Peresitedi Clark ni o Peresitedi Wheelwright e turaga yaloqaqa ka dua sa dau lomana sara na Turaga ka yalonuidei ka sega ni vakayavalati rawarawa ena nona ilesilesi vua naTuraga.

“E kila na itikotiko vakalomalagi ka dau veivakauqeti sara vakalevu me baleta ga na nona vakabauta,” e kaya o Peresitedi Clark.

Ni bera na nona vakacegu mai o Peresitedi Wheelwright mai Harvard ena vulaitubutubu ni 2006, e a taura tu na itutu vaka-Parofesa ni Edsel Bryant Ford ena Veiliutaki ni Bisinisi, parofesa ena Baker Foundation, e dua na dini iliuliu, ka dairekita ni Harvard Business School Publication Activities. E a taura tale tu ga na itutu vaka-Kleiner, Perkins, Caufield ka Parofesa ni Byers Management ena Stanford Univesiti Graduate School ni Bisinisi.

Ena gauna ni nona cauravou, e a laki kaulotu o Peresitedi Wheelwright ki Sikoteladi. E a veiqaravi talega vaka-peresitedi ena Tabana ni Kaulotu e Igiladi mai na 2000 ki na 2003. E a daunivakasala ena mataveiliutaki ena iteki, lewe ni matabose e cake, ka bisopi. Mai na gauna sa biuti Harvard mai kina, erau sa mai veiqaravi sara vaka-daukaulotu kei watina e BYU–Idaho.

E tubucake o Peresitedi Wheelwright e Salt Lake City ka a taukena tu kina e dua na vanua ni susu bulumakau e Star Valley, e Wyoming. O koya kei watina erau itubutubu ni lewe 5 na gone kei na 15 na makubudrau.

Sa mai veisosomitaki oqo o Peresitedi Wheelwright vei Eric B. Shumway, ka sa vakacegu mai na cakacaka e BYU–Awai ni oti e vica na nona itutu vakailesilesi vakatekivu sara mai na 1966 ka a kena peresitedi me yacova na 1994.