E Dua na iVola Duatani, e Dua na iSau Duatani
Ena gauna au sa vakarau papitaiso ka vakadeitaki kina meu sa lewe ni Lotu, au a lomaleqa sara deu sa digitaka tiko beka na sala dodonu. E a siqema rawa sara o irau na neimami daukaulotu mai Gyumri e Armenia, ni vaka meu lomatarotarotaka tiko na iVola i Momani kei na noqu vakarau lewena tiko na Lotu, erau qai sureti au meu tomani rau tu ki na dua na veivakavulici ni lesoni vei ira na tamata.
Ni keitou sa yaco yani ki na imatai ni vale, a taro sara o Elder Perrin vei Anichka kevaka sa wilika beka na iwase ni ivola erau a kerea vua me wilika. “Sega,” a kaya o koya, “Au a guilecava.” Oti keitou sa qai mani wilika vata na 2 Nifai 29–33. Ena gauna keitou sa wilika vata tiko kina na wase 29, keitou sa wilika sara kina na kena parofisaitaki na iVola i Momani kei na kai Matanitu Tani ni ra na besetaka ena iotioti ni gauna ka ra na kaya kina, “Ai Volatabu! Ai Volatabu! Sa tiko na neimami iVolatabu, ka sega ni rawa me dua tale na iVolatabu” (t. 3). Na wase o ya sa vakauqeti au sara tikoga ena gauna taucoko ni lesoni.
Oti o ya keitou sa gole sara yani ki na dua tale na vale. Ena gauna keitou sa wiliwili tiko kina mai na iVola i Momani, sa taro sara mai o tamai yalewa, “Na ivola cava oqori?”
Au a vakamacalataka ni o ya na iVola i Momani: E Dua Tale na Vakadinadina kei Jisu Karisito. A cudru sara o koya ka kaya mai, “Sa tu oqo na neitou iVolatabu, sa sega ni rawa ni dua tale na iVolatabu.”
Au nanuma sara na wase keitou a se qai wilika oti ga mai ena tini na miniti sa oti vata kei Anichka.
A mani kaya o Elder Perrin: “Na nomu iVolatabu oqori, sa mai vei ira na tamata veiyalayalati taumada ni Kalou.” A tomana tale, “Na Kalou e bulia na tamata kecega, ka sa vakatakila na Nona vosa vei ira na Luvena, sa kena ibalebale ni sai ira na tamata kecega e vuravura. E dina ga ni sa tiko oqori na nomu iVolatabu, o sega beka ni nanuma ni na rawa me solia na Kalou na Nona vosa vei ira tale eso?” A tomana sara tiko o koya vaka o ya, ka vakamacalataka kina na itekitekivu ni iVola i Momani.
Au a kurabui dina ena veika sa yaco o ya. Sa vaka me sa sega tale ni dua na ivakadinadina e cecere cake vaka o ya me walia na noqu lomatarotarotaka tiko na iVola i Momani ena noqu sa raica na kena yaco na veika a parofisaitaki tu mai kina.
Ia oqo mai na vu ni yaloqu dina mai loma niu sa rawa ni tukuna eke ni iVola i Momani sa ivola dina duadua. Au kila ni Kalou e lomani keda kece sara ka na sega ni rawa me guilecavi keda. Au sa qai dau kila tikoga kina ena veigauna kece oqo ni sa iyau duatani dina sara vei keda na iVola i Momani.