iKuri ni Vakasama ena Gauna ni Veiwasei, Okotova 2007

Sa rawa vei ira na iliuliu ni Lalai me ra vakayagataka na ikuri ni vakasama oqo ki na Gauna ni Veiwasei sa tabaki tu ena Liaona ni Okotova 2007. Me baleta na lesoni, ivakasala, kei na itavi qaravi ka sema tiko ki na veivakasala oqo, raica na “Ena Qai Cecere Sara na Nomu Reki” ena tabana T4 kei na T5 ena nodra iwasewase na gone ena ilavelave oqo.

Ni bera na kalasi ni Lalai, mo cakava eso na iyaloyalo ni sipi (me kena ivakaraitaki, raica na ivolavakarau ni Lalai 2, ena lesoni 23, se Lalai 1 iyaloyalo 1-8). Cakava me ra yarua na sipi o ira na gone, me dua e ka lala ka dua me volai tiko kina na yacai koya na gone. Vakabira na sipi ruarua oqo ki na lalaga ni rumu ni Lalai.

Wilika na Joni 10:14. Vukei ira na gone me ra kila na veivakatautauvatataki e vakaraitaka tiko oqo o Jisu. Tukuna vei ira ni gone yadua sa vaka e dua na sipi kei Jisu sa nodra ivakatawa se iliuliu (raica na “Vakatautauvatataki,” Veituberi, Me iLutua Ni Noda Bula [1999], 218–19). E kaya vakaoqo o Cheryl Lant, na peresitedi raraba ni Lalai: “Sa kilai ira vinaka tu o Jisu na gone yadudua sara e a vakalougatataki ira ena itukuni mai na Veiyalayalati Vou. E kilai ira vinaka tu na gone ni Nifai, ka kilai ira vinaka tu na gone edaidai. Sa gadreva tu o Koya me da vakila vakaikeda na Nona loloma. Sa gadreva tu o Koya me ra vulica na Nona vosa ka taukena e dua na nodra ivakadinadina. Sa gadreva tu o Koya me da rawata yadua na veivakalougatataki vakalomalagi ka na yaco ga mai ni da bula savasava tikoga” (“Feed My Lambs,” Vosa raraba ni Lalai, Sepi. 2006).

Vakabira na iYaloyalo Taurivaki ni Kosipeli 240 (Jisu na Karisito) ena mua e liu ni rumu. Sureti ira na gone me ra vakasaqara ga vakataki ira na nodra dui sipi ka kauti ira ki vua na iVakatawa Vinaka. Kerei koya e taba piano tiko me vakatagi toka vakamalua ena gauna era tuva yani na gone me ra laki taura mai na nodra dui sipi ka kauta yani ki liu. Ena gauna era sa taura kece kina na nodra sipi o ira na gone, vakamacalataka sara vei ira ni se vo tu e levu na sipi e dodonu me ra mai tiko talega ena lomanibai ena nodra lako mai ki na Lalai. Wilika na Luke 15:4. Me qai vakatagitaki tale na piano, ka sureti ira yadua na gone me ra laki taura mai e dua na sipi ka sega tu na yacana. Sureti ira me ra vakasamataka mada e dua na tamata me ra sureta mai me ra gole mai ki na lomanibai. Me ra qai vola na yacai koya na tamata o ya ena sipi o ya ka kauta ki nodra vale ka me ra nanuma tiko me ra na sureta mai na “sipi” o ya me mai muria na iVakatawa Vinaka.

Wasea na nomu ivakadinadina ni sai Jisu ga na iVakatawa Vinaka ka ni sa solia o Koya na Nona bula baleti keda, na Nona sipi.
Sureta e dua na lewe ni Lotu gugumatua me mai tiko ena Lalai me vakatakarakarataka tiko e dua na dauvakatataro—ka sa vakavulici koya tiko o irau na daukaulotu. Me qai vola o koya na tamata oqo ena dua na pepa e dua na maka ni cegu taro ka me qai vakabira e liu vua. Me qai ciluma yadudua mai na dua na taga o koya na tamata oqo na ivakatakilakila ni cegu taro eso. Mo qai vakamacalataka ni o koya na tamata oqo e sa levu sara ga na nona taro. Tarogi ira na gone kevaka era sa kila vakavinaka tu na kosipeli me ra na sauma kina na vakatataro nei koya na dauvakatataro oqo. Vakamacalataka ni ko sa na vakayacora tiko e dua na qito ni taro ka me saumi. Na kena talei o ya era na lagata tiko vakasere na gone na nodra isau ni taro.

Me qai tekivuna o koya na dauvakatataro ena nona tarogi ira na gone, “O cei beka o iko?” Me qai vakatagitaki mai vakamalua ena piano na itekitekivu ni “Au Luveni Kalou” (Nodra iVolanisere na Gone, 2–3), me ra qai sauma na taro na gone ena nodra lagata sara na sere o ya. Me qai tarogi tale eso na taro ka saumi ena sere. Ni oti e dua na sere, me qai cavuta tale o koya ka vakatataro tiko na taro o ya kei na kena isau. Kena ivakaraitaki, “Oi, au sa qai kila. Eda sa luvena kece na Kalou ka da sa kau mai ki ke baleta ni lomani keda o Koya.” Sa rawa ni oka talega kina na veitaro eso kei na kena isau vakasere me vakataka na: “Au bula tu mai vei ni bera niu mai sucu eke?” “Na cava na vakabauta?” “E a kauta mai vei o Josefa Simici na iVola i Momani?” Me ra qai digitaka ga o ira na gone na sere cava me ra lagata me ra sauma kina na taro yadua, ka veivuke walega kevaka era gadreva na gone.

Vukei ira na gone me ra kila vakavinaka ni ra sa vulica tiko na kosipeli ena nodra dau lagata tiko na sere ni Lalai. Wasea na nomu ivakadinadina me baleta na kosipeli kei na yaga bibi ni sere kei na ivakatagi ena kena vulici kei na vakavulici na kosipeli.