Vagolei ni Yalo ena Dua na Vanua ni Veivaletabu
Ni ra sa veiwaseitaka vata tiko o ira na lewenilotu se o ira na daukaulotu na nodra papitaiso vata kei Li, Chiun-tsan ni vakavakarau tiko me laki papitaiso ena yabaki 1971, era a tukuna kina ni sa dua dina na gauna qaqa ka veivakaukauwataki. Ia na yalo malumalumu a sobuti Baraca Li ni sa lamata cake mai na wai ni papitaiso e a sega ni ka a namaka tiko ka sa duatani sara.
E a papitaiso ka vakadeitaki o koya mai Taipei e Taiwan, ni sa yabaki 17, e sa bula tiko mai Vakarisito o Baraca Li ena vica na yabaki yani e liu, ia a sega ga ni kunea na vakacegu a vakasaqara tiko mai me yacova sara na gauna sa mai tara kina na yalona na iVola i Momani.
“Au a vakila sara ga vei au na kaukauwa ni Yalo Tabu,” a kaya o koya. “E a kaya vei au na Yalo Tabu ni sai koya oqo na Lotu dina.”
Sa qai sega kina ni kila o koya na vuna sa vaka me malumalumu mai na ituvaki ni nona bula ni sa mai lewena oqo na Lotu, a qai masu me kila na vuna sa mai malumalumu kina oqo na ituvaki ni nona bula. Na isau ni nona masu veivakurabuitaki a moica vakadua na ituvatuva ni nona bula.
“Au na yaloqaqa meu vakasaqara na yacadra na noqu itubutubu taumada me’u vakayacora na nodra cakacaka ni valetabu,” e nanuma tiko o koya na vakasolokakana ni Yalotabu.
Ena loma ni 35 vakacaca na yabaki sa oti, a solia na nona bula ki na cakacaka ni tuva kawa kei na cakacaka ni valetabu o Baraca Li, sa lewe tiko ni Tabanalevu o Hu Wei, ena iTeki o Chung Hsing Taiwan. O koya kei Li-hsueh na marama watina, erau sa raicalesu rawa na kawa nei Baraca Li ka volekata na 5,000 na yabaki sa oti ki na gauna nei Yellow Emperor, ka tukuni ni nodra itubutubu taumada na kai Han China. Erau sa vakacuruma rawa e sivia e 100,000 na yaca ki na valetabu.
“Ena so na gauna ena luvuci na noda bula ena cakacaka ni tuva kawa,” e kaya o Baraca Li. “Ia na gagadre ni nodra vakalougatataki na nodra itubutubu taumada e dua na tamata sa iyau levu dina.”
Na veika era sa sotava o ira na Yalododonu Edaidai mai Taiwan sa ivakadinadina ni veivakalougatataki e tiko ena noda vakaitavitaki keda ki na ilesilesi vakacakacaka veisemati ni ituva kawa kei na cakacaka ni valetabu.
E Dua na Vanua ni Veivaletabu
O Taiwan e dua dina na vanua e levu tu kina na veimataqali valetabu, na vanua era rokovi sara kina vakabibi o ira na tubudra taumada ni sa tiki tiko ni dua na itovo vakawa, ka tudei ni kedra ivolaitukutuku. E vuqa vei ira na nodra veimatavuvale era sa raicalesu rawa na kedra itukutuku vakatama ena vica vata na itabatamata e muri sara. E vuqa sara tu kina na veimataqali valetabu kei na valenisokalou makawa era vakarautaka tu kina na tikina me ra laki veivosaki vata kei ira na tubudra era sa mate. Na veivalenisokalou vakaoqo ka ra maqosa na kedra ituvaki, ka so vei ira era sa makawa sara eda na rawa ni raica ena veitutu ni sala kecega ena vanua osooso oqo o Taipei ka vaka tu me ra lasika cake mai vakasauri mai na dua na veiteitei draudrau e robota tu na veiloma ni veivanua vakanomodi o ya.
“Na nodra vakabauta vakavanua na wekai keimami era vakabibitaka kina na veika e baleti ira na neimami itubutubu taumada,” e kaya vakaoqori o Baraca Li. “Sa tiki tu ni neimami itovo vakavanua me keimami vagoleya na yaloi keimami vei ira na neimami qase.”
Na gauna era sa vakayagataka tiko kina na tamata na veivaletabu vakavanua oqo me ra vakalougatataki kina mai vei ira na nodra qase taumada, e tiko e dua tale na valetabu eke e Taiwan era taurivaka tiko na tamata me ra vakalougatataki ira kina na nodra itubutubu taumada ena kena vakayacori na nodra cakacakatabu vakalotu ni kosipeli vakalesuimai.
Mai na gauna a vakatabui kina na Valetabu e Taipei Taiwan ena 1984, e sa vakarautaka rawa kina vei ira na lewe ni Lotu na madigi me ra vakalougatataki, ena nodra vakayacora na veika e dodonu me ra vakalougatataki ira kina na wekadra era sa mate, ka sa vakainaki tawamudu kina na itukutuku ni nodra kawa vakamatavuvale.
E Dua na iSema Talei
Me vakataka na matavuvale nei Li, na matavuvale nei Wu e sa raicalesu rawa na ituvatuva vakakawa ni nodrau matavuvale me yaco sara kivei koya na tui taumada. Ni ra vakayacora na ka oqo, eratou sa kunea rawa ni o iratou na luvei Wu era a tiki ni ika 150 ni itabatamata mai na gauna sara nei koya na tui taumada. Era a kidroataka sara o ira na daunivolaitukutuku na ka oqo, ia ena yabaki 2005, e a digitaki kina o Wilford Wu, ni se qai yabaki 19 tiko ena gauna o ya, me matataki ira na itabagone mai Taiwan ki na dua na soqo ni ivakananumi vakayabaki ena ibulubulu vakaturaga nei koya na Yellow Emperor.
Ia kivei iratou na matavuvale na Wu, ka ratou lewe tiko ni Tabanalevu o Ching Hsin, ena iTeki o Taipei Taiwan West, e a dua dina na cakacaka vata vakamatavuvale na qaravi ni tuva kawa o ya. E a vakayacora o Baraca Wu, o Chi-Li kei Shirley, na marama watina, e levu sara na vakadidike, ka rau veivuke mai kina o Wilford kei Camilla na ganena qase, ena kena tuvanaki ka rau vakaitavi talega ena cakacakatabu vakalotu ni valetabu me baleti ira e sivia e 3,000 na tubudratou taumada.
Na cakacaka vata e kauti iratou mai vakavoleka sara na matavuvale na Wu. Eratou kaya ni ratou sa vakila talega kina e dua na isema talei vakayalo kei ira na tubudratou taumada.
“Ena gauna e cakacakataki tiko kina na veika baleti rau na noqu itubutubu sa vakatauca mai kina o lomalagi e dua na marau levu au se bera mada ni vakila e liu,” e kaya vakaoqo o Sisita Wu. “Au sa gadreva vakaidina me’u semati tawamudu vata tale kei ira na noqu itubutubu taumada. Sa noqu masu ni ra sa na vakarautaki ira.”
E Dua na Veivuke Levu
Na kena semati e 150 na itabatamata e sega ni ka rawarawa. Me vakataki ira ga e vuqa, eso era vakaitavitaki ira ena nodra vakasaqarai ira na nodra itubutubu taumada, eratou kaya kina na matavuvale na Wu ni ratou a vukei talega kina.
Ni ratou sa laki yacova na ika 26 ni itabatamata, eratou sa laki tao tu.
“Na veika ga sa tu vei keitou na yaca buli,” e kaya o Sisita Wu.
Ena iotioti ni siga ni Yabaki Vou nei China sa nakinaki toka o Sisita Wu me laki tiko ena dua na soqo ni marau ni oti na nona cakacaka ena valetabu. Ia ena gauna sa kaya kina e dua na nona itokani vakacakacaka ni na laki sikova na valenivolavola ni tuva kawa ka tiko ena itikotiko ni valetabu, sa vakauqeti sara kina o Sisita Wu me rau sa gole vata kei koya.
A laki taura sara e dua na ivola ka ra volai tu kina na yaca ni matavuvale ni tamata eso eratou sega tiko ni kunea na nona matavuvale. Ena gauna sa dolava kina na ivola oqo, e tacega sara ki na draunipepa ka ra volai tu kina na itukutuku ni itubutubu taumada o ya. Mai na itukutuku o ya, eratou a sema rawa ki na kawa tale eso ki na itabatamata e vuqa sara e liu.
“O ya sa qai dua na gauna talei vei au,” a kaya o Sisita Wu. “Au a vakila sara ga ni ra sa gadreva dina tu o ira na tubuda taumada me vakayacori na nodra cakacakatabu vakalotu.”
E Dua na Veivakalougatataki Vei Ira na Kawa
Na gagadre ni vakaitavi ki na veivakalougatataki ni valetabu e sa muataki Chiang, Jung-feng kei Chun-mei na marama watina, ka rau lewe ni Tabana o Chi An, ena Tikina o Hua Lien Taiwan, me vakadinadinataka kina na iyalayala nei Malakai (raica na Malakai 4:6). Ka yaco kina me vagolei na lomadra kivei ira na nodra qase, ka vagolei na yalodra na qase kivei ira na luvedra.
Erau sa lewena tiko o Baraca kei Sisita Chiang e dua na ivavakoso lewe ni Lotu e Taiwan ka sa toso cake tikoga na kedra iwiliwili ka ra matavuvale liu ni tolu na itabatamata ka ra sa vauci vata.
“Sa dua na ka talei vei keimami ni ra lako mai ki lotu o ira na makubui keimami,” e kaya o Baraca Chiang, ka se qai vagalalataki walega oqo mai na itutu ni imatai ni daunivakasala ena mataveiliutaki ni Valetabu e Taiwan Taipei. “Sa neimami ilesilesi cecere me keimami vukei ira me ra lako mai vua na Karisito ena cakacakatabu vakalotu ni kosipeli. Keimami sa sega ni tagutuva rawa na isema oqo.”
Eratou vakabauta na matavuvale na Li ni kaukauwa ni cakacakatabu vakalotu ni valetabu e tekivu mai vei rau na veiwatini.
“Sa totoka cake sara na ituvaki ni neirau bula vakamau ni oti na neirau a laki vauci ena valetabu, e dina ga ni keirau sa bulataka tiko mai na ivakarau ni bula vaka-Lotu,” e kaya o Baraca Li. “Na veivauci e veisautaka sara ga na ituvaki ni veimaliwai vakaveiwatini. Ni sa oti na bula eke, ko sa na biuta tu mai na veika ko a oga kina ena vuravura oqo—na nomu motoka, cakacaka, vale, kei na ilavo. Ia e sega ni gadrevi mo vakayalia na nomu matavuvale.”
“Ena vukei iko mo kila na veika e tawamudu kei na veika e vakavuravura,” e kaya o Sisita Li. “Mo sa qai gumatuataka sara kina vakaidina na veika e baleta na nomu matavuvale”
Mai kea ena qai tete kina na kena mana.
“Ni ko sa kila rawa ni ko sa matavuvale tawamudu, ko sa na lomana vakalevu cake tikoga na watimu ka lomani iratou vakalevu cake na luvemu,” e kaya o Baraca Li. “Me kena isau sa totoka cake na vuvale. Sa vanua vinaka me da tiko kina. Sa dau tiko kina na Yalotabu.”
E Dua na Ulu ni Veivakalougatataki
Era kaya o ira na matavuvale oqo mai Taiwan ni cakacaka ni tuva kawa kei na valetabu sa vakalougatataka na nodra dui matavuvale ena bula oqo, ka ra sa kunea na vakacegu ni veivakalougatataki sa yalataki e tawamudu.
“Ena neimami cakacaka ena valetabu, keimami sa raica ni sa vinaka cake tikoga mai na neimami bula,” e kaya o Baraca Chiang, ka sa vakayacora oti o koya kei na watina na cakacaka me baleti ira e 16 na itabatamata ni nona kawa. “Keirau sa kunea kina na veivakabulabulataki ena loma ni kosipeli.”
E vakabauta talega o Baraca Chiang ni na vakalailaitaki sobu na veivakauqeti nei Setani kivei ira era dau vakaitavi ena cakacaka ni valetabu. “Ena yalo vakacegu na lomada ni da curuma na valetabu,” e kaya o Baraca Chiang. “Eda sa guilecava kina na veika vakavuravura.”
E tokona vakaoqo o Baraca Wu: “Kevaka me da na vakamatautaki keda me da na kautalesu ki noda vale na veika vakayalo kei na marau eda kunea mai kina, eda na vukea kina na noda matavuvale me ra vorata rawa kina na idre e tiko ena veika vakavuravura ka toro voleka yani vua na Kalou.”
Era vakabauta na veimatavuvale oqo ni kena ciqomi na cakacakatabu vakalotu ni valetabu ka vakayacora rawa na nodra cakacaka o ira era a sega ni ciqoma rawa ena bula oqo sa ka bibi sara me ra rawata na nodra inakinaki tawamudu.
E a vakavulica o Peresitedi Gordon B. Hinckley, “Na cakacakatabu vakalotu ni valetabu sa ikoya na ulu ni veivakalougatataki e sa vakarautaka tu na Lotu.”1
“Na inakinaki bibi ni noda lewenilotu sai koya me da lesu ki vua na Tamada Vakalomalagi vakamatavuvale tawamudu,” e kaya o Baraca Chiang. “O koya gona sa gadrevi kina me da ciqoma kece sara na cakacakatabu vakalotu bibi era vakayacori tiko ena loma ni valetabu.”
E Dua Na iVakaraitaki ni Loloma
Ena nona kaulotu tiko, e sa vulica kina o Camilla Wu na kena sa rui bibi na tamata yadua vua na Kalou. E a vakila o Camilla na kena sovaraki na loloma ni iVakabula vei ira yadua na vuqa na tamata a vakavulici ira.
“Niu sa lesu ki neitou au a laki vakayacora sara na cakacaka ni neitou tuva kawa,” e kaya o koya, “Au sa kila kina ni sa rawa beka vei au meu veivakauqeti sara ki na nodra vakabulai o ira era sa mate ena noqu cakava na cakacaka ni tuva kawa kei na valetabu.”
Eratou kaya na matavuvale na Wu ni valetabu sa ikoya e dua na ivakaraitaki cecere ni loloma nei Tamada Vakalomalagi vei ira na Luvena ena veika sa vakarautaki rawa tu.
“Na ibalebale ni valetabu vei au,” e kaya o Wilford na taci Camilla, ni “o ya na loloma ni Kalou vei ira na Luvena.”