iVaqa ni Veisiko
Yaco Mo iYaya ni Cakacaka ena Liga ni Kalou ni ko Vakavakarau ki na iKarua ni Lesumai ni Noda Turaga
Masulaka ka digitaka qai wilika mai na itukutuku oqo na veivolanikalou kei na veivakavuvuli ka na sotava na nodra gagadre na marama o dau sikova. Wasea na veika o sotava kei na nomu ivakadinadina. Sureti ira o vakavulica me ra vakayacora vakakina.
Meu na Vakavakarau Beka Vakacava ki na iKarua ni Lako mai nei Jisu Karisito?
V&V 38:30:“Ia kevaka dou sa vakarau vakavinaka tu dou na sega sara ni rere.”
Elder Dallin H. Oaks ena Kuoramu ni iApositolo Le Tinikarua: “E va na ivakavuvuli bibi era vakabauta kece tu na Yalododonu Edaidai: (1) na iVakabula ena lesu tale mai ki vuravura ena kaukauwa kei na lagilagi sa cecere sara me mai veiliutaki sara ga o Koya eke me dua na udolu na yabaki ni bula savasava kei na tiko vakacegu. (2) Ena gauna sa na yaco mai kina o Koya ena yaco e vuravura na nodra vakarusai na tamata ivalavala ca ka ra tucaketale na ivalavala dodonu. (3) E sega ni dua e kila na siga ena tadu mai kina o Koya, ia (4) era sa vakavulici tiko na yalodina me ra kila na kena ivakatakilakila ka me ra vakavakarau tiko kina… . Sa qai gadrevi sara kina me da vakavakarau vakayago ka vakayalo ena vuku ni veika sa parofisaitaki ni na yaco ena gauna ni iKarua ni Lako mai” (“Vakavakarau ki na iKarua ni Lesumai,” Liaona, Me 2004, 7, 9).
Kathleen H. Hughes, imatai ni daunivakasala vakacegu ena mataveiliutaki raraba ni iSoqosoqo ni Veivukei: “‘Raica dou sa tura tiko e dua na yavu ni cakacaka levu. Ia ena tubu mai na veika lalai na veika lelevu’ (V&V 64:[33]; vakamatatataki)… . E bibi duadua na cakacaka levu eda gadreva me da cakava era na tubu mai ena ‘veika lalai.’ E dua vei ira na ka lalai oqori, au sa vulica, sa ikoya ni dodonu me’u vakasaqara na gauna meu na vakaukauwataka kina na noqu veika vakayalo ena veisiga yadua” (“Mai na Veika Lalai,” Liaona, Nove. 2004, 109).
Elder Robert D. Hales ena Kuoramu ni iApositolo Le Tinikarua: “Sa namaki keda tiko na Turaga me da yalodina, gugumatua, ka yaloqaqa me vakataki ira era sa liu vei keda. Era a kacivi me ra solia na nodra bula me baleta na kosipeli. Eda sa kacivi me da bulataka na noda bula ena inaki vata o ya… . Na veitabagauna taucoko sara sa vakarautaka vakakina na sala me baleta na imatai ni Nona lako mai na Turaga kei na Nona Veisorovaki. Sa vakakina, na veitukutuku makawa kei na parofisai sa vakadavora kina e dua na yavu ni cakacaka me baleta na Vakalesuimai ni kosipeli kivei Parofita Josefa Simici. E sa tadola tiko beka na matada me da raica kina na veika ena yaco kei na parofisai me baleta na noda gauna eda sa vakarautaki tiko ki na iKarua ni Lako Mai ni iVakabula?” (“Vakavakarau Me Baleta na Vakalesuimai kei na iKarua ni Lako Mai: ‘Au na Taqomaki Iko Tikoga,’ ” Liaona, Nove. 2005, 91–92).
Ena Rawa Beka Vakacava Meu iYaya ni Cakacaka ena Liga ni Kalou ena Noqu Vukei ira Na Tamata Mera Vakavakarau?
V&V 34:6: “Ia mo tabalaka na domomu … me ra veivutuni … , ia mo caramaka na sala ni nona lesu tale mai na Turaga.”
Peresitedi Spencer W. Kimball (1895–1985): “Ni sa bula savasava tiko e dua na marama ena gauna sa mai vakarau cava kina na vuravura oqo, ni bera na ikarua ni Nona lako mai na noda iVakabula, sa dua dina na veikacivi dokai vakaidina. Ena gauna oqo sa rawa me vakatinitaki na nodra kaukauwa kei na veivakauqeti o ira na marama bula savasava ni vakatautauvatataki kei na veigauna dredre tale eso. Sa mai vakatikori o koya ena vuravura oqo me vukea na kena vakabulabulataki, taqomaki, ka vakatawa na vuvale—ni sai koya na yavu vakatamata e dodonu ka dokai duadua. Na yavu vakatamata tale eso sa rawa me ra tawase ka rawa ni rusa, ia na marama sa bula savasava ena rawa me taqomaka na vuvale, ka sai koya beka ga o ya na iotioti ni idrodro era sa kila tu na tamata me ra laki vakaruru kina ena gauna ni laba na cagi kei na gauna ni veisaqasaqa” (“Privileges and Responsibilities of Sisters,” Ensign, Nov. 1978, 103).