Ko Michael ka Yali Tiko
“Me lomana talega na wekana ko koya sa lomana na Kalou” (1 Joni 4:21).
Mai na Dua na iTalanoa Dina
Raica o ya na dudukilagi!“ A kaya yani o Natalie. E dau taleitaka o koya na laki lotu. E siga taleitaki duadua vua ni macawa taucoko o ya na Sigatabu, vakavo ga ena dua na ka—e dau rarawataki Michael voli, na ganena, ni sega tu ni dau via laki lotu vata kei iratou na nona lewe ni matavuvale.
E dau laki dabe vakamalua toka ga o Natalie ena soqoni ni sakaramede, ka vakananumi Michael. Ni dau mai lotu o Michael, e dau taleitaka sara o Natalie me dabe tikivi koya toka ka vakasarava toka na iyaloyalo i Jisu ena dua na ivola. Ni oti na soqoni ni sakaramede, e dau taura na ligana o Michael ka kauti koya yani ki na kalasi ni Lalai. “Qai raici iko tale, ganequ,” e dau kaya vakaoqori o Michael. Ia sa dede oqo sa sega tu ni mai lotu o Michael.
E dau diva tu o Natalie me vesuki koya mai ena nona dali ni lalade ka dreti koya mai ki lotu ena nona qiqi damudamu lailai, ia e kila o koya ni na sega ni taleitaka o Michael. Na cava tale beka me na cakava o koya?
Ena Lalai, sa kidavaki ira sara na nona lewe ni kalasi ena marau o Sisita Chang. “Au marautaka na nomuni tiko taucoko sara edai,” a kaya o koya. “E vakamarautaki au niu raica na matamuni mamarau. Ia o cei e yali tiko?”
A veiraiyaki o Natalie ena loma ni rumu. A laveliga o koya. “ o Jed,” a kaya yani. “E yali o Jed edai.”
“E dina o iko,” e kaya mai o Sisita Chang. “a sega talega ni tiko o koya ena macawa sa oti.”
“E rairai tauvimate beka,” a vakatututaka mai o Lisa.
“E rairai gole tu beka ki na dua na vanua,” a kaya o Boyd.
“E rairai sega beka ga ni via lako mai,” a kaya vakamalua mai o Natalie.
“E gadrevi me kila o koya ni da lomani koya ka dau vakananumi koya ni gauna e yali mai kina,” a kaya mai o Sisita Chang.
“Eda na cakava beka vakacava o ya?” a taroga mai o Natalie.
“Me da laki tukuna vua,” a kaya o Sisita Chang. “Na veika lalai e rawa ni yaco kina na veika lelevu. Au sa cakava e dua na kadi mo ni saini kece kina, ka rawa mo ni droinitaka e dua na iyaloyalo talei me nei Jed.”
A saga sara o Natalie me droinitaka e dua na ulunivanua kei na veivunikau baleta ni kila o koya ni dau taleitaka o Jed na veitokaitua. A qai taroga o Natalie vei nona qasenivuli ke rawa ni droinitaka e dua tale na iyaloyalo me kauta ki nona vale.
Ena gauna sa suka mai kina na lotu o Natalie ka gole ki nodratou, a raici Michael sara ni vakarorogo ivakatagi tiko ena nona rumu. “Bula ganequ,” a vakabula mai o koya. “Sa vavei?”
A solia o Natalie vua e dua na draunipepa e lobi toka. “Oqo na nomu kadi au cakava.”
“Me noqu?” a dredre o Michael. “Baleta? E sega ni noqu siganisucu, se dua tale na ka.”
“A vukei au o Sisita Chang ena volavola e loma. E volai tiko kina, ‘Au dau nanumi iko ni ko dau sega ni lako mai ki lotu vata kei keitou. Au lomani iko.’ Kau a qai saini kina.”
“Vinaka,” a kaya vakamalua mai o Michael. “E totoka na kadi. E maqosa na ka o cakava.”
“Sega na leqa.” A mokoti ganena o Natalie ka cici yani me laki vukei tinana ena vakarautaki ni vakayakavi. E a marau na yalona. E lomani ganena vakalevu sara, ka sa kila tale tikoga o Michael.
Ena Sigatabu ka tarava, sa dua na ka na marau nei Natalie ni sa na laki lotu o Michael. Erau a veitauri liga ni rau curu yani ki valenilotu. A dabe vakamalua toka ga e yasai Michael o koya ena gauna ni soqoni. A rai yani o Natalie ka raici Jed ena rua na iyatu dabedabe e liu ka yaloyalo vua.
E dau taleitaka o Natalie na laki lotu, vakabibi ni ra dau tiko taucoko e kea o iratou na nona matavuvale kei ira na nona itokani. A sa nanuma o koya me sa tekivu oqo, kevaka ena vakananuma e dua na tamata, ena laki tukuna vua na tamata o ya, baleta ni veika lalai ena rawa ni yaco me dua na ka levu.
“Sa noda itavi dina … me da raica ni o ira kece era sa papitaiso me ra vakayaloqaqataki ka kauwaitaki dina ena loloma ni kosipeli ni noda Turaga.”
Peresitedi Gordon B. Hinckley, “Find the Lambs, Feed the Sheep,” Liahona, July 1999, 124.