iTokani ki na iTokani
Sa Lagilagi ni Kalou na Vuku
“Ia kevaka e dua na tamata sa levu na ka e vulica ka kila ena nona gugumatua ka talairawarawa.., ena yaga vakalevu cake sara vua ena bula sa bera mai” (V&V 130:19).
Sa noqu bula taucoko meu dau vuli ka. Ena gauna au se cauravou lailai kina, au nanuma tu ga ni vuli o ya me da laki vuli, veitarogi, ka me da rawata eso na icovi. Ia niu sa tubu cake tiko, au sa vulica rawa kina na kedrau duidui na rawata tiko na maka vinaka e koronivuli kei na nomu vakavukui. Sa rawa vua e dua na tamata me rawa ka vakavinaka ena veitarogi ka se sega ga ni vakavukui rawa. Na vuli dina sai koya na vulica mo vakavukui. Ena gauna ga au sa kidava rawa kina na ivakavuvuli oqo, sa qai ka ni marau vei au na vuli.
E dua vei ira na noqu inakinaki ena bula oqo o ya meu vuli ka—meu vuku ka kila ka. E tukuna tiko na Vunau kei na Veiyalayalati 93:36 vakaoqo, “Raica sa lagilagi ni Kalou na vuku.” O na rairai kaya beka ni vuku sai koya na isolisoli ni cakacaka ni vuli, ia na vuku sa kena ibalebale talega na kena rawati rawa na kila ka ena inakinaki ni veika ni bula dodonu.
Sa dau vakaituvatuva vakaikalawa na kila ka ni bula vakayago kei na veika vakayalo. E sa tarai cake na noqu ivakadinadina mai na vosa ena vosa, ivunau ena ivunau, vakalailai eke, vakalailai mai kea (raica na Aisea 28:10)—oqo na ka sa yaco talega vei ira kece na lewe ni Lotu. Niu se cauravou lailai, au nanuma lesu na nona dau wilika vei au o tinaqu na iVola i Momani kei na iTukutuku ni Lotu. Au a vakila e dua na yalo veivakadeitaki e kamikamica, ka veivakacegui ni veika au sa vulica tiko o ya era ka dina sara. Sa qai kadre cake na yalo oqo ki na dua na gagadre dina meu vuli vakaukauwa sara ena noqu vulica na ivolanikalou. E se bera mada vakadua ni yavalati na noqu bula me vakataka na noqu wilika, vulica, ka vakasaqara na volanikalou meu na kila ka kina, ka vuku vakalevu cake.
Au a tubu cake e California ena gauna ni noqu cauravou ena gauna ni veitemaki ni veika butobuto, me vakataka na wainimate ni veivagagai kei na ivakatagi vakasisila, ka sa tekivu me taleitaki sara. Me baleta ga na kila ka kau sa vakalougatataki mai kina, au sa digitaka meu kakua ni tara na veika vaka o ya. Au sa vakavakarau tiko kina meu laki kaulotu ka qarava na Turaga. Niu sa kaulotu tiko, na noqu kila niu sa qarava tiko na Turaga e a vaqaqacotaka na noqu gugumatua yani meu cakacaka vakaukauwa ena kena tarai cake na matanitu ni Kalou. Na cakacaka ni kaulotu sai koya beka e dua vei ira na sala cecere me da vuli ka vakavukui vakayalo kina.
Na yavunibula dina ni vuli sai koya me na vakarautaki iko mo ivurevure ni veigacagaca kecega—mo kila rawa kina na veika mo na cakava ena gauna ni lecaika! Eda sa dau vakasalataki tiko me da dau vakasaqara na vuli mai na noda dau vuli ka kei na vakabauta (raica na V&V 88:118). Ena noda gauna ni bula oqo, ena loma ni noda matavuvale, kei na loma ni Lotu, eda na ciqoma mai kina na veivakalougatataki ni qaqaco vakayalo, veidusimaki, kei na taqomaki ni da vakasaqara ena vakabauta me da vakavukui ka bulataka na vuku vakayalo vakaoqo ena bula dodonu.