Nodra Vukei o Ira na Era Vakatotoganitaki Tu Ena Veivinakati Vakatagane se Vakayalewa Vata
E dua na cauravou totoka yabaki 20 a dabe basai au toka mai. E dau matadredredre toka, e dina ga ni sega ni dau dredre ena gauna taucoko ni neirau veivosaki. Na ka au malele sara kina vua o ya na rairai rarawa ni yaloka ni matana.
“Au sega mada ni kila se meu lewe tikoga ni Lotu se me kua.” A kaya mai. “Au vakabauta niu sa sega tu ni kilikili kaya.”
“Na cava na vuna o sega kina ni kilikili?” au a taroga.
“Au vakasalewalewa.”
Au vakabauta ni nanuma o koya niu na kurabui kina. Au a sega. “Qai vavei … ?” Au a taroga.
A veisau sara na kena irairai ni vakila o koya niu lomani koya dina tiko. “Au sega ni dau vinakati ira na yalewa. Au vinakati ira ga na tagane. Au sa saga meu vunitaka na noqu gagadre oqo se veisautaka, ia …”
A vutugu. “Na cava na vuna au vaka tu kina oqo? Sa ka dina sara ga na gagadre ni lomaqu.”
Au a cegu vakalailai, ka qai kaya, “Au na kerea eso tale na itukutuku ni bera niu vakasalataki iko. Mo kila tiko ni veivinakati vakatagane se vakayalewa vata e sega ni ivalavala ca, ia na kena vakayacori na gagadre ni yalo oqori sai koya—sa tautauvata kei ira na veivinakati vakadodonu. O dau voroka beka na lawa ni tiko savasava?”
A kurea na uluna. “Au sega ni cakava.”
Au sa qai vakacegu. “Vinaka vakalevu na nomu liaca rawa na ka oqo. E ka ni yaloqaqa, kau dokai iko ena nomu saga mo bula savasava tiko.
“Ena vuku ni itovo ni gagadre ni yalomu oqori, au sega ni sauma rawa. E vica na ka e rawa ni vakavuna, ka na duidui sara me vaka ni duidui na tamata. Eso na ka, ka oka kina na ituvaki ni nomu gagadre, eda na sega ni kila rawa ena bula oqo. Ia na nomu kila na vu ni gagadre ni yalomu e sega sara ni ka bibi me vakataka na nomu kila ni ko se bera ni cakava kina e dua na ivalavala ca. Kevaka ko sa bulataka tiko na ivakaro, ko sa qai kilikili kaya mo veiqaravi ena Lotu, ka veimaliwai vakalotu vakavinaka kei ira na lewenilotu, curuma na valetabu, ka ciqoma na veivakalougatataki taucoko ni Veisorovaki ni Turaga.”
E a dabe cake vakadodonu sara o koya. Au tomana tale, “Ko na sega sara ni vakavinakataka na nomu bula ni ko sa raica taumada na kemu ituvaki ni gagadre vakayago. Oqori e sega walega ni kemu ituvaki duadua, o koya gona mo kakua ni laki vakararawataki iko tu kina vakatabakidua. Taumada ka vakatekivu o iko e dua na luvena tagane na Kalou, ka lomani iko tiko o Koya.
“Me kena ikuri, au lomani iko. O ira na Veitacini ena loma ni Vakaitutu Raraba era lomani iko. Au nanuma sara e dua na vosa nei Peresitedi Boyd K. Packer kivei ira era veivinakati vakatagane se vakayalewa vata. ‘Keimami sega ni cati kemuni,’ a kaya. ‘ Keimami na sega ni rawa ni cati kemuni, ni sai kemuni na luvena tagane kei na luvena yalewa na Kalou. Keimami na sega vakadua ni cati kemuni, baleta ni keimami lomani kemuni.’ ”1
Keirau a veivosaki ka 30 na miniti vakacaca. Ena vuku ga niu sega ni rawa ni vakasalataki koya vakai au ga, au a tukuna vua me laki raici ira na nona iliuliu ni matabete. Keirau sa mani dui gole. E vaka niu sa raica rawa e matana e dua na irairai ni inuinui e a sega ni laurai taumada vua. E dina ga ni sa tu na bolebole me na vorata rawa—se vosota tikoga—au sa vakila ni na rawata vakaidina o koya.
Na Kalou E Lomani Ira Na Luvena
Ena gauna sa tarogi Nifai kina e dua na agilosi e dua na taro me baleta na Kalou, a sauma mai o Nifai, “Io,au sa kila ni sa lomani ira na luvena; ia au sega ga ni kila na ibalebale ni veika kece au sa raica” (1 Nifai 11:17). Au sa vakadeitaka talega eke ni Kalou sa lomani ira taucoko na Luvena ka sa dau sauma mai na veilomatarotaro kece oqori, ka oka kina na veika e baleta na veivinakati vakatagane se vakayalewa vata, ena waraki na kena isau, rairai beka ena bula ka tarava.
E ka ni rarawa, ni so na tamata era vakabauta ni sa tu vei ira na isau ni taro taucoko ka ra sa veivakasalataki raraba yani. Sa qai dua na ka vinaka ni o ira oqo era sega ni vosa ena vuku ni Lotu i Jisu Karisito ni Yalododonu Edaidai.
E dina ga niu vakabauta ni sa tu o ira na lewenilotu me ra dodoliga yani kivei ira era duidui sara mai vei ira, sa ivakarau tu ni bula ni tamata ni gauna eda dau sotava kina na veika tawamacala vakaoqo, eda dau vakasuka. Oqo e dau yaco dina vei ira era veivinakati tu vakatagane se vakayalewa vata. E lailai sara na noda kila me baleta na ka oqo ka ra nuinuikara kina o ira era gadreva me ra veivuke yani. Au vakatusa niu malumalumu talega ena vuku ni leqa oqo niu gadreva meu veivuke kina, ka meu na vakatura kina eso na ka me ra vukei kina o ira na wekada voleka se itokani era veivinakati tiko vakatagane se vakayalewa vata.
NaYavu ni Marau nei Tamada
iMatai, me da kila vakavinaka tiko na veika e vinakata vei keda yadudua na Kalou. E vinakata o Koya me da ciqoma kece sara na veivakalougatataki ni bula tawamudu. E gadreva o Koya me da ucui Koya. Ena noda vukei ena ka oqo, sa solia vei keda o Koya e dua na ituvatuva. Na ituvatuva oqo e vakayavutaki tiko ena dina tawamudu ka sega ni rawa ni veisautaki ena vuku ni veika eda sotava tu ena bula oqo.
Na usutu ni ituvatuva oqo ni Kalou o ya na nodra vakasucumi mai na gone, oqori e dua na vuna bibi erau a biubiu mai kina o Atama kei Ivi mai na were o Iteni (raica na 2 Nifai 2:19–25; Mosese 5:10–12). Erau a vakaroti me rau “vakaluveni, ka tubu me lewevuqa” (Mosese 2:28), ka rau sa digia me rau vakamuria na ivakaro o ya. Sa noda itavi me da vakamuri rau me da vakamau ka vakarautaka na yago me baleti ira na luvena vakayalo na Tamada Vakalomalagi. Sa vakadeitaki kina ni veivinakati vakatagane se vakayalewa vata sa veisaqasaqa kei na ituvatuva oqo.
Ena vuku ni veika eso, na vakamau kei na vakaluveni ena sega ni rawata kece na tamata. E rairai sega ni yaco rawa e dua me vakamau. E rairai na sega beka na vakaluveni ni sa oti na vakamau. Se sa na sega beka na veivinakati vakadodonu ni tagane kei na dua na yalewa. Se cava ga na vuna, sa na tau tikoga na veivakalougatataki cecere ni Kalou kivei ira kece na Luvena kevaka era sa bula savasava ka yalodina tiko.
Ena kena cakacakataki tiko na vakabauta, na veisasaga ni tamata yadudua, ka vakararavi tiko ki na kaukauwa ni Veisorovaki, eso era na veisautaki ira rawa mai na veivinakati vakatagane se vakayalewa vata ena bula oqo ka vakamau dodonu sara. Eso tale, era na rairai sega beka ni rawa ni sereki mai na veivinakati vakatagane se vakayalewa vata ena bula oqo.
Ni da sa lewe ni Lotu vata tiko, matavuvale, se itokani, sa gadrevi me da kila rawa ni o ira era veivinakati tiko vakatagane se vakayalewa vata era sotava tiko eso na veika dredre me baleta tiko na nodra gagadre vakayago o ya. Me vaka ni ka dina na veivinakati vakaoqo, me kakua kina ni dua na veitaratara vakayago ena vuku ni veivinakati oqo. Na gagano vakayago me vakacegu kina e sega ni solia kina na dodonu vua e dua me cala kina. Na gagadre vakaoqo sa rawa me kaukauwa sara, ia era sa sega sara ni kaukauwa me kauta tani mai kina vua e dua na galala me digia kina me caka dodonu.
Ni tukuni kina vakaoqo, me vakamatatataka sara mada eke ni veivinakati mada ga, se cava ga na kena kaukauwa, ena sega ni bula tawa kilikili kina e dua. E kaya o iratou na Mataveiliutaki Taumada, “E tiko e dua na duidui levu ni vakasama kei na gagano tawa kilikili kei na kena laki vakayacori sara ga na ivalavala ca ni veimoceri ni tagane kei na yalewa se vakatagane se vakayalewa vata.”2 Kevaka o sega ni laki vakayacora na veitemaki o ya, e sega ni ko cala.
Na kena sega ni laurai rawa na duidui oqo ena so na gauna ena veilecayaki kina na bula. Au luluvu vakalevu ena vukudra o ira era sega tu ni kila ni veivakalougatataki sa dau solia mai na Kalou sa baleti ira kece sara era na vakamuria na ivakaro ena veivakalougatataki era sa yalataki tu kina (raica na V&V 130:20–21). E sega ni dodonu vua e dua sa bulataka tiko na kosipeli me veilecayaki tiko. Na inuinui kei na vakacegu sa lako mai vei koya na Dauveivakacegui, ka sa isau ni taro ki na veilecayaki o ya na noda sureta na Yalo Tabu ki na noda bula.
Na Veisala Ni Veivuke
Me da kaya mada eke ni dua vei iratou na lewe ni nomu matavuvale se nomu itokani e vakasalewalewa se vakasaganegane tiko e kerea na nomu veivuke. Na cava beka o na kaya? Na cava beka o na cakava?
Au na tekivu ena noqu vakavinavinakataka na yaloqaqa nei luvemu tagane, luvemu yalewa, veitatacini, se itokani. Au na vakavinavinakataki koya na tamata o ya ena nona yalonuidei. Na kena veivosakitaki kei na dua tale e nuitaki sa itekitekivu vinaka ni kena wali na ituvaki ni gagano duatani vakaoqo, ka sa vinakati sara vakatotolo na kena sotavi na imatai ni kalawa oqo ena yalololoma.
Tarava sara, kevaka o itubutubu ni dua vei ira na vakasalewalewa se vakasaganegane oqo, kakua ni nanuma ni ko a vakavuna na leqa ni gagano vaka o ya. Me kakua ni dua, ka oka kina o koya e tiko vua na yalo gagano o ya, me beitaki koya vakaikoya. Me kakua talega ni dua e beitaka vakakina e dua tale—oka kina na Kalou. Lako voli ena vakabauta, ka vukei koya na nomu daulomani oqo me vorata ka sotava rawa na bolebole o ya ena nona vinaka taucoko.
Ni vakayacori na ka oqo, ka mo kila tiko ni sega ni kena iwali taucoko na vakamau. Na vakasalewalewa kei na vakasaganegane e ka titobu, kei na kena vakasaurarataki na veivinakati dodonu ena sega ni rawa me na veisautaki ira sara. Eda kurabuitaka na nodra rawa ni vakamau rawa o ira era a vakasalewalewa se vakaganegane, ka ra vakaluveni, ka rawata rawa na bula marau vakavuvale. Ia eso tale na sasaga vaka o ya e a yaco ga kina na kavoro ni yalo kei na kavoro ni matavuvale.
Me kena iusutu, mo dau veivosaki vakalevu kei ira. Na veivosaki vakalevu kei ira na itubutubu kei na gone sa ivakadinadina ni dua na loloma, kei na loloma savasava, e vakaraitaki e matanalevu, sa dau rawa me vakacokotaki kina na matavuvale. Ia na nona lomani e dua na lewe ni matavuvale ena sega kina ni vakawaleni kevaka sa yaco e dua na caka cala. O ira na luvemu sa nodra itikotiko na nomuni vale, ia sa tu vei iko na dodonu mo kakua ni vakatara e dua na itovo ca ena rawa ni vakayacori ena nomu itikotiko ka na dau vorata na Yalo ni Turaga.
Na iVakavuvuli ni Loga ni Teitei
Tarava, raica mada e dua na ivakavuvuli e vulici rawa mai na teitei. E dua e kaya ni kevaka eda tea e dua na loga ni teitei ena dua na itei vinaka ka kaukauwa, ena vakamalumalumutaki ira sobu tikoga na co ca. Sa vakakina ni kevaka eda vakatawa vakalevu na noda bula ena kakana vakayalo sa solia vei keda na Kalou, eda na qaqaco cake me da vorata rawa na veika vakatani. Sa kena ibalebale oqo ni sa gadrevi me da vakayavutaka ena noda loma ni vuvale na tiko savasava me na tiko vata kina kei keda na Yalotabu. Na tiko savasava vakaoqo sai koya na sokalou vakatamata yadudua kei na kena ena matanalevu, na masu, lolo, wili ivolanikalou, na veivuke, kei na veimaliwai ena veiwasei ni veivakatatakitaki, sere, wilivola, kei na veika ni itukutuku raraba tale eso.
Ena laki sema yani na veika vivinaka oqo ki na veika e laki sotavi ena lotu. Eso vei ira na vakasalewalewa se vakasaganegane era se veilecayaki tiko ka rawa ni dau vakamavoataki na yalodra ena gauna e sega ni nakiti kina e dua na cala. Ena dua tale na yasana, eso na lewenilotu era dau vakuwai ira mai na veimaliwai vakalotu o ira era duidui maivei ira. Ena gauna e vakayalolailaitaka kina e dua na tamata na noda ivalavala se ivosavosa me ra cokonaki vakavinaka ena loma ni Lotu, eda sa vakauwai ira tiko—kei na Turaga. Ena vaqaqacotaki vakalevu cake na Lotu ni sa okata na lewenilotu yadudua ka veivakaukauwataki ena veivukei kei na loloma (raica na V&V 84:110).
Ena rawa mo na vakauqeti mo vakayaloqaqataka kina e dua ko saga tiko mo vukea me na laki raica e dua na iliuliu ni matabete ka sa tu vua na idola ni veivakasalataki vakalou. Yalovinaka mo vakayacora, ni ko sa kila ni o iratou na Mataveiliutaki Taumada eratou sa kerei ira na iliuliu ni Lotu me ra veivosakitaka vakatikitiki na veika oqo ena yalo ni loloma Vakarisito.3
Ena Liga ni Turaga
Ena dua na gauna lekaleka sa oti au a taura kina e dua na ivola mai vua e dua na tagane sa yabaki 30 ka sa vakaogai tu ena vakasalewalewa. E a sega ni rawarawa na nona vakaogai tu vakaoqo, ka sega tu kina ni vakamau. Ia a vola mai vakaoqo, “na Turaga e a vukei au meu sotava rawa kina na kequ ituvaki vakaoqo, kau sa yalo vakacegu ena noqu cakava na noqu vinaka taucoko sara kau sa laiva na noqu bula ki na Ligana.”
Au tagi ena qoroqoro kei na noqu doka na tagane oqo ka sa bula bolea rawa tiko na bolebole au se bera mada ni sotava. Au lomani koya kei ira na udolu era vakataki koya, tagane se yalewa, era sa “ia ga na ivalu vinaka” (1 Timoci 6:12). Au sa vakavinavinakataka na itovo ni rai oqo kivei ira taucoko era vakaogai tu kina—se o ira era vukei ira tiko eso era vakatotogani tu ena—vakasalewalewa se vakasaganegane.
Ikuri ni veivuke
Eratou a vakarautaka edua na tikidua na Mataveiliutaki Taumada kei na Kuoramu ni iApositolo ni Le Tinikarua me baleti ira na vakasalewalewa kei na vakasaganegane. E vakatokai na Sa Lomani Ira na Luvena na Kalou) (ivola naba 04824). Kevaka sa vakarautaki tu ena nomuni vosa na tikidua oqo, sa rawa mo ni laki raica mai ena nomuni sitoa ni Lotu se lavetaka mai na www.lds.org/same-gender-attraction.