Gauna ni Veiwasei

Ena Qai Cecere sara na Nomu Reki

Mai Vei Elizabeth Ricks

“Me caudre vakakina na nomudou rarama ena matadra na tamata, me ra raica na nomudou ivalavala vinaka, ka vakarokorokotaka na Tamamudou sa tiko mai lomalagi” (Maciu 5:16).

Ko sa bau vakila beka ni gauna o dau wasea kina e dua na kakana se iyaya ni vakatatalo, ko a marautaka beka? Io e ka dina. Sa rawa mo dau solia na veika tale eso ka sega walega ni kakana se iyaya ni vakatatalo, me vakataka na kila ka. Na kena wasei na veika ni kila ka ena rawa ni kauta mai na reki e cecere—e sega walega vei koya e a taura kivei koya talega a solia. Na kila ka vinaka duadua me na wasei sai koya na kosipeli i Jisu Karisito.

A vakila talega o Ashley, yabaki ciwa, na marau ni nona a wasea na kosipeli. Ena gauna sa soli kina e dua na ibolebole vei Ashley me wasea na iVola i Momani, a vakavodoki Ashley ena motoka o tamana ka kauti koya ki na vale nei qasenivuli liu, ka laki solia kina vua o Ashley e dua na iVola i Momani. Sa solia talega kina vei rau na daukaulotu tudei na yacai koya na qasenivuli liu. Sa dua na ka na marau nei Ashley! (Raica na “Nine-Year-Old Member Missionary,” Friend, July 1997, 42–43.)

Na ka bibi duadua ko na rawa ni wasea sai koya na kosipeli i Jisu Karisito. Na Turaga a kacivi rau o Oliver Cowdery vata kei David Whitmer me rau vunautaka na kosipeli. E a vakamacalataka na marau levu ena yaco vei rau:

“Ia kevaka drau sa vunau tiko e na nomudrau bula taucoko ka sa saumaki kina e dua na tamata, sa na vuabale sara na nomudrau marau ena matanitu i Tamaqu!

“Ia kevaka sa vuabale na nomudrau marau ni drau sa vakabula mai e dua ki na matanitu i Tamaqu, sa na uasivi sara na nomudrau marau kevaka drau sa vakabula rawa e lewevuqa!” (V&V 18:15–16).

Eda sa vakaraitaka tiko na noda vakabauti Jisu Karisito ena gauna eda wasea kina na kosipeli vei ira na tamata. Sa qai duatani na noda marau ni da vukei ira eso me ra kilai Jisu Karisito kei na ituvatuva nei Tamada Vakalomalagi.

iTaviqaravi

Vola na yacamu ena ruku ni dua na iyaloyalo ni dua na daukaulotu. Kotiva laivi, ka laki vakabira ki na dua na pepa vavaku levu. Ena gauna ni lotu vakamatavuvale, biuta tikiva na kemu iyaloyalo vakadaukaulotu oqo ena yasa ni veiyaloyalo yadua, ka vakamacalataka ki na nomu matavuvale ni tamata yadua ena iyaloyalo e daukaulotu. Sureti iratou na nomu matavuvale me ratou vakatovotovotaka na veicakacaka yadua ena iyaloyalo se so tale na mataqali cakacaka eratou nanuma rawa ka me vakatovotovotaki na kena kaburaki na kosipeli.

Vakasama ni Gauna ni Veiwasei

1. Vakarautaka eso na tikitiki ni pepa ka sa volai oti tu kina na ivakaraitaki, e vinaka, kei na kena e ca. Me ra qai tomika mai na gone yadua e dua na tiki ni pepa oqo mai na dua na kateni. Me ra qai dui wilika mai na ka e volai tiko kina. Me ra qai tukuna mai na gone kevaka o ya e dua na vakaraitaki vinaka se ca. Vakabira na tikitiki ni pepa yadua ki na papanivolavola ena ruku ni iulutaga “Vakaraitaki Vinaka” se ki na “Vakaraitaki Ca”. Kena ivakaraitaki, “Au dau dara na isulusulu rakorako” ena laki kabi ena “iVakaraitaki Vinaka,” kei na “Au dau vosa ca ena so na gauna ” ena laki kabi ena “iVakaraitaki Ca.” Me ra qai rai cake na gone, ka ra wilika, ka cavuqaqataka na Maciu 5:16. Wasea na nomu ivakadinadina ni o Jisu Karisito sa ivakaraitaki bula kivei keda kece sara.
2. Kerei ira na gone me ra vakasamataka mada e dua na gauna era a rogoca kina e dua a wasea na nona ivakadinadina. Vakamacalataka ni dina ga ni soqoni ni soli ivakadinadina sa gauna ni noda dau wasea kina na noda ivakadinadina, sa rawa talega me da wasea na noda ivakadinadina ena veigauna tale eso. Me raici na 2 Timoci 1:7–8. E kaya o Peresitedi Gordon B. Hinckley vakaoqo, “Au sa nuitaka ni o ira yadua na lewe ni Lotu oqo me ra biuta toka na veivosa oqori ena dua na vanua me rawa ni raica tiko o koya ena veimataka lailai ni vakarau tekivu cakacaka ena dua na siga” (“Be Not Afraid,” Liahona, Feb. 2005, F2). E kaya o koya ni veivosa oqori ena solia vei keda na yaloqaqa, vakabauta, kei na kaukauwa. Me ra qai vola na gone na tikina e 7 kei na imatai ni malanivosa ena tikina e 8 me ra qai kauta ki nodra dui vale ka biuta toka ena dua na vanua me ra raica tiko ena veimataka. Vukei ira na gone me ra vakila na kaukauwa ni nodra ivakadinadina na parofita kei ira na iapositolo. Kevaka e tiko, mo qai vakatagitaka e dua na katokatoni ni dua na ivakadinadina mai na koniferedi raraba se na vidio Special Witnesses of Christ. Se wilika mai na dua na ilavelave ni Liaona.

iVakamacala: Kevaka o sega ni gadreva mo kotiva laivi e dua na draunipepa mai na mekesini oqo, sa rawa ni lavetaki na itaviqaravi oqo se tabaki mai na Initaneti ena www.lds.org. Me baleta na kena Vakavalagi, kiliki ena “Gospel Library.” Me baleta na veimataqali vosa tale eso, kiliki ena “Languages.”