Noqu Masu Vata kei Noqu Dauveituberi ni Matavuvale
Au madualaka niu tukuna na ka oqo, ia au nanuma ni ena so na gauna era dau veivakasaurarataki cake vakalevu na dauveituberi ni matavuvale ka ra sega ni kauta mai e dua na kalougata. Ena gauna vakaoqori au dau saga meu drotani ena gauna era lako mai kina meu rawa kina ni lewai au ga.
Oqori na vuna a lako mai kina o Lincoln me neitou dauveituberi ni matavuvale. Au sega sara ga ni taleitaka. E a sega mada vakadua ni calata na nona veisiko. Sa dau vakarautaka rawa tu mai na nona lesoni, ka dau yalodina sara o koya ena nona itavi ni veituberi. Au taleitaka na veika e cakava tiko ia e sega ga ni rawa meu vakarorogo sara vakalevu vei koya kei na nona itokani ni rau dau veisiko mai ena veivula. E dau mamarau tu ga o Lincoln; au dau sega sara ni taleitaki rau.
Ena dua na yabaki ni se qai tekivu na vula itubutubu, au sa cakacaka tiko e tautuba. O ya e dua na siga katakata ka totoka. E dau vinaka vei au na cakacaka vakaoqo, ia ena siga oqo au a lomaleqa vakalailai. O turaga watiqu e se qai sele oti ga na dakuna, ka sa sotava tiko na neitou matavuvale na veika dredre.
Niu gadreva na veivakacegui, au sa tekiduru ena loga ni teitei ka masu. Sa turu na wai ni mataqu niu sa gadreva vakaidina na veidusimaki ni Turaga. Meu na kune vakacegu mada ga. Me sa vakadeitaki mada ga vei au ni na sega ni laki ca sara na neitou bula me vaka sa yaco tiko vei keitou. Au a masu vagumatua, ka rogo levu cake na domoqu ena so na gauna, niu sa kerea tiko vua na Turaga na inuinui ka vakabibi ga na vakacegui ni yaloqu.
Ena gauna au sa lesu kina ki vale niu sa masu oti vua na Turaga, au sa wale sara ga. Au sa marau ni sega ni dua e a tiko e vale niu sa vinakata meu vakacegu mada vakalailai. Ia ni gauna au se qai luvata tiko kina na noqu ivava ni cakacaka sa taqiri na lali ni katuba. Au a sega sara ga ni namaka tiko me ko Lincoln o ya, ia ena gauna au sa dolava kina na katuba, erau sa tucake tu vakaveiwatini, ia e sega na ivola ni lesoni.
Sa qai imatai ni gauna oqo, au marau niu raici koya. Au a sureti rau mai loma. Keitou veitalanoa sara, ka taroga o Lincoln se sa vakacava tiko na cakacaka nei watiqu, o iratou na luvequ yalewa e lima, kei na veika tale eso ni matavuvale. E sega ni dede na nodrau tiko, ia ni rau sa tu yani me rau gole, a kerea o Lincoln me cabora e dua na masu ena vuku ni vuvale. Au a marautaka, kau vakasamataka se kila vakacava o koya ni gadrevi dina tu na veimasulaki vaka o ya. Keitou a tekiduru, ena gauna au sa rogoca kina na nona veimasulaki veivakacegui, sa kerea kina o koya e dua na veivakalougatataki veivakacegui me sobuta na neitou matavuvale.
Ena gauna vata o ya au sa vakila kina e dua na kaukauwa ni vakacegu sa curumi au. Au sa qai kila kina ni sa veiliutaki tiko na Turaga ni sa na yaco me vinaka na veika kecega.
Sa saumi sara mai vakamatata ka vakadodonu na noqu masu kivei Lincoln, na neitou dauveituberi ni matavuvale yalodina. Ena nona doka tiko na nona ilesilesi ka vakamuria na veivakauqeti ni Yalo Tabu, sa laiva kina vei au o koya e dua na ivakadinadina ni sa vakalou na nona ilesilesi.