Era A Kidavaki Elder Eyring na Bete ni Shinto ena Valenisoro Vakairogorogo e Meiji mai Japani

Na bete levu o Katsushi Toyama mai na Valenisoro vakairogorogo e Tokyo, a veivosaki vata kei Elder Henry B. Eyring ena Kuoramu ni iApositolo Le Tinikarua ena nona a tiko voli vakaveisiko mai na veiyasana ni Lotu e Esia kei na Yatu Pasivika.

Eratou a laki bose vata kei Mr. Toyama o Elder Eyring, vata kei Elder D. Todd Christofferson ena Mataveiliutaki ni Vitusagavulu vata kei Elder David F. Evans, na Peresitedi ni iWasewase ni Vualiku kei Esia me semati kina e dua na veiwekani vakavoleka kei na cakacaka vata.

E kaya o Mr. Toyama kivei iratou na vulagi oqo ni sega ni dua na ivola ni vakabauta vaka-Shinto e tautauvata kaya kei na iVola Tabu se so tale na ivolanikalou, ia era bulataka sara tikoga o ira na lewe ni nodra ivavakoso na veiwekani vakavoleka kei na Kalou ena nodra bula vakayalo savasava kei na caka dodonu.

E a kaya kina o Elder Eyring ni o ira na lewe ni Lotu i Jisu Karisito ni Yalododonu Edaidai era bulataka talega vakakina na bula vakayalo savasava kei na caka dodonu. “Na neimami parofita o Gordon B. Hinckley, sa dau vakasalataki ira tikoga na lewe ni neimami lotu me ra taurivaka sara ga ena nodra bula ena veisiga na ivakavuvuli vakalotu,” a kaya o koya.

E a vakatakilaitaki taumada na Lotu vei Mr. Toyama ena gauna a laki vulagi dokai kina mai Salt Lake City ena 1970 vakacaca. Me yacova mai oqo, sa qaqaco sara tiko mai kina e dua na veikilai ka yaco me so talega na bete mai na nodra valenisoro o ya era a sikovi Salt Lake City yani kei na Brigham Young Univesiti mai Provo, e Utah. Ena 2005, e a isevu kina ni dua na ilawalawa lotu Vakarisito na Matasere ni BYU–Awai me laki lagasere ena Valenisoro na Meiji.

E a vakayacori na veivosaki vata kei Mr. Toyama ena dua na rumu lailai ena loma ni valenisoro oqo ka dauvagalalataki vakatabakidua ena veivosaki vata kei ira na iliuliu ni veimatanitu kei ira na nodra mata.

E taura tu na veiliutaki vakatui mai Japani o Emperor Meiji, ka a vakatokayacataki vua na valenisoro oqo mai na 1867 ki na 1912. E a dau gadreva raraba tu o koya me dau qaqaco vinaka tu ga o Japani ena kena itovo vakavanua kei na kena gumatuataki tikoga yani ki liu me yaco na nona vanua me dua na vanua bula rawati koya e vuravura.

Na isevu ni papitaiso e Japani a vakayacori ena 1902. Ena gauna oqo sa yacova e sivia na 120,000 na iwiliwili ni lewe ni Lotu e Japani. Sa tara talega e kea na Lotu e rua na valetabu, e dua e tiko e Tokyo ka dua mai Fukuoka.