Sa Vakaraitaki Raraba ni sa na Tara mai Manaus, e Brazil e Dua na Valetabu

Eratou sa vakaraitaka raraba na Mataveiliutaki Taumada ni sa na tara tiko e dua na valetabu mai Manaus, e Brazil, ena dua na ivola kivei ira na iliuliu ni matabete mai Brazil ena 23 ni Me, 2007.

Eratou vola vakaoqo na Mataveiliutaki Taumada ena ivola o ya “Keitou sa vakavinavinaka vakalevu vei ira na Yalododonu Edaidai ena vuku ni nodra gugumatua kei na yalodina, ka keitou sa vakamuduo ki na veivakalougatataki ena yaco mai vei ira ena kena sa mai tara na valetabu vou oqo.”

Ni sa tara oti, sa na yaco kina na Valetabu e Manaus mai Brazil me ikaono ni valetabu mai Brazil. Ena qai kacivaki ena dua na gauna mai muri na veiteki eso era na wili tiko ki na tikina ni valetabu oqo.

Me baleta na veivaletabu era sa laki tara volekata tiko na baravi ni ceva kei na tokalau kei Brazil, sa na gadrevi kina vei ira eso na lewenilotu era vakaitikotiko ena loma kei na vualiku kei Brazil me ra na lakova yani e sivia e dua na udolu na maile (1600 km) ki na valetabu ena voleka duadua vei ira.

“Keitou sa nuitaka tiko ni sai koya oqo e dua na veivakalougatataki kivei ira e vuqa na Yalododonu yalodina ena vanua oqo kei ira era gadreva na lakova na vanua yawa me ra laki taura kina na veivakalougatataki ni valetabu,” eratou kaya na Mataveiliutaki Taumada.

Ena gauna oqo sa veiqaravi tiko e vuravura raraba e rauta ni 124 na valetabu, ka ono era sa tara tiko ena gauna oqo ka ono tale era na vakarau tara, oqo e wili tiko kina na valetabu e Manaus.

Na isevu ni valetabu a tara ena vanua vaka-Latin Amerika a tara mai São Paulo, e Brazil, ena 1978, ena gauna se qai yacova walega kina na iwiliwili ni lewenilotu na 54,000. E a vakatulewa kina o Peresitedi Spencer W. Kimball (1895–1985) ena kena soqo ni vakasobuduru. E a qai vakatabuya tale o Peresitedi Gordon B. Hinckley na valetabu oqo mai São Paulo ena 2004 ni oti na kena vakavinakataki.

Ni mai cava na yabaki 2005 sa laki yacova sara na 928,926 na iwiliwili ni lewenilotu e Brazil, ka ra tiko talega kina e tolu tale na valetabu ena siti o Recife, Porto Alegre, vata kei Campinas. Na Valetabu mai Curitiba e Brazil, ka a tekivu tara ena 2005, e namaki tiko me na vakacavari ena yabaki ka tu mai.

Ena nona a veisiko walega oqo ki Curitiba, a yalataka kina vakaoqo vei ira na lewenilotu o Elder Russell M. Nelson ena Kuoramu ni iApositolo Le Tinikarua, “Kevaka ko sa na vakarautaki iko mo curuma na valetabu ka laki vakayacora na cakacakatabu vakalotu me baleti iko kei ira na nomu itubutubu qase taumada, ko sa na tara cake kina e dua na ivakadinadina ni cakacaka oqo, ka na sega ni ko rawata rawa mai na dua tale na sasaga tani.” A kaya talega kina o koya, “Ena rawarawa cake na kena tara e dua na valetabu mai na nodra vakarautaki na lewenilotu me ra curu ki na valetabu.”