Na iVakananumi nei Tata Gilberto
Ena gauna au sa tekivu vulica tiko kina na cakacakatabu vakalotu baleti ira na mate, au a vakauqeti sara vakalevu ena loloma levu nei watiqu baleti buna niu raica ni sa vakayacori na nona cakacakatabu vakalotu. A vakauqeti au sara vakalevu na ka oqo meu kilai ira mada na noqu itubutubu taumada. Mai na veiyabaki oqori, e vuqa vei ira na taciqu kei na ganequ lewenilotu, ka oka kina o ira era cakacaka tiko ena valenivolavola ni tuva kawa ka volekata tiko na noqu vale e Guadalajara, Mexico, era a vukei au meu vulica na kena cakacakataki na yacadra o ira na noqu itubutubu taumada.
Ena yabaki 1991 au a ciqoma kina na noqu veivakalougatataki vakapeteriaki kau a vakasalataki kina meu qarava na nodra cakacaka na noqu itubutubu taumada ka yalodina kina. Au sa inakinaki sara meu vakayacora, ka tekivu sara ena veivosaki ena veisiga kei rau na noqu itubutubu, ka rau sega tu ni lewe ni Lotu. Au dau vakataroga vakawasoma na itukutuku ni noqu matavuvale, ia e rawa walega ni tukuna vei au o tinaqu na veika e baleti rau walega o tukaqu kei buqu.
Ena dua na siga a tukuna vei au o tinaqu ni o Tata Gilberto, na taci tamaqu, a tauvi koya na mate ni uto. “Au kila ni na vinakata o koya mo drau na veivosaki mada,” a kaya o tinaqu. “E kila vinaka tu o koya na veika kece, ka na vakaraitaka vei iko o koya na itukutuku kece sara ni matavuvale.”
Ena gauna au a qiriti koya kina ena valenibula e davo tiko kina, a kaya mai o watina ni o tamaqu o ya e se ituvaki vakaca sara tu ga na nona bula ka sega ni rawa ni vosa mai. Au a vosa vakanuinui vinaka vua ka tukuna niu na masulaki rau kei na nona matavuvale.
Ena siga ka tarava au a qiri tale ki na valenibula o ya. Au kurabui ni sa sauma mai o tata Gilberto na talevoni.
“Tata Gilberto!” au kaya yani. “Au qiri tiko la yani meu tukuna niu a masulaki iko sara tiko vakabibi mo bula, kau lomani iko.”
“Vinaka vakalevu, Bibi,” a sauma mai. “Au sa yadra ena mataka nikua kau sa mamada sara. Na cava o sa vakayacora tiko.”
Au a tukuna sara vua niu gadreva tiko meu kilai ira na yacadra kece na noqu matavuvale ka ra tadu mai Arapea kei Lepanoni. A dina o tinaqu ni noqu tata oqo e kila vakavinaka tu na veika kece. E kila vakavinaka tu o koya na yacadra na tamata, veitikinisiga, kei na veivanua me baleta na itabatamata e va ni matavuvale ena yasana nei tamaqu.
Ena gauna au sa biuta kina ki ra na talevoni, au sa vakila ni sai koya beka o ya na iotioti ni gauna me keirau na veivosaki kina ena bula oqo. Au a dina sara. Ia sa vakalougatataki keirau na Turaga me rawa kina niu taura na itukutuku au gadreva meu vakacokotaka kina na noqu matavuvale—ena bula oqo kei na veigauna tawamudu.