Vakasama

iTukutuku ni Mataveiliutaki Taumada

Na Liaona e sa vukea vakalevu na nodra bula na tamata me vakataucokotaki. Sa sega ni rawa me na vakawaleni na nodratou iTukutuku na Mataveiliutaki Taumada mai vua ga e dua ga na tamata sa rawa ka vinakata tu o koya me na bula vinaka. Na nodratou iTukutuku na Mataveiliutaki Taumada e a vukei au meu cokonaka vakavinaka kina na noqu bula. E dina ga niu sega ni volia rawa e dua na ilavelave ni Liaona, ilavelave yadua au sa bau wilika rawa sa vukei au meu tamata vinaka cake sara.

Abraham Adaranijo, Canada

iVunau ena iVunau

Ena gauna au sa voleka kina ni papitaisotaki meu lewena na Lotu, au se bera mada ga ni kila vakavinaka na kosipeli, ia ena noqu a mai wilika rawa kina na Liaona, sa yaco kina meu kila na veika sa tuvanaki tu kina mai na ivunau ena ivunau. Au sa vakauqeti ena veika era wasea vei au o ira na tamata eso me baleta na nodra bula sotava. Vinaka vakalevu na tabaka vakaivola tiko mai na veika vinaka e tokona tiko na ivakavuvuli ni kosipeli.

Federico G. Balut Jr., Philippines

Na Sala Era Bulataka Dina Tiko Kina na Tamata na Kosipeli

Sa qai dua na veivakalougatataki totoka ka vinaka o ya me tiko ena loma ni noda vuvale kei na valenivola na Liaona, me da wilika kina ena noda gauna vakarautaki vakayalo kei na gauna galala. Au taleitaka dina na kedra italanoa totoka na tamata ena nodra dui bulataka na kosipeli ena nodra dui vanua. Na ka oqo e vakaduavatataki keda. E vakayaloqaqataki keda na kena vo me da kakua ni rere, ka sa vakadeitaka vei keda ni da sega ni tiko vakai keda ga.

Elsie Castillo, Ecuador

Vakayaloqaqataki Me Lesu

Niu se gone, au sa sega tu ni laki Lotu, ia niu sa tubu cake au sa nanuma meu sa lesu. Ni bera niu vakatulewa ena ka bibi oqo, au a masu ka tugana ki lomaqu se cava mada na ibalebale ni lesu ki Lotu kei na kena ilesilesi e lakovata kaya.

Sai koya oqori na gauna au sa nanuma kina meu wilika eso na ilavelave makawa ni Liaona. Au sa tekivu wiliwili meu raica kina na italanoa eso me na vakayaloqaqataki au ka vaqaqacotaka na noqu gadreva meu lesu ki lotu.

Ena noqu wilika na veika era sotava na tamata me vaka na kena a yaco vei au, au a vakayaloqaqataki cake kina vakalevu. Me kena iusutu, e a vukei au na veivosa era tu kina meu kila vakavinaka kina ni sega ni dua e tiko ena lotu e sega ni dodonu tu ga ka sa tu na noqu malumalumu ka noqu itavi meu sa cakava e dua na ka me vakadodonutaki kina na veika au cakava tiko.

Au sa lesu tale mai ki lotu ena gauna oqo. Au sa kila kina ni soqoni era se vaka tikoga na kena ivakarau e liu, ia oqo sa savasava sara na noqu rai, sa baleta talega na noqu raica na veivakasama au a wilika ena Liaona me baleta na marautaki ni kalasi kei na soqoni ni sakaramede.

Ena veigauna au dau wilika kina na Liaona, au sa dau vakacegu niu kunea na isau ni noqu vakatataro.

María Pilar Santana, Dominican Republic

Nona Vosa na Noda Parofita Lomani

Au gadreva meu vakavinavinakataki kemuni ena nomuni vakauta tikoga mai vei au na mekesini na Liaona ena kena gauna. Au sa yabaki 93 oqo. Vakatekivu mai na siga au a papitaiso ka vakadeitaki kina, au sa taura tiko mai kina na mekesini. E a ivola lailai toka ga e liu ia a taleitaki sara. Au marautaka vakalevu na itukutuku era volai tu ena mekesini; ia, au maqusa ga ena wilika na vosa ni noda parofita lomani. Sa dua na ka totoka me da rogoci koya me vosa vakarua vei keda ena loma ni dua na yabaki ena gauna ni koniferedi raraba.

Lydia Dominguez, USA