Na Veivakaitokanitaki
Tubu ena Vakabauta—Yondonjamts mai Ulaanbaatar, e Mongolia
E a sega ni vakatarai vei ira na daukaulotu ni Lotu i Jisu Karisito ni Yalododonu Edaidai me ra vakavulica na kosipeli vei ira na lewenivanua mai Mongolia me yacova sara na yabaki 1993. Ena lawa vakomunisi mai na veiyabaki 1920 ki na 1990, era a sega ni vakatarai na kai Mongolia me ra lotu ena dua na matalotu. Edaidai eratou sa vakavinavinakataka ni ratou sa lewena na Lotu o Yondonjamts na cauravou lailai yabaki 10, kei Bayartsengel, na tamana; kei Gantsetseg, na tinana; o Monkhsaihan, na tacina, yabaki 14; kei Bolor-Erdene, na ganena yabaki 16.
Masu ena Yalodina, Papitaiso, kei na Matabete
Ena gauna e se bera kina ni papitaiso ka vakadeitaki o Yondonjamts, a masu sara vagumatua o koya me na lewena talega o tamana na Lotu. Sa dua na ka na nona vakavinavinaka ni sa vinakata o tamana me papitaiso. Ni sa papitaiso ka vakadeitaki oti o koya, sa kila deivaki kina o Yondonjamts ni sa ka bibi vua me vakarautaki koya me vakatikori me dua na dikoni ena Matabete i Eroni. Sa ka bibi talega vei tamana me na ciqoma na matabete. Sa dau masu sara vakavuqa ena yalodina na cauravou oqo me na ciqoma talega o tamana na matabete, a yaco dina. Era kaya kece na lewe ni nona matavuvale ni o Yondonjamts e cauravou yalodina ka kila vakavinaka tu na bibi ni masu.
Matavuvale Tawamudu
Ni oti toka ga e dua na yabaki ni sa papitaiso ka vakadeitaki oti o tamana, eratou a lako yani ki na Valetabu e Hong Kong China. Sa marau sara kina vakalevu o Yondonjamts ni ratou sa mai vauci vakamatavuvale ena valetabu me rawa kina ni laki tawamudu na nodratou matavuvale. Ena nodratou a tiko ena valetabu, a kerea kina o koya e dua na yaca ni yalewa me biu ki na yacadra na tamata me ra masulaki mai vei ira era tiko ena valetabu. E a leqataka vakalevu o koya na yavai koya na yalewa o ya e mavoa tiko, ka sa marau sara kina o koya ni sa bula vinaka na yalewa o ya.
Na Veika E Dau Taleitaka Me Vakayacora
-
Qito basiketepolo.
-
Droini.
-
Dau caka matakau daramaki ena liga.
-
Laki lotu.
-
Kania na supu raisi kei na vua ni vaini (grapes).
-
Sikova na tokalau ni siti oya.
Koronivuli
E kalasi va, ka dau taleitaka o Yondonjamts na vika kei na origami (lobiki na pepa ena veimataqali ibulibuli eso). E vulica tiko o koya na vosa Vakavalagi kei na vosa vaka-Mongolia e koronivuli. E ivola taleitaki duadua vua The Happy Prince mai vei Oscar Wilde. E kaya o tinana ni gone vuku o koya ka dau talairawarawa. E lima walega na miniti na nona taubale me yaco yani ki koronivuli.
Lotu Vakamatavuvale
Ena gauna ni lotu vakamatavuvale, eratou dau wilika na nona matavuvale na ivolanikalou, dramataka e dua na italanoa, lagalagasere, veitarogitaki ni itukutuku makawa ni Lotu, ka kania na veikakana vivinaka era vakarautaka mai. E dau taleitaka o Yondonjamts na wilika na iVola i Momani me baleti Alama ni masulaka na luvena me kila na ka dina ka veivutuni. E taleitaka o Yondonjamts ni a yaco dina me laki veivutuni ka veisautaka na nona bula o Alama Lailai (raica na Mosaia 27:8–31).
Vakavakarau ki na Kaulotu
E gadreva tu o Yondonjamts me na laki kaulotu ena dua na siga. E sa vakavakarau tiko me dua na daukaulotu o koya ena nona daumasu, wilika na ivolanikalou, lakova na soqoni ni Lotu, ka saga vagumatua tiko me yalodina ka ivalavala dodonu. Sa vulica tale tikoga na taba piano. Ena vuku ga ni draki mai Mongolia e dau batabata sara ena kena gauna, e gadreva kina o koya me na laki kaulotu ga e Awai.
Evei na Vanua e Vuravura e Tiko Kina o Ulaanbaatar mai Mongolia?
Na matanitu o Mongolia e dua na vanua veiulunivanua e tiko ena kedrau maliwa o Jaina kei Rusia. E kena koroturaga o Ulaanbaatar.
Lalai
E taura e rauta ni 20 na miniti na vodo basi me yaco ki na Tabana o Bayanzurkh. Ena Lalai, e taleitaka sara o Yondonjamts na lagasere ka vakarorogo ki na ivakatagi se serenilotu. E dau taleitaka talega na gauna ni veiwasei.