E Vakamacalataka o Dauniveikamakawa ni Lotu na iNaki ni iTukutuku Makawa ena iLesilesi ni Lotu

E kaya o Elder Marlin K. Jensen ena Vitusagavulu ni inaki bibi ni Tabacakacaka ni Matavuvale kei na iTukutuku Makawa ni Lotu, o ya “me vukei ira na luve ni Kalou me ra vakayacora ka bulataka na nodra veiyalayalati tabu,” e dua na lewa vakaivolanikalou a soli vua na Parofita o Josefa Simici ena gauna a se qai tekivu walega kina na Lotu.

Ena nona a vosa ena koniferedi vakayabaki ni iSoqosoqo ni iTukutuku Makawa Vakamomani ena ika 26 ni Me, 2007, o Elder Jensen, ka a vakatokai me dauniveikamakawa ka rekoda ni Lotu ena Epereli ni 2005, a vakamacalataka kina vakamatata na itekitekivu ni tabana ni veikamakawa kei na nodra cau e vuqa vei ira na iliuliu ka ra ciqoma sara vakabibi na ivakaro ni Turaga ka a solia mai ena siga a tauyavutaki kina na Lotu o ya me ra dau volaitukutukutaka na cakacaka kece ni Lotu.

“Au sega ni vosa tiko me vaka e dua na kenadau ena veika makawa, ia ena vuku ga niu dauniveikamakawa ena ‘Lotu’, me vaka ga niu dua vei ira na iwiliwili levu ni vakaitutu raraba ena Lotu sa kacivi meu cakava na noqu ilesilesi ena kena gauna ga kau sa kacivi kina mai na dua na ivakatakila a soli vei Parofita Josefa Simici,” a kaya o koya.

Na veika sa rawata rawa na tabana oqo, a tomana tale o koya, e muataki tikoga ki na kena vakasoqoni, maroroi, kei na kena dau tabaki talega vakaivola na itukutuku veivakayadrati eso e baleta na Lotu.

“Na cava beka na inaki bibi ni itukutuku makawa ni Lotu?” e taroga o koya. “Ena gauna oqo sa yaco na Lotu me dua na mataisoqosoqo levu e vuravura ka sa mua tikoga na kena yavu vakayalo ki na veivanua ena ceva kei vuravura. Na dina oqo kei na kena tale eso sa vakadeitaka tiko vei keda ni sa sega ni rawa me da rai vakatabakidua tikoga ki na kena vakayacori tikoga na iwalewale taumada ni kena qaravi na veika makawa.”

Ni mai cava na kena masulaki ka vakasamataki tiko mai ena vica na yabaki sa oti na sala me na taurivaki me na veiqaravi kina na tabana ni veika makawa, e kaya kina o Elder Jensen, “keimami sa vakabauta ni itukutuku makawa ena rawa me na veiqaravi ki na ilesilesi raraba ni Lotu, … ki na nodra vakabulai na kawatamata.”

E sa raica rawa kina o Elder Jensen ni dua na ituvatuva vakaoqo ena duatani kina na ilesilesi ni Tabacakacaka ni Matavuvale kei na iTukutuku Makawa ni Lotu mai vei ira na mataisoqosoqo kei na dauniveikamakawa kilai levu tale eso.

“Oqo e dua na sasaga vakaturaga ka cecere, ka sega ni dau rawati vakarawarawa ka sega talega ni dau tokoni sara vakalevu mai vei ira na noda eda veiliutaki vata tiko,” e kaya o koya.

Ena kena gadrevi me rawati rawa na ituvatuva oqo, a tomana o koya, e sai rai tiko vakatabakidua na Tabacakacaka ni Matavuvale kei na iTukutuku Makawa ni Lotu ki na tolu na ituvatuva bibi: o ya me na dau vakamareqeti tikoga na veika cecere ni Kalou, me maroroi vakavinaka tu na ituvatuva sa vakatakilai mai me baleta na matanitu ni Kalou, ka ivakadinadina ka dau taqomaka na dina ni Vakalesuimai.

Na inakinaki bibi oqo ena “vakamatatataka kina na noda cakacaka kei ira sa baleti ira,” ka yaco kina “me sa dua na cakacaka cecere cake mai na kena eda na rawata vakaikeda ga—ka sa qai yaga kina na cakacaka vata,” e kaya o Elder Jensen. Oqo ena “kauti keda tani mai na dua wale tu ga na dau tomi veika makawa ka yaco me dua na mataisoqosoqo qaqa ka vakatabakiduataki koya ena kena vakasokomuni, rai vakararaba, kei na vakadidike, vata kei na vola itukutuku.”

Na kena dau tauyavutaki e dua na tabacakacaka me qarava na Lotu e vuravura taucoko ena gadrevi kina na veisau ni rai ka na tiko kina na solibula, e kaya o koya. Na veisau vakaoqo ena gadrevi kina na kena vakatabakiduataki na nodra qaravi na lewe ni Lotu raraba kece sara ka vakakina vei ira na iliuliu. Na veisau kece oqo e dodonu me na taurivaka kina na gacagaca ni tekinolaji kece sara.

E dua tale na ikalawa ni kena vakatorocaketaki na tabacakacaka ni veikamakawa sai koya na kena tara e dua na valelevu ka 250,000 na sukwea fute (23,000 na sukwea mita) na kena levu me na vakatokai me Valenivola ni iTukutuku Makawa ni Lotu.

“E a vakayacori na kena vakasobuduru ena Okotova sa oti ka sa toso vinaka tiko na kena tara ka sa na vakatabui tiko ena loma ni yabaki 2009. Ena tiko ena loma ni valenivola oqo na veiyaya kei na itukutuku makawa talei ka sa nanumi tiko me na baleta na tamata raraba, veivakauqeti, ka mana sara vakainaki,” e kaya o Elder Jensen.

Lavetaki mai na Church News, 2 ni June, 2007.