Na iSolisoli me Rai na Mata mai vei Ira na Vuniwai ni YDE

E a sotava na dredre ni bula o Blendina Muca ena gauna e se qai tubu cake tiko mai kina ena vuku ni reva ni matana se matareva. Ni oti e vica vata na yabaki ni kena sele ka sega ni vinaka rawa ena nona vanua mai Albania, e a laki kere veivuke o koya vua e dua na vuniwai kai Amerika ka a lako yani vakaveivuke raraba ki na nona vanua.

“Niu se gone ga sa reva tiko mai na mataqu,” a kaya o Ms. Muca. “A vakauti au o tamaqu ki na dua na vuniwai, ka a solia mai vei au e dua na kena isui kei na dua na matailoilo… . E a sega ni vakavinakataka na mataqu—ka ca sara vakalevu—ia au sa dau lako voli ga ena vakabauta ni na yaco me na vinaka na mataqu.”

E dina ga ni sega ni dau rai vakavinaka, e a rawata rawa o goneyalewa ni Alabania oqo me dua na dauculacula saumi, ka yaco me dua e mesamesa ni cakacaka oqo.

Ena gauna sa lewena kina na Lotu na taci Ms. Muca, sa tadola kina e dua na kalougata kivei koya na goneyalewa tauvimate ni mata oqo. E a sureti o Ms. Luca mai vei rau na daukaulotu ni veivuke raraba ka rau a tiko ena papitaiso o ya me lako yani ki na dua na veiqaravi raraba vaka- vuniwai ni YDE ka ra veiqaravi tiko kina o ira na vuniwai ni mata mai Amerika.

E dua na vuniwai ni mata o Dr. Rick Olson, ka veiqaravi tiko ena Univesiti e Iowa, a seleta na matai Ms. Muca. Ni bera na veisele o ya, eratou a cabora e dua na masu o koya na goneyalewa tauvimate oqo, o tacina, kei ira na itokani vata kei Dr. Olson.

“E a kerea na vuniwai vua na Kalou me vakadaumakataka na ligana me rawa ni vakavinakataka kina na mataqu,” e kaya vakaoqori o Ms. Muca, “a qai rogoci koya na Kalou. Au a vakadeitaka kina ni sa caka mana vei au na Kalou.”

Na isolisoli oqo me rai na mata—ena kena vakavinakataki na rai ni mata, na misini e vakayagataki wale kina, kei ira era veiqaravi kina—era sa vukei kina o ira na veimatanitu sega ni rawati ira ena veiqaravi loloma ni Veivuke ni Lotu ki na Veika ni Bula Raraba.

E liutaka tiko o Dr. George Pingree, e dua na vuniwai vakacegu ni mata mai Salt Lake City, na kena cicivaki na veiqaravi raraba oqo e vuravura ka ra vakaitavi tiko ena parokaramu oqo e sivia ni 200 na vuniwai era sega ni saumi.

“E sivia tiko e 40 na milioni na tamata era mataboko e vuravura taucoko,” e vakamacalataka o Dr. Pingree, “ka vuqa vei ira era matasaila, matasara, se na veimate tale eso ni mata ka rawa ni vakavinakataki”

Era na dau vakatulewa tiko na iliuliu ni Lotu kei ira na daukaulotu ni veivuke raraba ni veika vakamatatamata na kena vinakati e dua na veivuke vakaoqo ena veimatanitu era sega tu ni rawati ira, e vakamacalataka o Dean Walker, na manidia ni veivakatorocaketaki ni bula ena Veiqaravi ni Lotu ki na Veika Vakamatatamata.

“Me na dau vakau yani na ivola kerekere, ka keimami na qai tuvanaka e dua na veiqaravi me vakayacori rawa kina na gagadre ni vanua o ya,” e tomana o Baraca Walker. “Keimami rawa ni qarava e 10 ki na 15 na veivuke vakaoqo ena dua na yabaki—ena nodra vakasalataki o ira na daucakacaka vakavuniwai ena veika vakaivakarau kei na kena iwalewale tudei ka yaco kina me ra rai rawa e vuqa na tamata.”

Sa mai rai vakavinaka cake sara o Ms. Muca ni oti na nona sele o ya. E kaya o koya: “Sa noqu gagadre meu laki vuli ki na univesiti ka vukei ira era vakaleqai tu—meu vukei ira na tamata ena sala vata ga a vukei au kina na Kalou. Se yaco tikoga na Cakamana.”