Vakasama ni lotu vakamatavuvale

Na ivakavuvuli sa vakatututaki tiko oqo sa rawa me na vakayagataki ena gauna ni kalasi ka vakakina ena vuvale. Sa rawa mo taurivaka na veivakasama veiganiti oqo me baleta na nomu matavuvale se nomu kalasi.

“Lako mai ki na Valetabu,” t. 14: Ni ko sa vakayagataka na vosa oqo, mo qai vola na veicakacakatabu vakalotu e dau vakayacori ena valetabu, ka me veivosakitaki na veivakalougatataki ni sokalou ena valetabu. Wasea na veivakasama eso ni vakavakarau ni curu ki na valetabu.

“Vosota Tiko Mai na iVakatekivu,” t. 29: Vakarautaka na kakana taleitaki ni nomudou matavuvale. Biuta toka me rawa ni ratou raica se boica rawa na nomu matavuvale. Vakamacalataka vei iratou ni dina ga ni ratou sa na via kania ena gauna o ya, me ratou na wawa mada ga vakalailai. Mo qai wasea sara na italanoa kei Maria. Vakatautauvatataka na kena waraki tiko me laukana na kakana totoka o ya vata kei na nona sa gadrevi o Maria me na waraka na gauna me na papitaiso ka vakadeitaki kina.

“Me Nomu iSakisaki,” t. 32: Ni vo e dua na macawa, sureti ira na lewe ni matavuvale yadua me ra vakarautaka e dua na vosa lekaleka me baleta e dua na ivakatagedegede mai na Me iSakisaki ni iTabagone. Me wasei na veivosa kece oqori, ka mo qai digitaka e dua se rua na ivakatagedegede oqori me cakacaka vata kina na matavuvale ena macawa o ya.

“Na Qiqi Lala,” t. T2: Ni bera ni tekivu na lesoni, vola na yacadra yadua na lewe ni matavuvale ena yadua na tikini pepa lalai. Wasea na italanoa nei Peresitedi James E. Faust, ka me qai veivosakitaki na veitaro ena itinitini ni vosa. Sa oti o ya me ra qai digia na lewe ni matavuvale e yadua na tiki ni pepa lalai. Mo qai vakamacalataka me ra qai vakasamataka toka na sala eso era na cakava kina vakai ira ga e dua na veiqaravi ki vua na tamata e volai tiko na yacana ena tiki ni pepa e tiko e ligana.

“Ko Michael Ka Yali Tiko,” t. T12: Wilika na kena italanoa, ka me veivosakitaki na sala a vukea kina na ganena o Natalie. Me ra qai raica na lewe ni matavuvale na 1 Joni 4:21. Me qai veivosakitaki na ibalebale ni “lomana na tacina.” Sa rawa mo vukei ira na gone era lewe ni matavuvale me ra vola e dua na veisureti vua e dua e sega tiko ni mai lotu. Sa rawa talega me ra sureti koya na tamata o ya ki na soqoni ni Lalai se ki na itaviqaravi ni Lalai e tarava.