Mai Rogoca na Domona E Dua na Parofita

Na Qiqi Lala

Mai Vei Peresitedi James E. Faust

iKarua ni Daunivakasala ena Mataveiliutaki Taumada

Ena vica na yabaki sa oti era a vakayacora e dua na veivuke raraba ni veivakani e dua na kuoramu ni bete. E maqusa sara o Jimi e dua vei ira na bete, ni sa vakaitavi kina ka sa saga me na kauta na kakana e levu duadua. Sa yaco mai na gauna me ra laki sota ki valenilotu na bete. Era gole kece yani ena duavata ga na gauna ka lokuci na gauna ni lesu mai ena yakavi. Era kurabui ni lala tu mai na qiqi nei Jimi. E sega sara ni vosa, ka so na cauravou era a dredrevaki koya. Ni raica na ka oqo o nodra daunivakasala ka kila ni dau taleitaka o Jimi na motoka, a kaya sara, “Gole mada mai ki tuba, Jimi. Mai raica mada na noqu motoka. E sa vakalomaleqataki au tiko.”

Ni rau sa tu e tuba, a tarogi Jimi o daunivakasala kevaka e rarawataka e dua na ka. E kaya mai o Jimi, “E sega. Ia au a laki kau kakana mai, ka levu sara. E sinai na noqu qiqi. Niu sa lesu tiko mai ki valenilotu, au a lako sara ki na dua na vale ni marama dawai e sega ni lewenilotu ka tiko e loma ni noda tabanalevu. Au tukituki ka vakamacalataka na veika eda cakava tiko, ka sureti au o koya meu curu ki loma. E a vakaraica na ka me solia vei au. E a dolava na bolaniwai liliwa kau raica ni lala didi tu. Era lala tu na kovate. E a qai raica rawa o koya e dua na kava tini vuanikau.

“Au sega vakadua ni vakabauta. Ni ra veiciciyaki tu e kea na gone ka ra gadrevi me ra vakani, ka sa mai solia o koya vei au e dua na tini vuanikau. Au taura ka biuta ena noqu qiqi kau gole mai ki gaunisala. E sivi vakalailai ga mai liu ni sa curumi au e dua na yalololoma kau sa kila meu sa na lesu tale ki na vale o ya. Au a qai solia kece vua na kakana.”

E a kaya o daunivakasala, “Jimi, kakua sara vakadua ni guilecava na veika e yaco vei iko nikua, oqori sara ga na veika e vinakati tiko.” E sa tovolea o Jimi na uto ni kakana ni veiqaravi ena loloma dina.

Mai na vosa ena koniferedi raraba ni Okotova 2006 .

Na veika me vakasamataki

1. Ena gauna sa curumi Jimi kina e dua na “yalololoma ” ka kila me na lesu tale, na cava beka o nanuma e sa yaco tiko vei Jimi?

2. A kaya o daunivakasala ni veika sa yaco oqo vei Jimi “sai koya sara ga na veika e vinakati tiko.” Na cava o nanuma e tukuna tiko o koya?

3. Na cava sara mada na ilesilesi nei Jimi ena nona laki vakasokomuni kakana vaka o ya? Na cava mada na inaki ni nona ilesilesi ni sa cava na siga o ya? Ena yaco rawa vakacava ki na nomu bula na ka oqo?

4. Na cava tale beka na nomu nanuma me baleta na ka a sotava o Jimi?