Vosota Tiko mai na iVakatekivu
E a taura e vitu na yabaki, ia sa yaga na noqu wawa toka.
O cei so na qasenivuli?” au taroga vakaoqo vei ira na noqu itokani ni keimami taubale tiko e gaunisala ena dua na mataka ni Vakarauwai ena vula o Feperueri 2000. Keimami a se qai yabaki 14 tiko kina.
“O ira o ya na noqu itokani ka ra sa mai cakacaka tiko oqo vaka e dua na daukaulotu,” a kaya. Keimami a sega ni bau talanoataka tu na veika ni lotu, e dina ga ni keimami veilomani vinaka sara. A kaya mai vei au o koya ni keimami sa lako tiko o ya ki na kalasi Vakavalagi ka ra veivakavulici tiko kina o ira na nona itokani ka ra sega ni saumi. Sa kila vinaka tu o koya niu na taleitaka sara baleta niu vuli tiko ena dua na koronivuli torocake Vakavalagi
Ena gauna keitou sa curu yani kina, au sa vakasarava sara na iyaloyalo era kabi tu e lalaga. Oqo beka e dua na valenilotu? E a sega ni rairai ni Lotu Ortohodox e Bulgaria, na kena au sa curu oti kina. E vuqa na tamata era kaya ni veilotu tale eso era lotu vakatani. Kei na gauna a se vakarururugi tu kina o Bulgaria ena lawa vakomunisi me yacova sara na 1989, era dau vakawabokotaki e kea na veivakabauta vakalotu, ka vuqa sara na tamata era vakabauta ni lotu e sega ni ka dodonu.
A tarogi au sara na noqu itokani oqo se’u bau vinakata tu meu laki lotu ena siga ka tarava. Au a vakadonuya sara, ena vuku ni noqu lomatarotaro tiko ka sega ni baleta me’u lotu. Au sa kila tu ni kevaka ena gole tiko o koya ena sega kina ni dua na kena leqa.
Sa tekivu sara meu laki lotu tiko. Au sa gadreva me’u kila na kena veivakavuvuli. Au sa via kila na vuna o ira na itabagone oqo ka tiko na nodra ivakatakilakila ni yaca me ra biuta mai na nodra vanua yawa me ra lako mai ki Bulgaria ka me ra mai veicurumaki tu kei na bula ni veicacati vakalotu ena vanua oqo. E dina ga ni’u sega tu ni lotu ena gauna o ya, e dua na ka a vakauqeti au tiko me’u lako tikoga ki na veiitavi qaravi ni Lotu. Au sa taleitaka dina na yalo ni veikauwaitaki e tu vei ira na daukaulotu kei na nodra matadredredre na lewenilotu.
Au sa laki veimaliwai vakavinaka sara kei ira na goneyalewa ena tabana o ya. Au qoroya vakalevu na nodra vakabauta kei na gagadre me ra qaravi ira na tani. Au nanuma tiko oqo na imatai ni gauna meu sa masu kina ena kalasi ni Goneyalewa. Au a se bera mada vakadua ni bau masu, kau sega tu ni kila na kaukauwa ni masu. Au se sega mada ni kila na veiwekani voleka kei na Tamada Vakalomalagi ena kauta mai na masu. Au a sega tu ni kila ni’u sa Luvena yalewa. Ni oti o ya au sa sega tale ni cegu ena noqu sa dau masu tikoga. Ena veigauna yadua meu vorata rawa kina e dua na leqa, au sa kila vakavinaka sara me’u sa na kerea ga na veidusimaki nei Tamada Vakalomalagi. Sa dau vakavuqa, meu dau tagi niu sa dau masu baleta ni’u dau vakila na veivakadeitaki ni Yalotabu vei au ni sa lomani au tiko na Turaga. Au sa tekivu meu nuitaka ga na Turaga.
Ena gauna era dau yaco mai kina na veitemaki ni bula vakaitabagone, sa tudei tu na noqu vakabauti Jisu Karisito, ka sa dau vakaukauwataki au me’u vorata rawa kina na veitemaki vaka o ya. Au sa raica rawa na sala e veitemaki kina o Setani vei ira na noqu icaba ena veika vakavuravura kei na veicala lalai ena laki yaco me calabibi. Sa ka dredre dina meu tudei tiko ena noqu bula vakaivakarau oqo, ia na noqu isema vua na Tamada Vakalomalagi ena noqu masumasu a vukei au meu drotani mai na veitemaki. Au sa vakadeitaka kina meu sa bula voli ga ena ivakavuvuli ni yavu ni veivakabulai. Au sa kila tu ka sega ni’u vakataratututaka ni’u na vakalougatataki dina ga ena dua na siga.
E ka ni rarawa, ni’u a sega ni lewena rawa na Lotu ena gauna o ya. Erau a sega sara ga ni vinakata na noqu itubutubu, vakabibi o tamaqu. Ia au sa vosoti koya. O irau na nona itubutubu erau a sega ni kauti koya ki lotu; e a susugi cake mai o koya ni donumaka na bula vakomunisi. Ia, au sa kila tu ni sa vakarautaka tu na Turaga e dua na sala me’u na lewena kina na Lotu ena dua na siga. Au sa kila tu mai ni siga o ya ena dredre sara. Ia au sa vulica rawa mai na ivolanikalou ni veika dredre sa vinaka talega ki na noda bula.
Au a lewena na semineri ka vakakina na inisitute, au dau lakova na itaviqaravi ni Lotu, kau sa tekivuna talega me’u cakava na noqu Torocake Yadudua. Au sa marautaka toka ni’u na lako ki na itaviqaravi ni Goneyalewa. Au na sega ni guilecava rawa na veigauna keimami dau vakasaqa kina, caka kadi se maka ni ivola, sauni na neimami rumu ni kalasi, se qito, ka vakakina na neimami bula veimaliwai vinaka. Na veiitaviqaravi yadua vakaoqo e a vukei au meu kila vakavinaka kina na kequ ituvaki vakalou kei na kequ inaki ena bula oqo.
E dua vei ira na itavi dredre ena Torocake Yadudua o ya na kena cavuqaqataki “Se Bula Na Karisito ”1 Niu dau raica na ka e volai tu kina, au dau kaya ni oqo sa dua na bolebole cecere meu cavuqaqataka. Ni oti toka e vica na macawa, au sa kila rawa tu na vuna e mai umani tiko kina na cakacaka o ya ena yavunilewa ni Vakabauta. Oqo e dua na vakatovolei ni vakabauta kei na dua na veitarogi e salavata mai na kena isau vivinaka. Na nodra ivakadinadina oqo na iApositolo a vukea na kena vaqaqacotaki na noqu vakabauta kei na ivakadinadina. Ena noqu tugana na nodra vosa veivakauqeti me baleta na nona bula kei na cakacaka na Karisito, sa yaco kina me’u tu ena yaloqaqa ka cavuta na noqu ivakadinadina vakai au me baleti Koya.
Ni sa voleka tiko me’u yabaki16, au a lako ena dua na itaviqaravi me baleta na cakacaka ni daukaulotu tudei. Keimami a wasewase vakayarurua ka keimami laki tiko me vaka e rua na daukaulotu me dua na macawa. O ya na imatai ni gauna meu kila kina na bibi ni kena dau wasei na ivakadinadina vei ira na tani. Na itaviqaravi o ya a vukei au meu kila kina ka sega walega na dredre ni qaravi ni cakacaka ni Turaga , ia na marau e tiko ena gauna ni wasei yani na kosipeli ka vakadinadinataka na kena sa veisau e dua na tamata mai na ivakavuvuli nei Karisito. A vukei au meu kila vakavinaka kina na ibalebale me da “vakadinadinataka na Kalou ena veigauna kecega, ena veika kecega kei na veivanua kecega” (Mosaia 18:9).
Me vaka ni ra sa dauvakatokai au tu meu “sega ni lewenilotu gugumatua,” au sa vulica rawa meu dauvosota ka nuidei tiko ni dua na siga au na yaco meu lewe ni Lotu. au sa kila tu ni o ya sa vakatovolei tiko kina na noqu vakabauta kei na noqu vosota. Au a vakasamataka se na vakacava beka na balavu ni gauna meu na vakasavasavataki kina ka tekivuna e dua na noqu bula vou.
E volekata na vitu na yabaki sa qai yaco mai na siga namaki o ya mai na gauna a kauti au kina o noqu itokani ki lotu ena mataka batabata o ya ni vula o Feperueri 2000. Au a papitaiso niu sa mai yabaki 21 ena itikotiko ni kaulotu e Sofia. Na siga ni noqu papitaiso sa qai dua dina na siga marautaki duadua ena noqu bula. Ena siga o ya au a vakila kina vei au na loloma veivakabulai cecere nei Tamada Vakalomalagi. Au a qai vakila vakalevu cake sara na loloma oqo niu sa mai vakaivotavota ena sakaramede ena siga ka tarava. Sa sega niu tarova rawa na wai ni mataqu. Na Yalotabu ka sa katakata tu kina na lomaqu sa tukuna tiko vei au ni sa ka yaga sara na noqu wawa o ya. Au sa qai mai tauca tu oqo na isolisoli ni Yalo Tabu kei na veivakalougatataki tale eso niu sa mai lewe ni Lotu.
Sa dua na ka na noqu vakavinavinaka niu sa mai vakalougatataki meu kila na kosipeli vakalesuimai. Au kila ni sa rawa me da vorata rawa na veika dredre ni bula oqo mai na noda vakabauta kei na vosota. Sa sega tale ni dua na madigi donu e cecere cake se veivakalougatataki cake vakalevu me vakataka na noda sa lewena na Lotu dina ena vuravura oqo. E sega tale ni dua na ka ena kauta mai na marau e cecere cake me vakataka na noda sa kila ni da sa lewe ni Lotu bula kilikili, ni da na bula vata tale kei na Kalou.