Өчүүхэн бөгөөд энгийн зүйлс

2010

2010 оны Зургадугаар сар

Өчүүхэн бөгөөд энгийн зүйлс

“Өчүүхэн бөгөөд энгийн зүйлсээр агуу зүйлүүд улиран авчрагддаг” (Aлма 37:6).

Гэр бүлийн харилцааг хэрхэн сайжруулах вэ?

Хоолны цаг, судар судлах, гэр бүлийн үдэш зэрэг гэр бүлээрээ хамтдаа цугларсан үйл ажиллагааг эхлэхийн өмнө цахилгаан тоног төхөөрөмжүүдээ унтраах юм уу холдуул.
Өдөр бүр доод тал нь нэг удаа хамтдаа сууж хоолло.
Тогтмол хийх гэр бүлийн үйл ажиллагаануудыг төлөвлө. Үйл ажиллагаа нүсэр байх ёсгүй. Өдрийн зугаалгаар явж, салхинд алхаж эсвэл хамтдаа тоглоом тогло.
Хүн бүрийн сэтгэгдэл эсвэл асуудлыг авч хэлэлцэх гэр бүлийн зөвлөгөөн хэлэлцүүлэг хий. Бие биеэ шүүмжилж, үглэж зэмлэлгүй анхааралтай сонс, яриаг нь бүү тасал.

Та нар цагаа хэрхэн өнгөрөөдөг вэ?

Хоног 24 цагтай. Магадгүй та нар энэ цагийн ихэнхийг унтаж, ажиллаж (эсвэл суралцаж) өнгөрөөдөг байх. Гэвч өдөрт цөөхөн цагийг өөр үйл ажиллагаанд зарцуулж болно. Та хоногийн хэдэн цагийг зурагт үзэж, интернэтээр хэсч өнгөрөөдөг вэ? Хэрэв та нар өдөр бүр зөвхөн ганц цагийг дараах санаануудын нэгийг хийхэд зориулах юм бол хэчнээн олон зорилго, төсөл, даалгаврыг нэг долоо хоногт, нэг сард, нэг жилд гүйцэтгэж болох вэ?

Судруудыг унших эсвэл судрын заавал мэдэх ёстой шүлгүүдийг цээжлэх.
Спортоор хичээллэх эсвэл дасгал хийх.
Шинэ сонирхол эсвэл авьяасаа хөгжүүлэхэд суралцах. Үүнд: хоол хийх, дуулах, оёх, цэцэрлэгжүүлэх ажил хийх эсвэл ямар нэгэн хөгжмийн зэмсэг эзэмших гэх мэт.
Гэр бүлийн үдэшт оролцох эсвэл гэр бүлтэйгээ цагийг хамт өнгөрөөх.
Зөв сайн ном унших.
Тойрог эсвэл салбараас тань бүрэн цагийн номлолд үйлчилж байгаа номлогчийг урамшуулсан захидал бичих.
Гадаад хэл сурах.
Гэр бүлийн түүхийн ажил хийх.
Гэрийн болон айлчлагч багшаар явах.
Сүмийн дуудлагат ажлаа хийх.
Тэмдэглэл хөтлөх.

Гэрчлэлээ нэмэгдүүлэх нь

Есүс Христийн тухай гэрчлэлээ нэмэгдүүлэхийг хичээх тусам энгийн зүйлсийг тогтмол хийх нь гэрчлэлийг минь өсгөж буйг би олж мэдсэн. Учир нь би залбирах, сүмдээ явах, Мормоны Ном унших, Христийн гэрчлэгч болон зогсохыг хичээх бүрд Аврагчийн тухай гэрчлэл маань өссөөр байдаг.

Саад бэрхшээл, асуудлууд үргэлж оршсоор байдаг хэдий ч, сонгох замыг маань заагч Ариун Сүнсний шивнээг сонссоноор учирч болох аюулаас би зайлсхийж чадсаар ирсэн.

Би Сүмийн удирдагчдын зөвлөгөөг дагаснаар гэрчлэл маань өсч буйг мэдэрч, Тэнгэр дэх Эцэгтэйгээ улам ойр болж байгаагаа мэддэг.

Енг Содави, Камбож

Дээд, зүүн талд: Жон Олу Фаосекегийн зураг; зургийг Maтай Реиер; зургийн чимэглэлийг Бет M.Виттакер; дээд, баруун талд: дэвсгэр © Getty Images; Deseret News-ийн зураг; зургийг Чад Е.Фэйрс