O Le Taliina O Se Tatalo o le Kerisimasi
“Ma o le a manatua foi e le Alii tatalo a e amiotonu, ia sa tuuina atu ia te ia mo i latou” (Mamona 5:21).
Sa ala a’e Peggy i le taeao o le Kerisimasi. Sa fiafia o ia e maua se meataalo fou manaia ma ai i se taumafataga o le Kerisimasi. Ae a o fetilotilofa’i solo o ia, sa ia iloaina o le a ese lenei tausaga. E ui ina sa galue malosi lona tama, ae sa le lava ni tupe mo lona aiga.
Sa leai ni faailo o se taumafataga o loma o le Kerisimasi. Sa leai ni mea i luga o ipu e tuu ai fualaau faisua, ma sa leai ni meaai i le pusaaisa.
Sa savavali atu Peggy ma lona tuagane o, Malcolm, i le faitotoa o le potumoe o o la matua ma vaaia ai i laua o tootutuli i talaane o le la moega. Sa la faalogologo ma le fifilemu a o tatalo Tina ma Tama i le Tama Faalelagi e fesoasoani ia maua e le aiga ni meaai.
“Sau,” o le tala lea a Peggy ia Malcolm. “Ta o i fafo.”
Sa o i fafo Peggy ma Malcolm ma tau mai ni laugasese vao sa ola i aufata o le faatoaga. Atonu o le a leai ni meataalo i lenei tausaga, ae e mafai lava ona la faia lo latou fale ia lagona e pei o le Kerisimasi.
Sa la lagona le fiafia ina ua uma ona la teuina lo latou fale i laugasese lanumeamata, ae sa leai lava se faailo o ni meaai.
“O le a saunia e le Alii,” o tala lea a Tina.“Ia ta o e faatulaga le laulau.”
Sa tuu e tama ipumafolafola i luga o le laulau ae seti e Tina ia tui ma sipuni.
Sa fetilotilofa’i tamaiti i le tasi ma le isi ma le le mautonu i o la foliga. Sa saunia le laulau, ae sa leai lava ni meaai. Sa le umi ae te’a atu le taimi o le malutaeao, ae latalata mai le ‘aiga o le aoauli. Sa mafai ona lagona e Peggy ni nai gogolo o le fiaai. Sa mafaufau o ia pe o le a faapefea ona maua e lona aiga ni meaai.
Sa minoi vae o le uati i le 12:00, soo ai ma le 12:30, ma le 12:45. Sa leai lava se mea. Ona faalogoina lea e Peggy se tu’itu’i i le faitotoa.
Sa nanati atu o ia e tatala le faitotoa ma sa faateia i le vaaia ai o le aiga o Kirk o tutu mai iina. Sa latou uuina mai se fasipuaa ta’o, falaoa, moa, salati, ma meaai suamalie. Sa matuai le talitonu Peggy i le mea sa ia vaaia.
“Sa matou saofafai e sauni e fai le matou meaai o le Kerisimasi ae matou mafaufau mai loa ia outou,” o le tala lea a Brother Kirk. “Matou te faamoemoe o le a outou faaaogaina nei meaai.”
Sa lulu e Tama le lima o Brother Kirk, ae amata ona tuu e Tina ia meaai i luga o le laulau o le umukuka. Sa i ai pea le lagona faateia o Peggy. Sa tilotilo atu o ia ma ni mata lapopoa ia Tina ma Tama, ae sa foliga mai sa la iloaina lava e tupu lenei mea.
Sa iloa e Peggy na sa’o le lagona sa ia maua i le taeao. O le Kerisimasi lenei sa ese lava. O le Kerisimasi lenei sa ia aoaoina ai e faafofoga ma tali mai le Tama Faalelagi i tatalo. Ma o le meaalofa sili lena e mafai ona ia mauaina.
Ata na tusia e Brad Teare