Teuteu o le Kerisimasi, Uo FaaKeriso
O le saunia ai e teu la matou laau Kerisimasi, sa ou la’uina mai ai i fafo se atigipusa sa tumu i mea teuteu o le Kerisimasi ou te le’i vaai i ai pe faaaogaina i ni nai tausaga. A o o’u lagaina moli Kerisimasi ma ie, sa ou tau ai i se atigipusa sa afifi na tumu i teuteu o le Kerisimasi sa ou faaputuina a o ou nofotoatasi ma faiaoga i se aoga. Sa ou tau ai i se teuteu lanutasi, na suiina faafaakoluse lea sa na ona faapea mai “Faletatala o le Kerisimasi—1984.” Sa toe foi lo’u mafaufau i tua i lena tausaga. Ou te le’i faaipoipo ma sa ou siitia mai ma le popole mai se uarota o le autalavou nofofua matutua i se uarota o aiga.
Ou te fiafia lava i le vaitau o le Kerisimasi, ae o nisi o vaitau mo a’u sa matuai tuua toatasi lava. O lo’u matua sa i ai o le 30 ma ona tupu, nofotoatasi, ma le leai o se fanau, sa ou lagonaina ai i nisi taimi le tuulafoaiina. Sa faigofie ia te a’u lo’u popole faanoanoa mo a’u lava, i le pau atu i tua i le mea sa ou ta’ua o le “faamai o le talofa e ia ta ita.” O lena tausaga faapitoa, 1984, ou te manatua lou faia ai o se filifiliga malamalama lelei ia faatoilalo le faama’i, ia ou vaai i tua atu o a’u lava ma vaai po o le a se mea e mafai ona ou faia ia avea ai le Kerisimasi o se mea fiafia mo isi.
Sa fai si o’u fou i le uarota ma sa ou manatu faapea o le tatalaina o lo’u potu mautotogi faatauvaa i le Aualofa o le a fesoasoani ia te a’u e faamanatu ai aso fiafia ma faamasani lelei ai ma isi uso.
A o ou talanoa e uiga i lena faletatala, sa ou manatua ai le tamai laau Kerisimasi sa teuteuina i la’u pusa o teuteu, o le manogi o kuki manutinuti sa fesoasoani mai a’u uo nofofua e tao, ma le manogi suamalie o le “vaiinu pa’epa’e o le Kerisimasi” a Tina lea sa ou tufaina atu i malo.
A o ou iloiloina ituaiga eseese o teuteu, sa faatumulia lo’u loto i lagona mafanafana o le alofa ma le agaga faafetai, a o ou mafaufau i le toatele o uo faaKeriso, o e laiti ma e matutua, o e sa alolofa ma fautuaina au i taimi luitauina.
Sa ou uuina ae le snowflake pa’epa’e leise sa koloseina e se tamaitai matua mo a’u ma sa ou manatua ai ona uiga agaalofa. Sa ou mafaufau i uso matutua atu o le tele o uarota sa ou nofo ai o e sa faasoa mai o latou atamai ia te a’u. Sa ou aoao e kolose, lalaga, suisui, ma fonofono mea na faaletonu mai nei uso lelei o e sa naunau e tuuina mai o latou taimi ae maise lava o le onosai ina ia mafai ona ou fiafia i mea sa latou fiafia i ai.
Sa ou uuina lena pu apamemea laitiiti ma mafaufau i le valaaulia a le taitai pese talenia o le sa valaauliaina au ou te auai i aoga pese sa fai i taeaopo mo se polokalama musika faapitoa a se talavou. O lona talitonu ia te ia lava na tuuina mai ai ia te a’u le fiafia i musika tuai ma le to’a e auai ai i aufaipese i lo’u olaga atoa.
Faatasi ai ma se ataata sa ou ava’e ai i luga le teuteu o le Isumu o Miki ma sa ou faafetai i le ulugalii sa faasoa mai le la fanau laiti ia te a’u. O le la fanau sa avea ma a’u fanau. Sa ou siiina i latou i le lotu, faitau ia i latou, taaalo ma i latou, ma alofa ia i latou, na fesoasoani e faatumu ai se avanoa tiga ma le gaogao.
Na aoao mai i tatou e le Faaola i le Mataio 10:39, “O lē maua lona ola, e maumau ai ia te ia: a o lē faamaumau i lona ola ona o a’u, e maua e ia.”
O lena filifiliga mataala i le 1984 e “maumau lo’u ola” e ala i le vaai i fafo atu sa mautinoa lava o se taimi sili ona taua i le “mauaina” o a’u lava. A o ou mafaufau loloto i le taimi ua tuanai, sa ou iloaina ai o le toatele, na taitoatasi, sa mulimuli i fetalaiga a lo tatou Faaola ma maumau o latou ola ona o a’u. O teuteu o le Kerisi masi na avea o se faamanatu matagofie o ni uo faa Keriso.
Atapue Puletaofia © e le Busath Photography; ata na tusia e Scott Snow