O Suiga Paia
E tele atu mea ua faia e le Malumalu o San Salvador El Salvador nai lo le na o le suia o foliga o le laufanua; o lana uunaiga ua suia ai loto, aiga, ma le atunuu atoa.
Suiga o se Mauga
I le aso 20 o Setema, 2008, pe tusa o le 600 le Au Paia o Aso e Gata Ai na faapotopoto i luga o se mauga na matua susu i le timu i le aai o San Salvador, El Salvador. Sa latou laulaututu i luga o se eleele na fai ai faatoaga i le tele o tausaga. I lalo o le taitaiga a le Au Peresitene o le Eria a Amerika Tutotonu, sa latou tatalo faatasi ai ma faasoa upu o molimau. O nisi o latou na tuuina ifo suo fou i le eleele anamua, ma le faamoemoe o se suiga e le o toe umi ae oo atu i lena nofoaga.
I le aso 21 Aokuso, 2011, e faitau afe Au Paia o Aso e Gata Ai sa sagisagi fiafia atu ma le migao e faafeiloai le tasi ma le isi i lena lava mauga. Ua le toe avea o se faatoaga, a ua suia e avea ma nofoaga aupito paia i El Salvador. Sa potopoto faataamilo le Au Paia i se malumalu. Sa latou faatalitali ma le naunautai i le taunuu atu o se perofeta, Peresitene Henry B. Eyring o le Au Peresitene Sili, o le a faapaiaina lena malumalu i le Alii. Sa toetoe ina a tuumumusu mai se tasi ua loa ona auai i le Ekalesia e faapea, ua pei lava ua tavavaeese mai lea nofoaga mai lona siosiomaga—“o se vaega itiiti o le lagi i le lalolagi.”
Suiga o se Aiga
Ia Aperila 2010, sa popole ai Evelyn Vigil faapea, ua amata ona mou atu le faatuatua o lona toalua o Amado. Ua 11 tausaga e lei toe alu i se lotu, ua fai lana faaiuga e le o i ai le Ekalesia moni. O le taimi lea, e lei taofia ai lava le talitonu o Evelyn i le Atua, ma sa alu atu o ia mai lea lotu i lea lotu, ma le naunau e fia faalogo i Lana upu ae e lei faamalieina lava o ia i le mea sa ia faalogo i ai. O nisi taeao e ala mai i loimata. A oo i aso faapena, ona ia aioi atu lea mo se taitaiga o ia mai lona Tama Faalelagi. Sa fesili atu o ia ia te Ia, pe aisea lava na te le lagonaina ai le tonu i se tasi o lotu sa ia auai, e ui ina sa matua manao o ia e aoao e uiga ia te Ia. Sa ia tatalo foi ia i ai se aso e maua ai e lona aiga le lotogatasi i se lotu e tasi.
E oo atu i le 31 o Aokuso, 2011, ua maua e Amado ma Evelyn Vigil se suiga e le pei o le suiga sa tupu i luga o lena mauga i lo latou taulaga. I o latou ofu papae, sa latou ulu atu ai i se potu mo faamauga faatasi ma lo la afafine, o Michelle, e iva tausaga, ma lo la atalii, o Christian e tolu tausaga. O i latou o le uluai aiga na faamauina mo le olaga nei ma le faavavau i le Malumalu o San Salvador El Salvador. E faapei o le malumalu sa latou ulufale atu i ai, sa fou lo latou tuuto atu i le auaunaga i le Alii, ma sa latou tutufaatasi foi i la latou tautinoga.
O Le Tala a le Au Vigil
“Na amata la matou tala,” na tomanatu ai Amado, “ina ua matou mauaina se soa o faifeautalai—ae la te lei mauaina i matou. Na matou tuua le fale o matua o Evelyn, ma ato o la matou faatauga. Na matou vaaia ua iloa mai matou e faifeau ma o la ua kolosi agai mai ia i matou. Sa fesili mai ma le agalelei se tasi o i la’ua pe mafai ona fesoasoani mai.
“Sa la fesili mai foi pe mata matou te faatagaina i la’ua e asiasi mai. Sa ou fai atu ua lelei, o le tele lava ona o le fiailoa. E oo mai i le taimi lena, e le tele se mea na ou iloa e uiga i le Ekalesia—na o nai faamatalaga sa ou faalogo ai mai isi tagata.
“Ina ua uma ona ou ioe e faataga faifeau e asiasi mai i lo matou fale, sa ou fai atu i lo’u toalua, ‘Aua le soona sasalu i lea mea. Aua foi nei i ai se manatu faapea o le a ou auai i se ekalesia. Na o lo’u fiailoa lava po o le a sa la’ua tala.’
“Sa amata ona asiasi mai faifeau. Sa ou saunia e ta’u atu ma le faaaloalo ia i la’ua e o ese pe a la fai maia se tala e le sa’o ia te au. Ae sa ese lo la’ua agalelei, ma sa faagaeetia ai lava au aua la te le’i faia lava se tala leaga e uiga i isi ekalesia. Sa la aoao mai ma se alofa ma le maelega, ma sa la onosai pe a tele a’u mau fesili. Sa vave ona matou alolofa ma faamemelo ia i la’ua.”
Na saunia i sia mea ma sia mea, ia Amado ma Evelyn lava la’ua ina ia papatisoina ma faamau o ni tagata o Le Ekalesia a Iesu Keriso o le Au Paia o Aso e Gata Ai. O le lu’itau tele a Evelyn o le Upu o le Poto. Sa faanoanoa o ia ina ua ia iloaina e tatau ona lafoai lona manao i le kofe. Sa leai ni mausa leaga o Amado na manaomia ona lafoaia; na pau lava le mea o lona aoao e taofimau i le upumoni. Sa talitonu o ia i mea sa aoao atu e faifeautalai, e oo foi i le tele o aoaoga faavae ma mea faatino, sa ia iloaina ma sa la lagonaina ma lona toalua mea na la misia mai isi ekalesia, e pei o aiga e faavavau, papatisoga mo e ua maliliu, ma le faaaumea ma faalapotopotoga i le Ekalesia. Peitai, sa faatuatuai ona ia tautino atu e papatiso. Sa popole nei auai o ia i le Ekalesia ae iloa mulimuli ane ua ia faia se faaiuga sese.
E lei pine ae mou atu nei atugaluga. Sa tatalo Evelyn mo se fesoasoani ma faatoilaloina ona mausa mo lana kofe, ma fai mai, “O le a ou le faatagaina lenei mea e taofia au mai le mauaina o faamanuiaga.” Ina ua mavae le tusa ma le lua masina o le le mautonu, sa tautino atu loa Amado e papatiso. O le taimi nei, e tusa ai ma lagona o Evelyn, e masani ona fai mai, “E tatau ona ma opomauina aoaoga faavae.”
Suiga ma Faamanuiaga
Na papatisoina Amado, Evelyn, ma Michelle ma faamauina i le amataga o Iuni 2011. “Mai le taimi na matou papatiso ai,” na fai mai ai Evelyn, “Sa mafai ona ou lagonaina ua amata ona suia mea uma. Sa tuufaatasia lo matou aiga i le Ekalesia. Ua matou mauaina le talalelei toefuataiina. Sa matou feagai ma tofotofoga ma ma’i talu mai lena taimi, ae sa liligi mai e le Tama Faalelagi i o matou luga le tele o faamanuiaga.”
Na matau e Amado: “O le suiga muamua lava na ou iloa o le lotogatasi i lo matou aiga. E le faapea na i ai ni a matou faafitauli tuga muamua, ae sa amata ona faateleina lo matou lotogatasi. Sa fesoasoani ia aoaoga faavae o le talalelei ia i matou. A aoaoina i matou e taitai o le Ekalesia e uiga i le paia o le aiga, ona atili ai lea ona matou mafaufau i le taua e tatau ona matou tuu i lo matou aiga.”
Na vaaia foi e le epikopo o le au Vigil, o César Orellana, ia suiga i o latou olaga. E lei leva ona uma lo latou papatisoga, ae alu atu Amado ia Epikopo Orellana ma fai atu, “Ua matou mananao e totogi a matou sefuluai, ae matou te le iloa pe faapefea.”
Sa faamalamalama atu e Epikopo Orellana e faapea, o le sefuluai o le 10 pasene lea o a latou tupe maua. Sa fai si popole o Amado. I le taimi lena, sa faigaluega ia Evelyn, ae leai sana galuega. “E masani lava ona le lava le matou faasoa,” sa faamatala atu ai e Amado i lona epikopo, “ae matou te mananao e totogi le sefuluai.”
Sa tali atu Epikopo Orellana, “Uso, e tele folafolaga ua faia e le Alii.” Sa la faitauina faatasi ia mau e uiga i faamanuiaga e maua mai le totogi ma le faamaoni o le sefuluai, e aofia ai upu a le Alii i le perofeta o Malaki: “Ina aumaia mea e sefulu a’i a outou mea uma lava i le fale e tuu ai mea; … ma ia outou tofotofo mai ai ia te au i lenei mea, ua fetalai mai ai Ieova o ‘au; pe ou te le toina pupuni o le lagi mo outou, ma sasaa atu le manuia mo outou ina seia silisili ona tele” (Malaki 3:10).
Ina ua uma ona faitauina faatasi nei mau, sa tilotilo atu Epikopo Orellana i le alii fou faatoa liliu mai ma fai atu, “Afai o le totogiina o le sefuluai o le a le mafai ai ona totogi le vai po o le eletise, ia totogi lau sefuluai. Afai o le totogiina o le sefuluai o le a le totogia ai lau lisi, ia totogi lau sefuluai. Tusa lava pe o le totogiina o le sefuluai o le a le lava ai tupe e fafaga ai lou aiga, ia totogi lau sefuluai. O le a le tuulafoaiina lava outou e le Alii.”
O le Aso Sa na sosoo ai, sa toe alu ai foi Amado i le Epikopo. O le taimi lea, na te le’i toe fesili ai. Sa na ona ia tuu atu lava i lona epikopo o se teutusi ma fai atu, “Epikopo, o la matou sefuluai lea.”
O le toe manatunatu i ai i lenei aafiaga, na fai mai ai Epikopo Orellana, “Talu mai lava lena taimi, o i latou o ni tagata e totogi faamaoni ia sefuluai.” Sa maua e le aiga ni meaai mai le fale teuoloa o le epikopo i taimi o faigata tautupe. Ae, na faamanuiaina i latou e le Alii ina ia mafai ai ona latou tausia i latou lava. Na maua e Evelyn sona siitaga, ma sa maua foi se galuega lelei a Amado. Na le toe faigaluega Evelyn i se taimi mulimuli ane, ae sa faaauau pea ona totogi a latou sefuluai ma maua faamanuiaga faaletino ma faaleagaga ona o lo latou faatuatua. Na fesili Epikopo Orellana ia Amado i se tasi taimi, po o faapefea mai le tulaga tautupe a lo latou aiga. Sa tali Amado, “O la e lelei. O nisi taimi e le tele ni a matou mea e ‘ai, ae e lava lava. Ae e sili atu i lo se isi lava mea, matou te faalagolago lava i le Alii.”
Ina ua mavae si taimi o totogi pea ia sefuluai, sa talanoa atu Evelyn ma Amado i le Epikopo e uiga i faamanuiaga sa latou mauaina. E tusa ai ma le Malaki 3:10, na la fai atu, “Ua matou tofotofoina le Alii.” Ma e moni lava le folafolaga a Epikopo Orellana, e lei tuulafoaiina lava i latou e le Alii.
O Se Vaaiga Fou
Sa ta’ua ma le faananau e Evelyn ma Amado le aso na potopoto ai lo latou aiga i le potu mo faamauga. Sa popole i la’ua i le taimi o o la’ua faaeega paia, atonu e oo atu i le taimi o le sauniga o le faamauga i le aso lava lena, ua vaivai le la fanau. Sa patino lo la’ua popole i lo la atalii ulavale e tolu tausaga, o Christian. Ae na ulufale atu tamaiti i le potu mo faamauga ma le migao filemu, e ta’u atu ai na latou malamalama i le mafuaaga na latou o atu ai iina. Ma ina ua oo i le taimi e auai atu ai le fanau i le sauniga o le faamauga, sa savali atu Christian, e aunoa ma se faatonuga po o se tau fai atu i ai, i le fata faitaulaga ma tootuli i tafatafa o ona matua.
E manatua e Evelyn le vaai atu i ata o le aiga i faaata. Na ta’ua foi e Amado lona vaai atu i ai e le gata i le malumalu ae o o latou olaga i aso faisoo. Na ia faamatalaina lona lotofaafetai mo le vaaiga e faavavau ua taialaina ai nei lona olaga—o se vaaiga ua faalauteleina atili talu mai lena taimi, aemaise ina ua faaulufale mai e le au Vigils se pepe teine fou i totonu o le aiga—o Andrea, lea na fanau i totonu o le feagaiga ia Aokuso.
O Se Malamalama i luga o se Mauga
O le a suia pea e faavavau le aiga o Vigil e ala i le taulaga togiola a Iesu Keriso ma le uunaiga a Lona malumalu i lo latou laueleele. Talu ai ona ua suia se faatoaga e avea o se eleele paia, ua avea nei lo latou fale ma nofoaga e sili atu ona paia.
E tele auala ua avea ai i latou ma folafolaga o se atunuu atoa. O El Salvador o se nofoaga o le fia miliona o tagata lelei, ma le faamaoni o loo lofituina i aso uma i leo ma faatosinaga a le lalolagi. E alolofa tele le Au Paia Salavatoa i lo latou atunuu, ma ua latou mauaina le faamoemoe ua toe faafou a o latou vaaia le malumalu o le Alii iina. Ua faamautinoaina i latou i le mulimuli ai i upu o le tatalo o le faapaiaga o le malumalu na fofogaina e Peresitene Eyring:
“Matou te tatalo mo Au faamanuiaga ia i ai i luga o lenei atunuu o El Salvador. Ia pa’i atu i loto o i latou o loo pulea, ina ia faamanuiaina tagata i le saolotoga ma avanoa. Ia pulea e le filemu lenei laueleele.
“Ia faauluolaina Lau galuega i lenei laueleele. Ia pa’i atu le savali o le talalelei i loto o tagata i le atunuu atoa. Ia latou ui ifo i le vai o le papatisoga, ma tumau faamaoni ai i Lau Afio. …
“… Faatasi ai ma loto ua tumu i le faafetai, matou te faapaia ai ma faamanuiaina lenei maota paia ma ona siosiomaga mo le faataunuuina o Lou finagalo ma le faataunuuina o Lau galuega e faavavau. Matou te tatalo ina ia lagonaina lana uunaiga i lenei laueleele atoa ia avea o se malamalama i luga o se mauga.”1
O le tele o lenei uunaiga na lagonaina lava i auaunaga ma faataitaiga a tagata e pei o le aiga o Vigil. A o tau taofiofi loimata ma taumafai e tautala a o ootia lona loto, sa talanoa faamama’i ia Amado Vigil e uiga i faifeautalai na mafai ai e ia ma lona aiga ona o mai ia Keriso ma mauaina faamanuiaga o le malumalu. “Ma te faamoemoe o le a faamisiona le ma fanau,” o lana tala lea, “ina ia faamanuiaina ai isi aiga, e faapei ona faamanuiaina lo matou aiga e na alii talavou.”
Ata na pueina e Zach Gray, e le mafai ona kopiina
Ata na pueina e Aaron L. West