O Le Malamalama o le Lalolagi
“Aua e faapei ona oti uma ia Atamu, e faapea foi ona faaolaina uma ia Keriso” (1 Korinito 15:22).
Sa tutu Elini i le Lotoa o le Malumalu i le Aai o Sate Leki ma tilotilo i faatusa tetele o le vaaiga i le soifua mai o Iesu ma faatalitali mo le musika ma le tala ina ia amata. Sa feemoemoa’i moli Kerisimasi na siomia ai o ia. Peitai sa le’i pei o se vaitau o le Kerisimasi.
“O lelei lou faalogona?” o le fesili lea a Tina.
Sa luelue le ulu o Elini, ae na te le o mautinoa.
Sa o ni nai aso ua mavae, sa oti ai se tamaitiiti mai le vasega a Elini i le aoga ona o se faalavelave tau taavale. Sa ia vaaia le fetagisi o le toatele o tagata i le maliu, ma sa tagi tele foi o ia. Na te le’i iloaina tele foi le tamaitiiti, ae sa iloa e Elini sa alolofa tele le aiga o le tamaitiiti i le tamaitiiti e pei foi ona alolofa tele lona aiga ia te ia. Sa ia lagona le fefe i le iloa e mafai ona tupu se mea faapena i se tagata o lana tupulaga.
O lea la ua ia le lagona ai le fiafia mo le Kerisimasi. Sa ia lagona i taimi uma le popole—le fefe e alu i totonu o se taavale, fefe e taumamao mai ona matua, fefe e alu ese mai lona fale ina ne’i tupu se mea leaga ia te ia ao aluese atu. Sa le mafai e moli Kerisimasi uma i le Lotoa o le Malumalu ona tafiese le lagona popole sa i totonu ia te ia. E mafai faapefea ona ia maua le fiafia i se lalolagi e le o taimi uma e saogalemu ai o ia?
“O lea o le a amata,” o le tala lea a Tama. Sa tusi atu lona lima i le vaaiga o le fanau mai o le pepe o le Kerisimasi.
Sa ola mai sipika faaleotele leo, ma amata ona tautala mai se leo. Sa tata mai musika, ma sa faasusulu tonu ifo molisulu i lalo i faatagata o leoleo mamoe, Au Makoi, Maria ma Iosefa. Sa faalogologo Elini i le tala masani. Sa fanau le pepe o Iesu ma faataoto i se faatanoa vaovao. Sa pepese agelu. Sa ifo atu leoleo mamoe. Sa olioli le Au Makoi.
Sa tilotilo atu Elini i foliga o ona matua ma le aofia na tumutumu faataamilo i le vaaiga o le fanau mai o le pepe fou. Sa latou foliga fiafia uma. Ae aisea ua fiafia tele ai tagata uma i le pepe o Iesu pe afai e le mafai e Lona fanau mai ona taofia le tutupu o mea leaga? Sa le’i fiafia Elini i le fesili sa feosofai i lona ulu. Na pau lava le mea sa manao i ai, ia uma lona lagonaina o le fefe.
Sa uma le tala, ma sa faalogoina le leo sa pueina o le perofeta i luga o le sipika faaleotele leo. Sa ia tuuina mai lana molimau ma faitau mai se mau mai le Tusi Paia: “Aua e faapei ona oti uma ia Atamu, e faapea foi ona faaolaina uma ia Keriso” (1 Korinito 15:22).
Sa tope le tata o le fatu o Elini. Sa ia toe faia ia upu i lona mafaufau, ma taumafai e manatua. Aua e faapei ona oti uma ia Atamu, e faapea foi ona faaolaina uma ia Keriso.
Fai mai le mau lena, o le a oti tagata uma—tagata laiti, tagata matutua—tagata uma lava. Ioe, sa iloa e Elini lena mea, ae sa le’i mafaufau tele i ai muamua. Sa faapea sa laitiiti tele o ia e mafaufau i mea faapena. Ae sa le’i laitiiti tele o ia e maua se molimau o le upumoni: ona o Iesu Keriso, o le a toe ola ai tagata uma. O le mafuaaga lena na olioli ai le au leoleo mamoe ma le Au Makoi. Sa latou malamalama i le mea na afio mai Iesu i le lalolagi e fai.
Sa tilotilo mai Elini mai le tamai faatanoa vaovao i se faamalama i le nofoaga autu o tagata asiasi o loo i tua ane o le vaaiga o le fanau mai o le pepe fou. I totonu o le fale sa faasusulu atu ai se malamalama i luga o se faatagata lapoa o Iesu o loo faaloloa mai Ona lima faamanualia. Sa mafaufau Elini i le pepe meamea i le moega vaovao ma Lona tuputupu ae i se tagata sa i ai le mana uma. Ae peitai sa Ia filifili e taulaga Lona ola mo ia. Sa soifua mai o Ia ina ia mafai ona toe ola o ia [Elini]. E tusa lava pe o le a le mea e tupu, e mafai ona lagona e Elini le saogalemu i le alofa o Iesu.
Sa lofia o ia i le toafilemu. Sa tau le mafai ona ia faamatalaina pe na faapefea, ae sa mouese atu lona popole. Ina ua tilotilo atu o ia i le faatagata o Iesu Keriso, na susulu malosi atu nai lo moli emoemo o le Kerisimasi, sa ona tau le iloaina ai le lagi pogisa o le po. Sa pisi tele o ia e lagona le mafanafana o le faamoemoe lea sa amata tupu ae i totonu ia te ia.
Ata na tusia e Steve Kropp