Popukoni, Paionia, ma le Filemu
Shirlee Hurst Shields, Iuta, ISA
Sa tuu e tina ni piliki i le ogaumu ona afifi lea i ni palanikeke ina ia mafanafana ai o matou vae a o matou malaga i le matou taavale e aunoa ma se ea faamafanafana. O le 1935, na sa matou tietie atu i le 60-maila (96 km) mai le Aai o Sate Leki i Payson, Iuta, e asi o’u matua matutua i le amataga o Tesema. Sa toulu malie le kiona faataamilo ia i matou ma faataavili i mea na foliga o ni asiosio laiti i luma atu o le auala. O ma’ua ma lo’u tuagane matua o Feleti, sa ma faapupuu i ni ofutalaloa mamafa ma ni totino fulumamoe mageso ma ni sikafu. O le malaga na pei e le gata ia te a’u o se tagata na fitu tausaga le matua.
Sa matou faia lenei malaga i masina uma o Tesema. Sa le amataina lelei le vaitau o le Kerisimasi seiiloga matou te i ai i le umukuka mafanafana o Tinamatua ma Tamamatua Tanner i le faiga o polo popukoni. E saeu e Tamamatua le afi, ae faatumu e Tinamatua le ato i popukoni ma lulu malosi i luga o le afi seia oo ina tumu i sana fefete papae. Ona liligi lea a Tinamatua le pata hani vevela i luga o popukoni i totonu o se ulo uamea tele ma saeu i ai ma pinati. E maalili loa le paluga, ona totofu loa lea i ai o o matou lima ua lilo i le pata ma fai ni polo fiafia e faasoa atu i aiga ma uo.
Ae peitai, o le Kerisimasi lenei, o le a ese. Sa masani lava ona ma tietie ma Feleti i le nofoa pito i tua, ae o le tausaga lenei sa ma feoma’i i le va o o’u matua i le nofoa umi i le pito i luma. Sa ave e se pusamaliu laitiiti lanupaepae na ave ai le tino o lo’u tuagane e tasi le tausaga le matua o, Gerold, le nofoa pito i tua. O se misela na iu ina limonia na faamuta ai lona olaga laitiiti. O se taimi na muamua atu, sa matou o atu ai i le falemaliu e aumai le tamati pusamaliu laupapa.
A o matou faia le malaga e lua itula, sa taitai i matou e Tama i le usuina o pese Kerisimasi. Sa paleni lelei le pepese a Tina ma Tama, ma o le musika matagofie sa faamafanafanaina ai i matou a o matou faavauvau i le oti o le matou pepe.
Ina ua matou taunuu atu i le fale o Tamamatua, sa faatalitali mai ma le faanoanoa le tumutumu o aiga ma auaiga lea sa masani ona pisapisao. Sa aveese mai le pusamaliu mai le nofoa pito i tua ma avatu i totonu o le potu malolo mama manaia o Tinamatua. Sa saunoa le epikopo a o’u matua matutua i ni nai upu agalelei, ona matou toe foi lea i le taavale e tietie atu i le fanuamaliu, lea sa matou fetagisi ai i lenei tamaitiiti laitiiti faapelepele sa faataoto i le eleele malo.
Sa oo mai le Kerisimasi. Sa saveu le afi, sa faapapa popukoni, ma sa kilivaina ia polo popukoni fiafia i le taavale solofanua a Tamamatua. Sa i ai le faanoanoa i lena aso, ae sa i ai foi se toafilemu loloto a o ou faalogologo atu i o’u matua matutua faamaoni o faitauina le tala o le soifua mai o Keriso.
Sa fananau mai o’u matua matutua i ni matua paionia o e sa faataootoina le tele o pepe i le eleele. A o faavauvau lo matou aiga i le maliu o le matou pepe, sa matou liliu atu i le mea sa liliu i ai o matou tuaa—i le Alo o le Atua ma Ana fetalaiga. Ou te manatuaina le tala o le Kerisimasi ma se loto na suia i lena tausaga, aua o le pepe lea na fanau i se faatanoa vaovao o le a mafai ai e le pepe sa matou faataotoina i le eleele ona toetu mai ma avea ma a matou pepe.
Ua tele tausaga ua mavae talu mai lena mea, ae o Kerisimasi taitasi ou te liligiina ia lava le pata hani i le popukoni, saeu i ai ma pinati, faalapotopoto le paluga i ni polo, ma manatua.