Sa Outou Pepese mai o Outou Loto
Dafne Analia Romero de Tau, Misiones, Atenitina
Ia Tesema 2000 sa saunia ai le aufaipese a le matou siteki e talimalo i se faaliga pese. Sa faamautu mai e nisi o aufaipese o aai lauiloa o Posadas, Atenitina, o le a latou auai, ma e toatele ni tagata o le a auai mai. Sa matou faamoemoe e faasoa atu a matou molimau e uiga i le soifua mai o le Faaola e ala i a matou pesega.
I le avea ai ma taitai pese, sa fai si o’u popole. Na faaopoopo mai i lo’u atuatuvale lo’u ma’itaga na valu masina i le masaga. Sa ou lagona ni tiga i le taimi o a matou faataitaiga mulimuli i le vaiaso a o le’i oo i le koneseti o lea sa ou soafai ai ma taimi ia pese.
Ina ua uma le faataitaiga, sa le mafai ona ou tu i luga. Sa tuuina mai e lo’u toalua o Carlos, ma lo’u tama so’u faamanuiaga. Ona ave lea o a’u e Carlos i le falemai, lea sa manatu ai fomai o le a fananau mai ia pepe i lena aso. Sa ou fefe, ae sa fai mai Carlos ou te faatuatua i le Alii.
E le’i umi ae faalogoina le tagi a se pepe fou faatoa fanau mai i totonu o le potu. Sa osooso fiafia lo’u loto i le leo, ona soso mai lea o le fomai ma fai mai, “O Kira lena e tagi, ae ua malaia Abril.”
Sa leai ni a’u upu e faamatala ai lagona na lolofi mai ia te a’u. E le’i leva ae ave au i se isi potu, lea sa faatalitali mai ai lo’u toalua ia te a’u. Sa ma feofoofotai ma fetagisi.
“Dafne, ta te le iloa le fuafuaga a le Alii ua ave atu ai Abril ia te Ia,” o le tala lea a Carlos. “Ae e tatau ona ta lototetele, talia Lona finagalo, ma agai i luma i le faatuatua.”
O se taimi puupuu mulimuli ane, sa sii ai e Carlos le tino itiiti o Kira ma faamanuia o ia ia ola. Sa ola, ae peitai ona o nisi o faafitauli, sa nofo ai o ia i le falemai mo le isi 10 aso.
Sa ou te’a i tua i le vaiaso na sosoo ai. Ona o lo’u malaga soo mai i le falemai e vaai ma fafaga Kira, sa ou le mafaufau ai lava i le aufaipese. O le po a o lumanai le faaaliga pese, sa fesili mai lo’u tama pe ua ou filifili pe ou te taimia ia pese. “Tatalo e uiga i ai, Dafne,” o lana tala lea, “ma e mautinoa lava po o le a lava le filifiliga e te faia o le filifiliga sa’o lena.”
Sa ou mafaufau ia Kira, o le sa taoto pea i le falemai. Sa ou mafaufau i tagata o le aufaipese, o e sa galulue malosi e tapena mo le konafesi. Sa ou mafaufau i le Faaola ma Lona fanau mai, soifuaga, ma le ositaulaga. Sa ou iloa le mea e tatau ona ou faia.
O le faaalia o le alofa na maua e lo matou aiga i le afiafi na sosoo ai mai tagata o le aufaipese sa matuai faagaeetiaina ai i matou, ma o le agaga o le lotogatasi o i latou sa fatuina ai se naunautaiga mai le loto ia pai atu ia i latou na auai.
Ona o i matou sa talimalo i le faaaliga, o lea sa pepese mulimuli ai le aufaipese a le matou siteki. Ina ua ta le piano ma le vaiolini le amataga o le viiga “O Le Noea Muamua,” sa tafe mai o’u loimata i o’u alafau. Ma a o milo faatasi leo ma mea fai musika, sa lofituina atu i le lagona sa ou i ai i se nofoaga matagofie lava.
Ina ua uma, sa ou faliu e tilotilo atu o le toatele o le au maimoa sa maligi o latou loimata. O tagata o e atonu sa le’i faalogo lava i le savali o le talalelei o le filemu ma le alofa sa latou lagonaina e ala i la matou musika le matagofie ma le mataina o le soifua mai o le Alo o le Atua.
Mulimuli ane, sa faapea mai le taitai pese a le tasi o aufaipese ia i matou, “Sa manaia a matou metotia, ae sa outou pepese mai o outou loto.”
I le Vaeluaga o le Kerisimasi sa ma faafetai atu ma lo’u toalua i le Atua mo le auina mai o Kira i lo matou aiga ma mo le Auina mai o Lona Alo i le lalolagi. Ona o le Togiola a le Alo ma le faamauina o i matou i le malumalu, ua ma iloa ai e i ai se aso o le a toe avea ai Abril ma a ma tama.