Ou Te Faamoemoe O Le A Alofa Se Tagata Ia Te Ia
Brittney Pyne, Iuta, ISA
Ina ua tolu tausaga le matua o lo’u atalii ae fa la’u tama teine, sa avea i laua ma se vaega o le aoga amata a le pitonuu. O le taumalulu lena o i matou sa nafa ma le vaaiga o le vaega, sa matou filifili e fai se galuega faatino o le Kerisimasi na aofia ai le tuu atu i tamaiti taitoatasi e foai atu se meataalo i se aiga limavaivai.
Sa tele ni lesona sa matou aoaoina atu i vaiaso na muamua mai e uiga i le fiafia tatou te maua i le loto faafetai ma le fetufaai atu i isi. Sa ou fai atu i lau fanau e amata ona mafaufau po o le fea meataalo la te mananao e ave, sa ou manao ia la maua le aafiaga o le filifilia o le mea e foai atu. Sa utiuti mea tautupe a lo matou aiga, ma sa ou fia iloa po o le fea o a la meataalo laiti o le a la naunau e aveese atu.
I se tasi taeao o se Aso Toonai, sa ou fai atu ai i la’u fanau ua oo i le taimi e filifili ai a la foai. Sa ou fesoasoani ia Hunter e afifi le loli sa ia filifilia ona ou alu atu lea e vaai pe o a mai ia Mikelle. O le vaaiga sa ou molimauina mai le faitotoa o lona potu sa maligi ai o’u loimata.
Sa uu e Mikelle lana pepe meataalo e sili ona fiafia i ai o Mella, sa faaofu i lona ofu meataalo sili ona manaia, ma sa pese i ai. Ona ia tuuina lea o se palanikete laitiiti i le pito i lalo o se ato meaalofa. Sa ataata o ia i le pepe meataalo, fusi ma kisi i ai, ona tuuina lea o ia ma le alofa i totonu o le ato. O lona iloa mai o a’u, sa ia fai mai ai, “Tina, ua uma ona sauni ia Mella. Ou te faamoemoe o le a alofa se tagata ia te ia.”
O le iloaina o lagona o la’u tama teine i lenei pepe meataalo, sa ou maofa i lona aveeseina atu. Sa toetoe lava a ou manao e fai atu ia Mikelle e le tatau ona ia aveeseina lana pepe meataalo e sili ona fiafia i ai, ae sa ou taofia a’u lava.
“O loo malamalama o ia i le foai atu,” o lo’u manatu lea. “Ua ia tuuina atu lana mea e sili ona lelei.”
Sa faafuasei ona ou iloaina lena vaega o a’u sa naunau e foai atu ma tufa atu ae sa le o se osigataulaga maoae tele. Sa ou tuua ni tapulaa i lo’u alofa mama, ma sa ou iloaina na tatau ona ou sui.
Sa ou mafaufau i le tuuina mai e le Tama Faalelagi o Lona Alo atoatoa e toatasi ma faatagaina o Ia e puapuagatia ma maliu mo a’u. Sa ou vaai faalemafaufau i se Tama oi le Lagi agaalofa o sogi i Lona Alo Pele e Toatasi ma auina mai o Ia i le lalolagi o se pepe, ma le faamoemoe o le a tatou alolofa ma mulimuli ia te Ia.
O le Faaola lava Ia na te le’i taofia se mea e tasi ae tuuina mai mea uma sa ia te Ia.
Sa ou mafaufau pe mata o le a sui le mafaufau o Mikelle a o lei faia le polokalama o le Kerisimasi, i le taimi o le a foai ai meataalo, ae leai. Sa ou mafaufau foi pe mata o le a ia toe salamo mulimuli ane i lana filifiliga ma lagona ai le faanoanoa, ae sa leai foi.
O le vaaia o le faataitaiga faaKeriso a la’u tama teine, sa ou filifili ai e tusa pe tele pe laitiiti se mea ou te maua, o le a ou foai atu ma le agaga fiafia i taimi uma le mea sili ou te maua pe a ou maua se avanoa e faasoa atu ai.