Ona o Aiga
Pe ua e mafaufau ea i auala uma ua faamanuiaina ai oe e ala i le avea o oe ma se vaega o se aiga?
E leai ni aiga se lua e tutusa, peitai na faauuina e le Atua le aiga o le “iunite lautele lea e sili ona taua i le olaga nei ma le faavavau.”1 Po o fea lava e te nofo ai po o le a foi le tulaga e i ai lou aiga, e mafai e le talalelei ona fesoasoani ia te oe e atiina ae ni fesootaiga malolosi atu ma le malosi faaleagaga a o aumaia le fiafia tele i totonu o lou aiga. Faitau faamatalaga a nei tupulaga talavou i le lalolagi atoa i pogai ua taua ai aiga ia i latou.
O Le Aiga E Faavavau
O Elini, mai Karolaina i Matu, ISA, ma lona aiga (agavale) na i ai i taimi uma se sini e tasi i o latou mafaufau: ia avea ma se aiga e faavavau. Ae peitai, o le tamā o Elini, sa le o se tagata o le Ekalesia.
“Ioe sa mananao lo’u tina ma nai ou tei ia maua foi e tama ia faamanuiaga o le talalelei. O le talalelei a Iesu Keriso na matou maua ai le fiafia, ma sa matou mananao ia Tama ia aafia ai foi i lena fiafiaga. Sa matou matuai mananao uma lava foi ia faamauina faatasi i matou o se aiga,” na fai mai ai Elini.
O le naunau ai ina ia avea o se aiga e faavavau, sa faia ai e Elini ma nai ona tei ma le tina ia mea uma sa latou mafaia e tausi ai poloaiga ma atiina ae se faatuatua malosi, ma sa latou tatalo faatasi mo le loto o lo latou tama ina ia faagaeetiaina e le talalelei.
E ui sa alu ai ni nai tausaga, ae sa iu lava ina papatisoina ma faamauina le tama o Elini. O le sefulu o aso talu ona maea lona papatisoga, sa mafai ai ona ia papatisoina le tuagane ma le uso laitiiti o Elini. E le o toe mamao ae ausia e lo latou aiga la latou sini o le faamauina i le malumalu.
O Le Aiga e Aumai Ai le Malosi ma le Lagolagosua
Talu lava ona maliu lo laua tama, na faalagolago ai lava Elisapeta ma lona tuagane o, Enau, o Cameroon, Aferika, i lo laua tina. “Sa avea lava o ia ma punavai o fesoasoani ia i maua talu ona maliu lo ma tama. Ua faamanuiaina ma puipuia i matou e le Atua i mea uma matou te faia,” o le tala lea a Elisapeta.
Sa o mai faatasi uma le aiga o Elisapeta (luga) ina ua mavae le maliu o lona tama. Ma, ina ua latou auai i le Ekalesia i le 2010, sa aoaoina ai e Elisapeta ma Enau le taua e faavavau o le aiga.
“O se tasi o mea aupito taua ua ma aoaoina [mai le talalelei] e faatatau lea i le taua o le aiga,” o le tala lea a Elisapeta. “O le aiga o se mea e sili ona taua ia te a’u aua o lo’u aiga, ua mafai ai ona avea au ma le ituaiga tagata ua ou i ai i le taimi nei.”
O Le Aiga e Aumaia le Tuputupu Ae ma le Toafilemu
Ua aoaoina e Atina, mai Suitiselani, le ala e mafai ai e tagata o le aiga ona fesoasoani le tasi i le isi e atiina ae taleni a o latou fiafia i gaoioiga faafiafia atoatoa.2 E fuafuaina e lona aiga se tafaoga a le aiga faalemasina lea latou te aoao atili ai e uiga i mea e fiafia i ai le tasi ma le isi. “Matou te maua le avanoa e tuu atu i o matou tei se vaaiga loloto atu i o matou olaga ma mea matou te faamemelo i ai,” o lana tala lea. I se tasi taimi, sa aoaoina ai e lona tama le aiga e uiga i le aoaoina o taifau (lalo). “Sa manaia le vaaia o lona naunautai ma lona fiafia tele sa i ai e faasoa mai se vaega taua o lona olaga ma le mea e faamemelo i ai ia i matou,” na manatua ai e Atina.
E ala mai i nei gaoioiga faaleaiga, ua atinaeina ai e Atina ni tomai se tele. Ua ia matauina ai foi le faateleina o le toafilemu i lona olaga: “O le aiga o se nofoaga lea e mafai ona ou malolo ai mai le popolevale o le olaga i aso fai soo ma manava toafilemu ai, ma faapea foi ona maua ai le malosi ma iloa ai ou te le tau tu na o a’u i lenei olaga. Ou te faafetai mo lenei mea aua o le lalolagi i aso nei ua saoasaoa tele ma malomaloa. Ua ou fiafia o loo i ai so’u nofoaga ou te maua ai se faasiligamalosi ma mapu ai.”
E ui o o latou mafuaaga atonu e eseese, ae ua iloa e nei tupulaga talavou e mafai ona latou faalagolago i o latou aiga mo le lagolagosua, toafilemu, ma le alofa.
Ata pue mai faaaloaloga a aiga