O Agaifanua o le Malamalama ma le Molimau
Mai se lauga i le sauniga lotu na tuuina atu i le aso 24 o Ianuari, 2012, i le Iunivesite o Polika Iaga–Idaho. Mo le lauga atoa i le gagana Peretania, asiasi ane i le web.byui.edu/devotionalsandspeeches.
Ia mautinoa ua e amatalia se siosiomaga tamaoaiga e mafai e lou aiga ona tulimatai atu i ai i taimi faapitoa o le tausaga, i le taimi e tuufaatasia ai e agaifanua outou o se iunite faaleaiga tele e faavavau.
O le Ekalesia a Iesu Keriso o le Au Paia o Aso e Gata Ai e moni lava o se Ekalesia ua soo ai le lalolagi. Ae ui o lea, e taua le iloaina e le mafai lava e le Ekalesia ona i ai i le tulaga ua i ai nei e aunoa ma le fanau mai o se malo tele, o le Iunaite Setete o Amerika. Sa saunia e le Alii se laueleele fou e faatosina mai i ai tagata o le lalolagi o ē sa saili ia faasaolotoina ma le saolotoga faaletapuaiga. Sa faamanuiaina lenei laueleele fou i ni taitai malolosi o ē sa lagonaina o lo latou tiutetauave le faatuina o se malo e faatagaina ai tagata taitoatasi e tapuai e tusa ai ma o latou lotofuatiaifo.
Sa talitonu Tagata na Faavaeina le Iunaite Setete, o le faatuatuaga faalelotu o le ute lea o le faavaeina o se malo malosi. Peitai, e toatele tagata i le lalolagi, ua galo le taua tupito o talitonuga faalelotu i le faavaeina o aiaiga faavae, puleaga, ma tulafono a le malo. Mo se faataitaiga, e tele tagata Amerika, e le malamalama sa talitonu i latou na faavaeina le malo, o le a taua le matafaioi a tapuaiga i o tatou taimi e faapei foi o o latou taimi. Latou te lei mafaufau o le a avea tapuaiga ma le amiopulea o se mea e tele ni taumafaiga e taufaamalamalama ai—na latou tautinoina faamalosi lena mea o se vaega taua o faigamalo lelei ma le fiafia o le tagata.
Na faamatalaina lenei tulaga e le uluai peresitene o le I.S, o Siaosi Uosigitone, i lana Malelega Faamavae. Na Ia saunoa:
“E ui i uiga ma amio masani uma e tau atu i le manuia faaupufai, o tapuaiga ma le amiopulea o lagolago aupito taua ia. … Ia tatou faananau ma le faaeteete i le talitonuga e mafai ona faatumauina le amiopulea e aunoa ma se tapuaiga. … E le faatagaina e le mafuaaga ma le poto masani i tatou e faamoemoe faapea, e mafai ona manumalo le amiopulea faaleatunuu e aunoa ma le mataupu faavae faaletapuaiga.
“E matuai moni lava o le amioatua po o le amiopulea o se faapogai e tatau ai mo se malo manaomia.”1
O le Iunaite Setete o le nuu folafolaina lea na muai ta’ua i le Tusi a Mamona—o se nofoaga na faatonutonuina ai mai le lagi ni tamalii musuia e amatalia ia tulaga e tatau ai mo le Toefuataiga o le talalelei a Iesu Keriso. O le foafoaina lea o le Iunaite Setete o Amerika, lea na amata ai le faaiuga o le Liliuese Tele, ina ua pouliuli ma valea tagata ina ua leai ni perofeta ma leai se atamai na faaalia. E le o se mea na faafuaveta le tulai mai o le Uluai Faaaliga vaaia i lena taeao matagofie, ina ua mavae nai tausaga talu ona faavaeina le Iunaite Setete.
Na amatalia i le Uluai Faaaliga se lolo o upumoni faaalia. Sa toefuatai mai le iloa e uiga i le natura o le Aigaatua. Na aumaia e se tusitusiga paia fou ua faaliliuina se molimau lona lua ma se tautinoga ia Iesu Keriso. O le toefuataiga mai o le perisitua ua toe faamanuiaina ai le tagata i le mana ma le pule e galue ai e fai ma sui o le Atua i le faafoeina o sauniga ma le toefaatuina o le Ekalesia a Iesu Keriso i le lalolagi. Ua faamanuiaina i tatou i le avea ai ma tagata o le Ekalesia toefuataiina.
O Se Fuafuaga mo le Saogalemu Faaleagaga
O se tasi o faamanuiaga o le Ekalesia toefuataiina o perofeta soifua. Sa i ai ia Peresitene Harold B. Lee (1899–1973) se malamalamaaga matagofie ma le manino i mea e faamuamua. Sa ia aoao mai, “O le tele lava o mea tatou te faia o se faalapotopotoga [i le Ekalesia] … o le fauina lea o fausaga e lagolago ai, a o tatou saili e fauina tagata taitoatasi, ma e le tatau foi ona tatou sese i le fauina o fausaga e lagolago ai le agaga.”2
E lei faaitiitia e Peresitene Lee le matafaioi a le Ekalesia i le faaolataga o tane, fafine, ma aiga. Ae, sa ia aoao mai ma le mamana o le totonugalemu o le talalelei a Iesu Keriso o tagata taitoatasi, aiga, ma auaiga, lea o le galuega a le Ekalesia o le lagolagoina.3 O le mea lea, o loo fausia e le Ekalesia fausaga tatou te galueaiina ai aiga e faavavau.
Ou te sau mai se lala o le gafa o le au Wing. O loo i ai pea i tagata o le aiga o le au Wing le fale aupito tuai na fausia i Niu Egelani, lea na i ai i le aiga lava lea. E ta’u o le Old Fort House. O le fale o Stephen Wing ma lona aiga, ina ua latou taunuu i Amerika pe tusa o le 1635.
O le ogatotonu o le fale sa fausiaina mo le puipuiga. O ona puipui e lua futu (0.6m) le mafiafia, e fausia mai ogalaau o le garava e tu’imau i le eleele e fai ai le fausaga masani o se ‘olo o Niu Egelani. E lua puipui e tu eseese. O le va sa faatumu i maa oneone e puipuia ai mai au ma uafana. O le ‘olo o le totonugalemu lea o le fale. A o faatupulaia le aiga o le au Wing, sa faaopoopo atu i itu o le uluai fale. Peitai, na tumau ai lava le ‘olo mo lo latou puipuiga, o lo latou maluapapa e saogalemu ai.
Atonu e tatau ia i tatou taitoatasi ona mafaufau e fausia ni fausaga mo lo tatou saogalemu faaleagaga, ia e saoloto mai uunaiga a le lalolagi—ni nofoaga e mafai ona tatou puipuia ai ma aoao tagata o le aiga i le ala e faafetaia’ia ai luitau o se lalolagi o loo faamata’uina ai pea tulaga faatauaina o le talalelei. E sili ia te au le mautinoa, ina ia ou faamoemoe ai pea mo suiga lelei i le lalolagi. Ae o a’u foi o se tagata e faamautu, o lea la ou te faia ai se fuafuaga faaleoleo ne’i le oo mai ni suiga lelei. O la’u fuafuaga faaleoleo mo le saogalemu faaleagaga e tatau ona faamatala ai anotusi uma—lelei ma leaga— na tufa mai i ala eseese o faasalalauga. O fea ou te sueina ai le ala e fausia ai se fuafuaga faaleoleo mo le saogalemu faaleagaga o lo’u aiga? Ou te su’ea i le Ekalesia—o le fatāmanu po o le fausaga lea ou te fausia ai se aiga e faavavau.
E lua mafuaaga autu ou te talisapaia ai le upu valiata a Peresitene Lee mo le Ekalesia o se fatāmanu po o se fausaga mo o tatou aiga e faavavau. Muamua, ua fesoasoani ou te malamalama ai i le tulaga o le Ekalesia. Lona lua, ma e tutusa foi le taua, ua fesoasoani ou te malamalama ai i le tulaga e le o sō le Ekalesia.
O le Ekalesia i le avea ai o se fatāmanu atonu e sili ona faamatalaina i se faaupuga a le Perofeta o Iosefa Samita na faia e uiga i lana matafaioi o le taitai o le Ekalesia. Na ia saunoa, “Ou te aoao atu ia i latou ia mataupu faavae sa’o, ona latou pulea ai lava lea o i latou.”4 O mataupu faavae o le faavavau, o fatāmanu ua saunia e le Ekalesia. O nei mataupu faavae o le faavavau, o loo maua i aoaoga faavae o le malo o le Atua ma o loo atagia mai i Lana fuafuaga e faavavau o le fiafia. Tatou te potopoto o ni tagata o le Ekalesia e aoao atu ma aoao mai i le tasi ma le isi ia mataupu faavae o le amiotonu, ma ia mauaina sauniga faaola ina ia mautu ma mausali le fatāmanu a o tatou fausiaina o tatou aiga e faavavau.
Matau o le Ekalesia e le faapea na te faia le galuega a matua; ae, na te taialaina le galuega a matua. E ofo mai e le Ekalesia se mamanu o le faavavau. I le avea ai ma tufuga o aiga e faavavau, ua faamautu mai ia i tatou le folafolaga, afai tatou te fausia e tusa ai ma lenei mamanu o le faavavau, e mafai e a tatou taumafaiga ona saunia le saogalemu ma le puipuiga o loo tatou sailia mo i latou e sili ona tatou alolofa i ai.
O la tatou lu’i o le faaaoga lea o le Ekalesia e fai ma fatāmanu e fausia ai se aiga e malosi faaleagaga pe malosi atu foi nai lo le malosi faaletino o le Old Fort House. E faapefea ona tatou faia lenei mea?
O Le Taua o Agaifanua
Ou te talitonu o agaifanua faaleaiga, e pei o ogalaau o le garava ua tu’imau i le eleele e fau ai le Old Fort House. Ua avea ai agaifanua faamamaluina a le aiga—agaifanua mo tafaoga, o agaifanua mo asofanau, agaifanua mo Aso Sa, agaifanua i taimi o ‘aiga i le afiafi—ma le atina’ega o mea fou e avea o se faamuamua i o outou olaga atoa. Faamamalu i ai, tusi i lalo, ma ia mautinoa ua mulimuli ai. Ua faaalia i suesuega, o le mafuaaga e ō ai tupulaga talavou i kegi, e mo se agaifanua ma faiga e avea ai o se vaega o se mea e tele atu nai lo ia lava. O le mea lena e tatau ona i ai le aiga. Ia mautinoa o loo e fauina se siosiomaga ‘oa e mafai e lou aiga ona sagisagi i ai i taimi faapitoa o le tausaga e tuufaatasia ai outou e agaifanua o se iunite faaleaiga tele e faavavau.
Ia malamalama e le o se faaiuga laitiiti pe faigofie lenei. E pei lava o Roma e lei fausia i se aso se tasi, e faapena foi i agaifanua faaleaiga. O agaifanua faaleaiga e mafai ona aumaia ai le lagolago faavae tumau, ae e anoanoai e tatau ona fausia faataamilo ai. Atonu e pau le taimi e aoga ai agaifanua faaleaiga, pe a latou faia se matafaioi mo tagata taitasi o le aiga ma pe a i ai se taumafaiga tuufaatasi e fausia ai. O lona uiga e manaomia e tagata o le aiga ona faaalu faatasi so latou taimi ma aoao ai pe faapefea ona galulue faatasi. A oo mai i aiga, e leai se mea e ta’u o se taimi ‘anoa e faaalu faatasi e aunoa ma se taimi tele e alu ai.
A e mafaufau i le galuega e te faigaluega ai, mo se faataitaiga, mafaufau i le tele o le taimi o le a manaomia ai oe i aso taitasi. Pe o se galuega o le a e faigaluega ai mo le 14 itula i le aso ma lē mafai ai e oe ona e taunuu i le fale vagana ai ua momoe lau fanau? Ou te le o fai atu e aua nei mafaufau i ai i na avanoa faigaluega, ae a e filifilia, e tatau ona e sailia ni auala fatufatua’i e fesootai ai i lou aiga. O le fatāmanu a le Ekalesia o le a fesoasoani e faamanatu atu ai ia te oe au faamuamua e faavavau.
Mo la’u matata faalegaluega, sa ou filifili ai se pisinisi faleoloa. Na tatala o matou faleoloa i aso e ono o le vaiaso mai le 10:00 i le taeao seia aulia le 10:00 i le po. O o’u itula faigaluega masani o le 10 itula, o nisi taimi e 12 i le 15. Sa tatau ona ou matua faaeteete ina ia i ai so’u taimi mo la’u fanau, ma ou te talitonu o le vaaia pea lava pea o le Ekalesia o se fatamanu, sa faamanatu mai ai a’u faamuamua e faavavau.
Mo se faataitaiga, sa ou faaaofiaina la’u fanau uma i galuega faavaitaimi i o matou faleoloa. O lo’u afafine matua sa masani ona sau ma faamaopoopo fuainumera o tupe e maua mai faatauga ina ia mautu a’u lipoti i taimi uma ma ou mafai ai ona fai faatusatusaga ma lea tausaga ma lea tausaga. Ou te faafaigaluegaina lo’u atalii i le vaaiga o tusi mo tupe totogi i le taumafanafana. Sa ou aoaoina lo’u afafine laitiiti i le faaaogaina o le masini e teu ai tupe ina ia mafai ona avea ma kesia faavaitaimi. O iina na matou maua ai le avanoa e fevaaia’i ai i le aso, aai faatasi i aoauli i le tele o aso i le vaiaso, ma faaalu faatasi ai taimi taua ma tagata taitoatasi. O le taimi sili lava e faatasi ai o le taimi e malaga faatasi mai ai i le galuega ma toe foi.
Fatamanu mo o Tatou Olaga Faalegaluega
Ou te talitonu foi e mafai e le Ekalesia ona saunia ni fatamanu mo o tatou olaga faalegaluega. I le avea ai o ni tagata o Le Ekalesia a Iesu Keriso o le Au Paia o Aso e Gata Ai, ua avea i tatou ma sui o le Faaola ma Lana Ekalesia. Mo i tatou, o le lelei e faapei o se tasi mai se isi ekalesia, ua le lava lena. Na aoao mai e Peresitene Siaosi Alapati Samita (1870–1951) le lesona lenei ina ua ia saunoa:
“I le tausaga na te’a nei, sa ou maua ai le avanoa e feiloai ai ma talanoa e uiga i le talalelei ma ni alii e nonofo ai i lea nuu [Aai o Sate Leki], e le ni tagata o la tatou Ekalesia. O le tasi alii ua luasefulu tausaga sa nofo ai iina, o se tagata e tamalii, o se tagatanuu lelei, o se faipisinisi lelei tele, o se tasi e agalelei i o tatou tagata. Na ia fai mai e faapea, ua ia … faia se faaiuga faapea, e tutusa lava lo tatou lelei ma o tatou tuaoi o ni tagata o isi ekalesia; na te le iloaina lava so tatou eseesega.
Ou te fia fai atu ia te outou, uso e ma tuafafine, e le o se tala manaia lea ia te au. Afai e le faia e le talalelei a Iesu Keriso ia a’u, ia avea ma se tagata ua sili atu, o lona uiga e le’i atiina ae a’u e pei ona tatau ai, ma afai e mafai ona ola ai faatasi i tatou ma o tatou tuaoi e le auai i lenei Ekalesia, mai lea tausaga i lea tausaga ma latou lē vaaia se faamaoniga o faamanuiaga e maua mai i le tausiga o poloaiga a le Atua i o tatou olaga, ona i ai lea o le tulaga manaomia e toe fatufatua’i ai Isaraelu.”5
O se tagata o le Ekalesia ua agavaa mo se pepa faataga o le malumalu, e tatau ona tulaga ese lava i taimi uma i soo se li’o faalegaluega o i ai. Ia lototoa ia ese. Aua lava nei popole i le faatiga o isi e ala i lou ola ai i tulaga faatonuina o le Ekalesia. Ou te folafola atu o le ola ai i tulaga faatonuina o le pepa faataga o le malumalu, o le a faamanuia ai ma o le a le faatiga ai lava ia te oe i soo se tulaga e te ono oo i ai.
Atagia Mai o le Malamalama o le Faaola
A ou faitau ma matamata i talavou i aso taitasi, ou te ofo lava i faigata tatou te faatupuina mo i tatou lava. A o suia taimi ma tulaga ma atili ona lavelave, e foliga mai ua faasolo lava ina toaitiiti tagata ua mafai ona tauaveina ia tiutetauave o le taitaia o suiga lelei. Ou te tuuina atu se lu’i ia te outou o e o taitai ma taitai mo a taeao, ia iloa ua vave tele suiga o le lalolagi. Ua i ai se tulaga manaomia faanatinati mo taitai agavaa ma lava le totoa e faafetaia’ia luitau ogaoga ua tatou feagai i le taimi nei.
O le faavae lelei o se agaifanua malosi FaaIutaia-Kerisiano, ua foliga mai ua faaitiitia i le Iunaite Setete ma isi atunuu. O lenei agaifanua sa faavae i luga o le amiotonu, agaalofa, ma le faaaloalo mo le mamalu faaletagata. Sa lei faavaea i luga o tulafono ma taupulega ae o luga o le Malamalama o Keriso o i tagatanuu lelei uma ma tauagafau.
O le aofaiga o tagata ua taliaina nei talitonuga ua toalaiti, ae o loo tumau pea ona tatou mulimuli i le mea ua tatou iloa e moni. Ua tatou osifeagaiga ma le Faaola e avea ma Ona sui. O le avea ma sui o Iesu Keriso ma atagia mai ai le Malamalama o Keriso i o tatou olaga, e mafai ai ona tatou fesoasoani i le tele o o tatou uso ma tuafafine ia manatua a latou talatuu ma agaifanua Faa Iutaia-Kerisiano.
E tatau ona tatou lotototoa i a tatou tautinoga ma molimau i le paia o Iesu Keriso. Tatou te mananao i isi ia iloa tatou te talitonu o Ia o le ata tutotonu i le talafaasolopito o tagata uma. O Lona soifua ma aoaoga o le fatu lea o le Tusi Paia ma isi tusi ua tatou manatu i ai o tusitusiga paia. Ua faamatala mai e le Feagaiga Tuai mea na tutupu i luma mai o Lana galuega i le tino. O loo aumaia e le Tusi a Mamona ia i tatou se molimau lona lua o Lana galuega i le tino. Na afio mai o Ia i le lalolagi e folafola mai Lana talalelei o se faavae mo tagata uma ina ia mafai ai e fanau uma a le Atua ona aoao e uiga ia te Ia ma Ana aoaoga. Ona Ia ofoina mai lea o Lona soifua ina ia avea ma o tatou Faaola ma Togiola. Ua na o Iesu Keriso lava e mafai ai ona maua le faaolataga. O le mafuaaga lea tatou te talitonu ai o Ia o le ata tutotonu i le talafaasolopito uma o tagata. O loo i ai pea i Ona aao lo tatou taunuuga e faavavau. O se mea viia le talitonu ia te Ia ma taliaina o Ia o lo tatou Faaola, lo tatou Alii, ma lo tatou Matai.
Manatua na pau lava le mea sa faia e le Ekalesia, o loo faia, ma mafai ona faia e mo oe ma lou aiga. Ia manatua foi, e le faapea ua na o se tasi foi o ekalesia; o le Ekalesia toefuataiina a Iesu Keriso.
Ata na saunia e John Luke © IRI
Ata na tusia e Dan Burr
O Le Alii o Iesu Keriso, saunia e Del Parson, © 1983 IRI; ata © IRI