E Faapefea Tafaoga Faamasani?

Saunia e Larry M. Gibson

Fesoasoani Muamua i le Au Peresitene Aoao o Alii Talavou

O le faaaluina o taimi e faafesagai ai ma isi tagata e alagatatau i le fausiaina o faauooga moni.

A o ou maua le avanoa e talanoa ai ma alii ma tamaitai talavou i le Ekalesia atoa, ua masani ai ona ou faalogo ai e faapea, e ui o le toatele o outou e fiafia i le atinaeina o ni faauooga lelei atu ma isi o le itupa faafeagai, ae e masani ona outou tauivi ma le iloaina o le auala tonu e faatupu ai lena mea.

O le a foliga mai faatasi ai ma agafesootai uma a ala o faasalalauga, e tatau ona sili atu ona lelei ona tatou fesootai nai lo se isi lava taimi muamua. Ae peitai, i nisi o itu, o tekinolosi e ono afua ai ona tatou maua ni fegalegaleaiga ua itiiti lona anoa. O le na o le tweeting, tesi, i-meli, ma faauo e le mafai ona fatuina moni ai se mafutaga e fausia lelei. O le faaaluina o le taimi e faafesagai lelei ai ma isi tagata e alagatatau i le fausiaina o faauuoga moni.

Ua oo i le taimi mo outou, o tatou talavou lelei, e toe aumai le faauigaga tuai mo le taimi e faatasitasi ai alii ma tamaitai talavou mo se aafiaga o agafesootai. Atonu ua outou faalogo i le faaupuga; o lenei aafiaga sa ta’ua muamua o se tafaoga faamasani.

Tali i Fesili e Fesiligia Soo

O le toatele o outou o loo i ai ni fesili e uiga i tafaoga faamasani ma le fautuaga o loo tuuina mai i le tamaitusi fou o le Mo le Malosi o le Autalavou. O nisi nei o fesili na fesiligia ai a’u, faatasi ai ma tali mai lenei tusitaiala matagofie.

Ou te le o mautinoa pe ua ou saunia e tafao faamasani. O i ai ni mafuaaga faapitoa e tatau ai ona ou [tafao faamasani]?

O le tafao faamasani e talafeagai mo se vaega o mafuaaga. O loo faamatala mai i le Mo le Malosi o le Autalavou e faapea o se tafaoga faamasani “e faatagaina ai se alii ma se tamaitai talavou e faamasani lelei ai le tasi i le isi. O aganuu e talia ai tafaoga faamasani, e mafai ona fesoasoani ia te oe e aoao ma faataitai ni tomai faaagafesootai, atiae ni faigauo, maua ai le fiafia lelei ma mama, ma iu ai ina maua se soa e faavavau.”¹

Ua matou faalogo e faapea e le tatau ona matou tafafao faamasani a’o le’i atoa le 16 o o matou tausaga ma ia aua nei tafao faamasani tumau i soo se tagata a o matou talavou. Aisea?

Fai mai le Mo le Malosi o le Autalavou: “E le tatau ona e tafao faamasani seiiloga ua 16 tausaga lou matua. A amata loa ona e tafao faamasani, ia o ma se isi paga po o nisi paga se toatele. Ia aloese mai le tafafao soo ma le tagata lava e tasi. O le atiina ae vave o mafutaga tumau a o laiti e mafai ona faatapulaa ai le toatele o isi talavou e te feiloai i ai ma atonu e mafai ona taitai atu ai i le ola le mama.”²

Ua manao se alii talavou ma te o e tafafao faamasani, ae ou te le lagonaina moni ua tutusa o ma tulaga faatonuina. O le a le mea e tatau ona ou faia?

Ua aoao mai le Mo le Malosi o le Autalavou: “Filifili na o i latou e maualuluga o latou tulaga faatonuina e tafafao faamasani i ai ma i le mafuta ma i latou e mafai ai ona e faatumauina ou tulaga faatonuina. … Ia faaalia i taimi uma le agalelei ma le faaaloalo pe a e talosaga atu mo se tafaoga faamasani po o le talia po o le teena foi.”³

O nisi taimi e le mafai ona ou mafaufau i ni manatu mo tafaoga faamasani vagana ai le matamata o se ata tifaga. O le a le mea e tatau ona ou faia?

Ua tuuina mai e le Mo le Malosi o le Autalavou ia mataupu faavae aoga nei: “Ia fuafua ni gaoioiga o tafaoga faamasani e saogalemu, lelei, ma e le taugata ma ia fesoasoani e iloa ai e le tasi le isi. Ia o tau lava na o nofoaga e mafai ai ona faatumauina o outou tulaga faatonuina ma latalata ai pea i le Agaga.”⁴

O na vaega faigofie e fa—tafaoga faamasani e saogalemu, lelei, taugofie, ma tumau ai le latalata atu i le Agaga—e maua ai le avanoa mo le tele o tafaoga faamasani sili atu ona manaia.

A o ma toe tomanatu ma lo’u toalua i o maua aafiaga o tafaoga amata faamasani, o aafiaga na e sili ona iloga o taimi ia sa laitiiti pe leai foi se tupe na alu ai, a o matou i ai faatasi ma ni isi paga taitoalua e le itiiti ifo ma le toatasi, ma sa mafai ona matou faia ni talanoaga ma ni fegalegaleaiga anoa.

Puipuia o le Mama o le Tasi ma le Isi

Sei ou faamaea atu i se isi upusii taua mai le Mo le Malosi o le Autalavou ma se manatu mulimuli e tasi. Muamua, “Ia manatua o se alii talavou ma se tamaitai talavou e tafafao faamasani, ua ia te i laua le matafaoi e puipuia le mamalu ma le mama o le tasi ma le isi.”⁵ A o outou o i tafaoga faamasani, ia mautinoa tou te le faia se mea tou te toe lagona ai le faalumaina. E pei ona aoao mai Peresitene Thomas S. Monson, “Pe a tafafao faamasani, ia taulima lau paaga ma le faaaloalo, ma ia e faamoemoe foi i lau paaga e faaali atu lena lava faaaloalo e tasi ia te oe.”⁶

O Le Eseesega i le va o le Tafao Faamasani ma le Aumoe

O le mea mulimuli, e ui ina faauigaina e nisi le tafao faamasani o le “aumoega,” ae o le tafao faamasani i le Ekalesia i le autalavou e le faapea ai ua latou “feoai tumau” pe le mafai ai ona latou tafafao faamasani i isi. O tulaga faatonuina o le Ekalesia, o le tafao faamasani ua faamoemoeina e avea o se avanoa mo fegalegaleaiga faaagafesootai lea e mafai ona atinaeina ai ni faauooga se tele.

A o e ulu atu i ou tausaga faaletagata matua—pe a maea misiona mo alii talavou—ona fetalai mai lea o le Alii, “E leai se tane pe a le o i ai le fafine, e leai foi se fafine pe a le o i ai le tane, i le Alii” (1 Korinito 11:11). O le taimi lenei e avea ai le tafao faamasani ma aumoega e pei ona faamamafaina i le Mo le Malosi o le Autalavou: “Ia avea le tafaoga faamasani ma le faaipoipoga o se faamuamua maualuga. Ia saili se soa e agavaa e alu i le malumalu ina ia faamauina ia te oe mo le olaga nei ma le faavavau atoa. O le faaipoipo i le malumalu ma le fausiaina o se aiga e faavavau e taua i le fuafuaga o le fiafia a le Atua.”⁷