Manatu mo Afiafi Faaleaiga

O lenei lomiga o loo aofia ai tusiga ma gaoioiga e mafai ona faaaoga mo afiafi faaleaiga. O nisi nei o faataitaiga.

“O Agaifanua o le Malamalama ma le Molimau,” itulau e 10: Otooto le tusiga ma valaaulia le aiga e fatufatu se meafaitino e faapupula ai le faamoemoega o le fatāmanu. Talanoaina pe o faapefea ona tuu atu e le Ekalesia i lou aiga se “fatāmanu” ia taunuu atu ai i se mea e maualuga atu, e fausia ai lou aiga ma isi itu o lou olaga.

“O Perofeta i le Taimi o le Kerisimasi,” itulau e 20: A uma ona faitauina ni tala mai soifuaga o perofeta, mafaufau e faasoa atu nisi o aafiaga na e maua i lou olaga po o olaga o isi na ootia ai ona o se aafiaga patino i se Kerisimasi ua mavae. Atonu e te manao e talanoaina auala e mulimuli ai i faataitaiga a o tatou perofeta i lenei vaitau.

“O Le Saogalemu ma le Filemu o le Tausia o Poloaiga,” itulau e 32: E mafai e i latou e i ai fanau laiti ona fai i ai latou te tusia ni ata o tagata o loo faia mea tonu i se auala e tau atu ai i se malumalu. E mafai e isi aiga ona fuafua e faitauina le tala atoa, ma talanoaina, ae faamamafa atu “o le ala i le fiafia e amata i le … usiusitai i poloaiga.”

“Auala e Avatu ai Meaalofa ia Keriso,” itulau e 48: Faitau faatasi le tala mai ia Peresitene Henry B. Eyring. Atonu e mafai e lau fanau ona tusi i lalo mea latou te mananao e avatu i le Faaola mo le Kerisimasi, ma afifi a latou tautinoga e pei o se meaalofa o le Kerisimasi. Mafaufau e talanoaina ia tagata latou te iloa e mafai ona faaaoga le fesoasoani faaletino pe faaleagaga po o mea uma foi e lua.

“O Le Taliina O Se Tatalo o le Kerisimasi,” itulau e 68: Faitau faatasi ma lou aiga le tala ia Peggy Schonken. Atonu e te manao e faamatala taimi na e mauaina ai tali i au tatalo ma faamalosiau i lau fanau laiti e faia foi faapena. Mafaufau e tusi faamaumau tali uma i tatalo e maua e lou aiga i le vaitau o le Kerisimasi.

Molimau e leai ni Upu

O la’u tama tama o Derek e faaletonu lana tautala, o lona uiga e faigata ona tautala. E fiafia Derek i afiafi faaleaiga, ma e tele ni masina e sauniuni ai lesona e faasoa i le aiga.

O se tasi o lesona na te manatua pea o le “Miti a Liae.” Na ia tautauina maea i vaega uma o le fale i totonu ma fafo. Sa amata le matou lesona i le faalogologo i se CD o viiga “Ou Te Talitonu ia Iesu” ma matamata i se ata o le miti a Liae sa faatu i luga o le laulau. Ona auauai lea ona aveina i matou e Derek, faasolosolo i le maea.

A o matou savavali, sa i ai ata o Keriso i le tasi itu ma ni mea sa faatosina ai (e pei o le leitio, TV, ma taaloga) i le isi itu. Sa matou iloa ua matou taunuu i le faaiuga ina ua matou faalogoina le musika —o le pese e fiafia lava i ai Derek, “Ua Ou Iloa Lo’u Faaola.”

Ina ua taunuu tagata uma, sa ki e Derek le DVD The Testaments [O Molimau] ma faamatamata ai i matou i le faaiuga, i le taimi lea na afio ai Iesu Keriso i tagata o Amerika. Sa matua malosi le Agaga a o tuuina mai e la’u tama lana molimau i le Faaola e aunoa ma le faaaogaina o ni upu.

Wendy Thompson, ISA