Faagalo Mafatiaga
O le a oo mai se taimi tatou te le toe mafatia ai, ma faatasi ai ma le fesoasoani a le Alii, e ea a’e ai mai le pouliuli i se malamalama tele naua.
O se tasi o viiga maoae o le Toefuataiga, na tusia e Parley P. Pratt, o loo talanoa ai i le tatalaina o pupuni o le pogisa o le liliuese i le malamalama matagofie o le upumoni ua toefuatai mai:
Ua tafa ata, mavae le po;
Le fu’a Siona ua tu mai! …
Ua o’o mai se aso fou
Le lalolagi mamalu ai.
Ua mavae ao o mea sese
I le sulu o mea moni paia; …
Le mamalu ua sau mai luga
Ua lata oo mai i tagata.1
E maeu lava, na faaaoga foi e le Aposetolo o Paulo le talafaatusa o le malamalama e faamatala ai le auala e mafai ai ona ia molimau faapea “ua puapuagatia i matou i mea uma, ae le faaatuatuvaleina; ua fememeai, ae le matua fememeai; ua sauaina, ae le tuulafoaiina; ua lafotuina i lalo, a e le fano” (2 Korinito 4:8–9).
Na ia faamatalaina faapea na sao mai o ia mai le siui o le pogisa faaleagaga: “Aua o le Atua o le na fai atu ia pupula mai le malamalama mai le pouliuli, ua faapupula mai e ia io matou loto, ina ia malamalama e iloa ai le mamalu o le Atua i fofoga o Iesu Keriso” (2 Korinito 4:6).
O le toatele o i tatou e i ai se tiami i o tatou olaga e lagona ai le maatiati o le matagi o mafatiaga. E fotuai mai afa, e agi mai matagi, e toulu timuga, e tulai mai lologa. E ono foliga mai e le uma mafatiaga, tatou te feagai pea ma se lumanai o le le mautonu ma le le mautinoa, tofotofoga ma faigata.
E faapea foi i le feagai ai ma le papatetele o faititili i nisi o taimi, e mafai ona tatou oo i afa fulifao ma taaviliga o mea faalafua, ia e mafai ona faataumaoia ai lo tatou mautinoa ma luluina ai o tatou lagona o le taua o le tagata lava ia. O mea e pele ia i tatou e mafai ona faafuasei ona lē tumau, ua se’e atu i o tatou tamatamailima. E mafai e suiga tetele o le olaga ona faalavelaveina o tatou olaga sololelei, ma faasalaveia gasologa masani o le olaga.
Atonu o se faamutaina faafuasei mai se galuega ua oo ai ina umi se taimi e le o toe faigaluega, o le leai o se saolotoga i mea tautupe ua leai ai se filifiliga e fai, po o se pagatia i mokesi ua tuua ai i tatou i faanoanoaga tautupe. Atonu o se litaea na naunau i ai ina ua mavae se taimi umi sa faigaluega lelei ma pisi ai, a ua aumaia ai se lagona ua toilalo. Atonu o se gasegase faafuasei po o se tulaga matautia ua i ai ni manaoga faapitoa ua tulai mai ai ni o tatou lagona ua “nofofale,” ua le toe aoga, ua leai se faamoemoe, ma ua le mautinoa. O na tulaga, e mafai ai ona oo gofie mai le atuatuvale, ma faigata ai ona tausisia le faatuatua.
Ua ou iloaina nei mea uma mo a’u lava ia. A o tau saili malosi mai se taotoga e aveesea ai ni patu lapopoa mai le faiai, sa ou oo ai i ni vaitau o le le fiafia ma le faanoanoa mai aafiaga uma faalelagona ma faalemafaufau. Sa ou iloa ai le lava le malosi e faatoilalo ai e pei ona sa ou manatu ai. Sa le’i fesoasoani vailaau, ma o le toe foi mai o le ma’i na faaopoopo mai ai le faanoanoa ma le ātu. Sa amata ona ou faanoanoa mo a’u lava ia.
Faaiuga E Fiafia
Ona amata lea ona tutupu ni mea matagofie. Na ofo mai e ni uo lelei ma taitai faatuatuaina o le Ekalesia la latou lagolago ma le malamalama, ma sa amata ona ou faalogo atu i a latou fautuaga ma talia la latou faamalosiauga. I le tuneva o se tasi po, a ou faamatala atu o’u lagona lē fiafia i lo’u atalii laitiiti, sa ia fai mai, “Papa, sa ou manatu i taimi uma o le fiafia o se faaiuga.” E sa’o o ia.
Sa ou faateleina ona ou faailoa atu le lotofaafetai mo faamanuiaga uma o loo ou sapi ai pea. Sa ou iloaina foi mo a’u lava ia, “o nei ituaiga [o tofotofoga] ua na o le tatalo ma le anapogi e o ese ai” (Mataio 17:21).
Sa ou lagonaina le malosi, le mana faafou, ma le alofa o le Faaola. Faatasi ai ma Paulo, sa oo ina ou olioli i le iloa ai e le mafai lava e puapuaga, atuatuvale, po o le pelu ona faateaeseina a’u mai le alofa o Keriso (tagai i le Roma 8:35).
O le mea e lelei ai, o le mea moni e i ai le faamoemoe ma le mautinoa tusa lava po o le a, e mafai lava ona tatou maua le malosi ma le faamalosiauga. E mafai ona tuumāmāina a tatou avega, tusa lava pe le mou ese atu faafuasei. E mafai ona tatou ea a’e i luga o le isi itu o le vaifagaloa aupito pogisa, o ni alii ma ni tamaitai ua sili atu ma ua sili atu le naunau e fai le mea tonu.
Pe a faamaonia ai i le afi faamama o puapuaga, o le a tatou atiina ae ai se uiga e mafai ai ona feagai ma tatalia mea e faate’ia ai le olaga i le lumanai. O le taunuuga, e mafai ona tatou faaaogaina o tatou aafiaga e fesoasoani ai ma alofa i isi. O a tatou lava faataitaiga o le faapalepale patino, e mafai ai ona avatu i isi le faamoemoe ma musuia ai o tatou aiga. Tatou te atili fetaui lelei ai mo le lumanai.
E ui atonu e faifaimalie ona tuua i tatou e mafatiaga, ae e mafai ona tatou filifili e tuua i soo se taimi. O le folafolaga a le Alii ia i tatou, e faapei foi o le folafolaga ia Alema ma lona nuu i le lotolotoi o sauaga matautia:
“Ina ea ia o outou ulu ma ia faamafanafanaina outou; ona ua Ou iloa le feagaiga na outou faia mai ia te a’u; ma o le a Ou osifeagaiga ma o’u tagata ma laveai i latou mai le pologa.
“Ma o le a Ou faamamaina foi avega ua tuu i o outou tau’au, e oo ia te outou tou te le lagonaina i latou i luga o o outou tua” (Mosaea 24:13–14).
Ma le isi, ua faamautinoa mai e le Alii, “Ou te le tuua outou o matuaoti: Ou te sau ia te outou” (Ioane 14:18).
Saili i le Fesoasoani Faalelagi
Atonu e le tumatilatila mai le fesoasoani faalelagi. Atonu o le a tatou le vaaia vave pe iloaina e i ai ni nai avega semanu e oo mai ia i tatou a ua aveesea, ma tata’iese mai lo tatou faitotoa.
Ua faamautinoa mai e le Alii: “Ae faauta, e moni, e moni, Ou te fai atu ia te outou ua i o outou luga o’u mata. Ua Ou i ai i totonu ia te outou ae ua le mafai ona outou vaai mai ia te a’u” (MF&F 38:7).
Ioe, atonu e manaomia ona tatou matua onosai lava i isi ma i tatou lava; e masani ona tele se taimi e alu ona faatoa sologa lelei lea o mea uma. E oo foi pe a i ai taimi e foliga mai ai ua itiiti lo tatou faatuatua e pei o se fatu o le sinapi, a tatou agai i luma, o le a tatou agai atu faatasi ma le Alii. Afai tatou te sailia le fesoasoani mai le lagi, o le a tatou mauaina lava—atonu e oo mai i ni ala e lei mafaufauina.
E mafai ona tatou maua le naunautaiga e faafetai atu ai mo mea ua tatou maua, nai lo le faavauvau i mea ua leiloloa. O se mea mālie, e tele taimi tatou te faalogo ai i lena lava faamatalaga o ta’ua e i latou ua leiloloa uma a latou meatotino faalelalolagi i se mala faalenatura, e pei o se afisosolo, lologa, po o se afa. Toetoe lava o mea uma e tutupu mai, latou te faapea mai, “O le mea sili o lea lava e i ai a matou mea e sili ona taua.”
E faamalosiau le molimau a Paulo:
“Ua aoaoina a’u ia toafilemu lo’u loto i mea ua ia te au.
“Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua aoaoina ai au ia ou maona, ma ou fiaai, ia faulai mai mea ma ia oge mea.
“Ou te mafaia mea uma lava i le faamalosi mai o Keriso ia te a’u” (Filipi 4:11–13).
E pei ona tusia, “O mea uma lava e le o sa’o e uiga i le olaga e mafai ona faasa’o e ala i le Togiola a Iesu Keriso.”2
Po o a lava o tatou tulaga, o le a oo mai se taimi tatou te le toe mafatia ai, ma faatasi ai ma le fesoasoani a le Alii, e ea a’e ai mai le pouliuli i se malamalama tele naua.
Ata na tusia e Allen Garns