Auala e Avatu ai Meaalofa ia Keriso
Mai le saunoaga “O Le Meaalofa a se Faaola” o le Faigalotu o le Kerisimasi 2010 a le Au Peresitene Sili.
O le agaga o le Kerisimasi e tuuina ai i o tatou loto se manao e avatu le fiafia i isi tagata. O le faamanatuga o le Kerisimasi e fesoasoani tatou te tausia ai a tatou folafolaga ia manatua pea le Alii ma Ana meaalofa ia i tatou. Ma o lena manatuaina e faaosofia ai se manao i totonu ia i tatou ia avatu ni meaalofa ia te Ia.
Ua Ia ta’u mai ia i tatou mea e mafai ona tatou tuuina atu ia te Ia e aumai ai ia te Ia le fiafia. Muamua, e mafai, e ala i le faatuatua ia te Ia, ona tuuina atu se loto momomo ma se agaga salamo. E mafai ona tatou salamo ma osia feagaiga paia faatasi ma Ia.
Lona lua, e mafai ona e avatu ia te Ia le meaalofa o le faia mo isi o mea na te faia mo i latou. O loo i ai se lisi umi o mea e mafai ona fai i le tusi a Mataio. O iina tatou te faitau ai i fetalaiga mai lo tatou Togiola, lea tatou te faamoemoe uma ia tatou faalogo ma tautatala ai pe a tatou vaai ia te Ia pe a mavae lenei olaga:
“Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ai, ma matou fagaina oe? po o fia inu, ma matou avane e te inu ai?
“O anafea foi na matou iloa ai oe o le tagata ese, ma matou talia oe? po o le le lavalava, ma matou faaofuina oe?
“O anafea foi na matou iloa ai oe ua ma’ po o i le fale puipui, ma matou o atu ai ia te oe?
“Ona tali atu ai lea o le Tupu, e faapea atu ia te i latou, E moni, ou te fai atu ia te outou, auā na faia e outou i le tasi o e aupito itiiti o ou uso nei, o au lea na outou faia i ai” (Mataio 25:37–40).
O na upu sa faamanino mai ai e le Alii ia meaalofa e mafai ona tatou avatu ia te Ia ona o lo tatou loto faafetai. O faatinoga taitasi o le agalelei i soo se tasi e avea o se agalelei ia te Ia aua e alofa o Ia i fanau uma a le Tama Faalelagi. Ma talu ai o na mea e aumai ai le fiafia ia te Ia, e faapea foi ona aumai ai le olioli i Lona Tama, o lē ua tatou nofo aitalafu ai i le faafetai e le mafaatusalia.
Ata na tusia e Christina Smith
O le toatele o outou o le a maua i le vaitau o le Kerisimasi ni auala e avatu ai ni meaai i tagata o e o fiaaai. A o outou faia, tou te aumaia le olioli i le Alii. Ae ua Ia aoao mai ia i tatou e faapea, e i ai se ala e foai atu ai o se meaalofa e sili atu le tautele ma le tumau. Na Ia fetalai mai, “O a’u nei le areto o le ola: o le sau ia te au, e le laina lava ia; o le faatuatua foi ia te au, e le toe fia inu lava ia” (Ioane 6:35). Faatasi ai ma le agalelei uma tatou te tuuina atu ia te Ia, o le mea aupito sili e mafai ona tatou ofo atu o le faasino atu o i latou tatou te alolofa i ai ma auauna i ai ia te Ia, le pogai e tasi o le ola e faavavau.