Ola Faatasi o ni Tiakono
E ui ina matuai eseese o laua foliga, ae o nei alii talavou e toalua e tele ni mea la te tutusa ai.
Ata na pueina e Mindy Raye Friedman
O Tyler W. e ono futu (1.8 m) le umi, e lanumumu lona lauulu, ma e see i seevae e 13 le tetele. O Gerrit V. e fa futu valu inisi (1.4 m) le umi, e enaena lona lauulu, ma e see i seevae e 2 1/2 le tetele. Peitai e ui ina eseese i laua faaletino, ae e ta’u i laua e o laua aiga o le “masaga” aua o i laua o se uo lelei lava ma e tele mea la te tutusa ai.
O Gerrit ma Tyler e tai 12 o la tausaga ma e i le korama e tasi o le au tiakono. E tau fai fiafia uma i laua e taaalo i taaloga, faaalu o la taimi faatasi ma o laua aiga, ma le aoaoina o mea fou. E tofu foi i laua ma ni molimau i le talalelei ma e taumafai e faamamalu le Perisitua Arona. “E tatau ona ma faataunuuina o maua tiute faaleperisitua ina ia mafai ona ma aoao ai,” o le tala lea a Gerrit.
E fiafia uma i laua e faataunuu na tiute e ala i le tufaina o le faamanatuga ma le aoina o taulaga anapogi.
La te fesoasoani foi e faaaumea mai isi tiakono o la latou uarota e ala i le valaauliaina o i latou e o mai ia Keriso. “Afai e leai se tasi i o, e tusi e le tasi o i maua se tusi puupuu ia te ia e ta’u i ai mea uma sa matou aoaoina i le lotu. Ona ma aveina lea i ai ma faapea atu, ‘Faamolemole sau i le lotu,’” o le tala lea a Gerrit.
E auai foi Gerrit ma Tyler i le Tiute i le Atua. Ua la faia ni fuafuaga e faitau atili i tusitusiga paia. “E mafai ona fesoasoani tele i ou talitonuga ma faamalosia ai lau molimau,” na fai mai ai Tyler.
O nei alii talavou o ni tiakono e pei lava o oe po o isi tiakono e te iloaina. E i ai mea la te eseese ai ma mea la te tutusa ai. Ae o le mea e sili ona taua, o i laua uma o fanau a le Atua ma e mananao e auauna ia te Ia, aufaatasi i lo laua korama o le perisitua.