Taulai Atu i se Aiga e Faavavau

Saunia e Mindy Raye Friedman

Mekasini a le Ekalesia

O le i ai o se malumalu ua fausia i El Salvador ua avea o se faamanuiaga sili mo se fanau e toalua sa fesoasoani i o la’ua matua e toe foi mai i le Lotu.

O Kevin ma Jacqueline S., o se tuagane ma se tuafafine i El Salvador, o se uo sili, ma e fuifuilua lava i la’ua i mea uma. E ese le alolofa i le talalelei ma lo la’ua aiga. E mananao i la’ua ia faatasi lo latou aiga e faavavau.

A o laiti Kevin ma Jacqueline, e fesili tagata i le lotu i lo la’ua tama, “O afea tou te faamau ai i le malumalu?” O lana tali, “Pe a i ai se malumalu i El Salvador.”

Tatalo mo o La’ua Matua

Peitai, e oo atu i le taimi na fofogaina mai ai le Malumalu o San Salvador El Salvador i le 2007, a ua le toe lolotu matua o Kevin ma Jacqueline. Peitai, o la lava e o ia Kevin, ua 18 ona tausaga, ma Jacqueline ua 15, i le lotu, ma tatalo ia i ai se aso e toe foi atu ai o la’ua matua.

“E le’i tuua lava lo’u tatalo atu ma aioi atu i le Tama Faalelagi ina ia toe toaaga mai i la’ua,” o le tala lea a Jacqueline. “Ou te iloa e manao le Tama Faalelagi i le mea sili mo i matou, ma e manao o Ia ia avea i matou o se aiga e faavavau.”

Sa taumafai foi i la’ua ia avea ma faataitaiga lelei mo o la’ua matua. “E lei uma lava lo’u faamoemoe,” o le tala lea a Kevin. “Ou te faitauina lava tusitusiga paia ma tatalo; e vaai mai foi o’u matua o o’u suesue ma ou alu e fai asiasiga i aiga ma ou alu i gaoioiga a le Ekalesia. A o ou galue e tausi poloaiga ma agaigai i luma, sa vaaia a’u faataitaiga e o’u matua.”

Lagonaina o le Agaga o le Malumalu

Na amata ona tali ia tatalo a Kevin ma Jacqueline mo o la’ua matua ina ua lata ina mae’a le malumalu. “Ina ua fofoga mai e o matou taitai le faapaiaga ma le sauniga faaleaganuu, sa ma valaauina o ma’ua matua,” na ta’ua ai e Kevin. “Na ma fai atu i ai e uiga i le avanoa o le a ma auai o ni talavou, ma sa faaosofia ai i la’ua ma sa fesoasoani lena mo i la’ua e agaigai ai i luma faaleagaga.”

E le gata i le auai atu i faafiafiaga faaleaganuu, ae na mafai foi ona o le aiga e matamata ina ua tatala le malumalu mo maimoaga.

“E ui e le’i toaaga o’u matua i le lotu, ae sa la vaavaai atu lava i le Ekalesia ma le talalelei o se mea e paia,” o le tala lea a Kevin. “Ina ua matou ulu atu i le malumalu, na amata ona faamalamalama mai e lo’u tama ia te au ma o’u tuafafine, a oo ina matou ulu atu i le malumalu, matou te oofu papae ma o iina e faatino ai sauniga paia.”

Sa ofo ia Kevin ma lona tuafafine e lua tausaga le matua, o lē sa masani ona feosofa’i solo, i le nofofilemu ina latou i ai i totonu o le malumalu, ma sa ia matauina foi le maligi o loimata o lona tina a o matamata i potu eseese ma atavali. Ina ua ulufale atu le aiga i se potu mo faamauga, sa faamatala atu e se taiala o maimoaga, o iina e faamau ai aiga mo le faavavau.

“Sa amata e lo’u tuafafine laitiiti ona pa’i mai ia i matou taitoatasi ma fai mai, ‘O lo’u tina, o lo’u tama, o la’u Kevin, ma la’u Jacqueline,’” o le tala lea a Jacqueline. “Sa pei na fetalai mai le Tama Faalelagi e ala mai ia te ia, e ta’u mai ia i matou o i matou uma lava o ana.”

“Ona ia fusi mai lea o i matou ma amata ona kisi mai ma tusitusi atu i faaata,” o le tala lea a Kevin. “Sa matou tilotilo atu ia i matou faatasi i faaata, ma o se mea sa maofa ai. Ina ua matou tuua le potu mo faamauga i lena aso, sa matou faia se sini ia mafai ona matou toe foi atu iina.”

Toe Mauaina o le Vaaiga Mamao

Ina ua uma ona auai i se maimoaga i le malumalu, sa amata e le aiga ona faia ni suiga. “Talu ona matou o i le malumalu, sa toe maua e lo matou aiga se vaaiga mamao,” na ta’ua ai e Kevin. “Talu mai lena taimi, ua fai a matou afiafi faaleaiga, ua ave matou e o matou matua i le lotu ma matou nonofo faatasi i le laina pito i luma o le falesa.”

Ia Aokuso 2011, sa lagona e Kevin ma Jacqueline ua faamanuiaina ina ua nonofo faatasi ma o la matua i le fale autu o le siteki, a o latou matamata i le faasalalauga o le faapaiaga o le malumalu.

“Ina ua fofoga mai le malumalu i le 2007, sa lei malolosi o’u matua i le lotu, ma sa ou manatu o le a ou le maua lava le avanoa e faatasi ai ma i la’ua i le faapaiaga,” o le tala lea a Kevin. “Ae ina ua matou nonofo faatasi i le faapaiaga, sa ou lagonaina moni lava ua tali mai e le Tama Faalelagi a’u tatalo. O le i ai faatasi ma lo’u aiga iina, o se tasi o faamanuiaga silisili ua ou maua i lo’u olaga.”

“O lenei aafiaga i le malumalu ua faamalosia ai au,” o le tala lea a Jacqueline. “O le mea ua sili ona faamalosia ai au nai lo se isi mea, o le vaaia lea ua suia e le malumalu ia olaga, aua ua fesoasoani i o’u matua e toe toaaga mai ai i le Lotu. O lea ua faatu nei le matou sini o le a faamauina i matou i le malumalu. Ou te iloa e manao le Tama Faalelagi i le mea sili mo i matou.”

A I Ai le Alofa i le Aiga

E felata’i tele Kevin ma Jacqueline o se tuagane ma se tuafafine, ma ua la aoaoina o le sootaga vavalalata i le va o uso ma tuagane/tuafafine, e mafai ona avea o se vaega faamanuiaina tele o le olaga. O le ala lea e lagolago ai e le tasi le isi.

Fai mai Jacqueline, “E fesoasoani lo’u tuagane ia te au i taimi uma i o’u tiute i le fale ma le a’oga. Na te lagolagoina lava au i taimi uma, ma ou te iloa e aunoa ma se masalosalo e alofa o ia ia te au, ma o le a ia lagolagoina a’u i soo se taimi. A ou faanoanoa pe le fiafia, e i ai lava o ia iina e faamalosiau mai ia te au.”

Fai mai Kevin, “A ou faavaivai, e lagolagoina au e lo’u tuafafine ma faamalosiau mai. Na te ta’u mai mea e lelei e uiga ia te au, ma ou lagona ai le fiafia. E tele mea ua ou aoaoina mai ana faataitaiga. A oo i taimi ua ou le faatuatua ai, e fai mai lava o ia ia aua nei ou masalosalo ma o le a lelei mea nai lo le mea ua ou manatu ai.”

Fai mai nei talavou e toalua e fiafia lava i la’ua i la la’ua sootaga, ma e le taua’imisa i la’ua e pei ona faia e le toatele o fanau. “Atonu tou te faapea e ese a i ma’ua, ae ou te faafetai i lo’u Tama Faalelagi mo lenei sootaga ma lo’u tuafafine,” o le tala lea a Kevin.