O La’u Meaalofa ia Iesu
“Fanau a le Atua ia vivii, aumai meaalofa mo le Alii” (“O Le Pese a Agelu,” Liahona, Tes. 1993, 8).
Taimi mo le afiafi faaleaiga!” o le valaau mai lea a Tama.
Sa ou topetope atu i le potu malolo. Matou te faia i taimi uma ni mea malie i le afiafi faaleaiga muamua o Tesema.
Sa tamoe muamua atu i o’u luma lo’u uso laitiiti o Michelle, ma oso i luga o le nofoa faamalu lanumoana.
“E le fea!” Sa ou alaga atu ai.“Sa e nofo iina i le vaiaso lea ua te’a. O lo’u taimi lenei.”
“O au na muamua mai ii, ia ou te nofo ai ii,” o lana finau mai lea. “Nofo oe i luga o le nofoa umi.”
“Ou te le fia nofo i luga o le nofoa umi,” na ou oso atu ai.
Sa ou matele atu i le nofoa faalue ma liliu ese ina ia ou le tilotilo atu ia Michelle. Na te matuai faaitaina lava a’u i nisi o taimi! Faapea lava o ia na te mauaina uma mea e manao i ai. Soo se taimi lava ou te faitio ai, e fai mai Tina ia te a’u, e le tatau ona ou aiu.
Ina ua uma ona usu e lo matou aiga se viiga ma fai le tatalo, sa fai mai Tama, “O le Kerisimasi o se taimi fiafia lea, ma e tatau ona tatou manatua le uiga moni o le aso fiafia. O le afiafi nei o le a tatou amata ai i a tatou meaalofa mo Iesu.”
A tatou meaalofa mo Iesu. Ua galo ia te a’u le mea lena!
“Tatou te faamanatuina le Kerisimasi aua sa fanau mai ai Iesu,” o le faaauau lea a Tama. “O Ia ua mafai ai ona tatou maua le meaalofa silisili—o le ola e faavavau ma le Tama Faalelagi.”
“Ae o le a le mea na Ia fai mai tatou te faia?” O le fesili lea a tina.
“Ia mulimuli ia te Ia ma tausia Ana poloaiga,” na tali atu ai lo’u tuagane.
Sa tufa mai e Tina ia i matou taitoatasi se kata ma se peni. Sa tatau ona matou tusia ai pe o a ni auala o le a matou faaali atu ai ia Iesu matou te alolofa ia te Ia. O le tatou meaalofa lena—ia filifili se mea o le a tatou faia ia avea atili ai e faapei o Iesu.
Sa vave ona ou iloa la’u meaalofa. Sa aoao mai i tatou e Iesu e alolofa atu i isi, e tusa pe latou te faaitaina i tatou. Sa ou iloaina sa manao Iesu ia ou alofa i lo’u uso. Sa ou tusia, “O le a ou agalelei ia Michelle.”
Sa matou tuuina a matou kata i totonu o se pusa sa afifiina i se pepa lanuauro. Sa matou tuuina le pusa i lalo o le laau Kerisimasi. Soo se taimi matou te tilotilo atu ai i le pusa, e tatau ona matou manatua le meaalofa a le Faaola ia i matou ma la matou meaalofa mo Ia.
O ni nai aso mulimuli ane, sa ou vaaia ai ua ave e Michelle lo’u mitiafu ou te fiafia lava i ai e aunoa ma le faanoi mai. Sa ou fia ee atu ia te ia. Ona ou tilotilo atu lea i le pusa lanuauro ma manatua ai lo’u alofa tele ia Iesu. E mafai ona ou faaali atu ia te Ia le alofa e ala i lo’u agalelei i lo’u uso. Sa ou fai atu, “Ese lou aulelei i lenei aso, Michelle.”
Sa ataata o ia. “E faamalie atu ou te le’i fai atu ou te ofu i lou mitiafu. E te le’i i ai iina i le taimi na fai ai o’u lavalava, ae sa ou manao ia ou foliga aulelei teisi atu mo le pati o le Kerisimasi a le matou vasega.”
Sa ou lagona le fiafia i totonu. Sa ou fiafia sa ou filifili e agalelei atu ia Michelle nai lo lo’u ita ia te ia.
Mo lena masina atoa, sa ou taumafai lava e manatua lena lagona lelei ma o la’u sini ia ou faapei o Iesu. Sa faasolo ina ou lelei atili i le onosai ma le agaalofa.
I le Vaeluaga o le Kerisimasi, sa faitau e Tama le tala i le fanau mai o le pepe o Iesu, ae o i matou uma na faatinoina. Sa ou filifili e fai ma agelu nai lo le ma finau ma Michelle po o ai e faatinoa le vaega a Maria.
O le mea na sosoo ai sa matou tatalaina le pusa lanuauro ma faitau leotele a matou meaalofa mo Iesu. Ina ua ou faitauina la’u meaalofa, sa fai mai Tina, “Sa ou matauina sa e agalelei atili ia Michelle. Ua ou mitamita lava ia te oe!”
Sa ou mitamita foi. Ou te le’i talaia ni meaalofa i lena taimi, ae o lea ua ou mauaina se mea faapitoa: o se lagona mai le Agaga Paia e ta’u mai ai ia te a’u sa ou faia le mea sa’o.
Ata na tusia e Laura Andros