Autalavou
O Le Po Atoatoa o le Kerisimasi
A o ou tuputupu a’e, o se tasi o vaega aupito sili o tausaga taitasi o le Po o le Kerisimasi. E fai e matou ia pizza, ma matou o i manuao, ona faapotopoto lea mo se faigalotu o le Kerisimasi. Matou te usuusuina viiga i ni vaega faalemanuia se fa ma soona leotetele ai a matou pesepesega i a matou mea faimusika eseese. E masani ona faaiu e tamā le afiafi i se mafaufauga o le Kerisimasi e uma ane ua matou fetagisi i le fiafia. E leai lava se taimi e sili o le olaga nai lo le Po o le Kerisimasi.
Ina ua fai sina o’u matua, sa amata ona vaavaaia e lo’u tina se tuaoi talavou, o Keli. Sa sau Keli i lo matou fale i aso uma pe a tuua le aoga a o faigaluega lona tina o Patty. Sa femulimulia’i solo Keli ia te au e pei o se tamai taifau—malomaloā ma fia’ai. O se mapusaga lava pe a sau Patty e ave lana tama aua e filemu ai lo matou fale ma lo matou aiga.
I se tasi Tesema, sa ou le fiafia ina ua valaaulia e lo’u tina ia Patty ma Keli e o mai i le Po o le Kerisimasi. Lo’u Po o le Kerisimasi. Sa soisoi tina ma faamautinoa mai ia te au, “O le a le suia ai lava se mea.” Ae sa ou iloa lelei. O le a la ‘aia uma a matou pizza. O le a aamu Keli i a matou pesepesega. Sa ou manatu lava a’u ia o le Po Kerisimasi e sili lea ona leaga.
Na oo mai le afiafi, sa o mai Patty ma Keli, ma sa matou talanoa ma talie ma pepese. Sa sa’o lava lo’u tina. O se po sa lelei atoatoa. I le vaeluaga o le po sa la faafetai mai ia i matou, ma sa o ma le le fia o. Sa ou alu e moe ma se loto ua tumu i le faafetai. Sa ou iloaina ai, o meaalofa taua moni lava o le Kerisimasi e le faaitiitia pe a faasoa. Ae e atili ai ona suamalie ma faateleina pe a foai atu.