Autalavou
E Le Tuua Lava Toatasi
O tausaga e tolu ua mavae atu, sa ou maua ai le avanoa e tofotofoina ai. Sa ou iloa ai po o le a lava le mea o e tauivi ai, a i ai le Atua e te le tau faia lava na o oe.
Ina ua faatoa uma lo’u asofanau o lo’u 16 tausaga, sa ou iloa ai ua ou maua i se faama’i leaga o le pa’u. Sa faigata i taeao uma ona ou tiloilo atu i le faaata ma vaai ai i le pata faasoloatoa o lo’u tino. Sa ou lu’iina a’u lava ia avea o se avanoa e tofotofoina ai au. Nai lo lo’u faanoanoa mo a’u lava ia, sa ou taumafai e fai le mea sa aoaoina ai au e o’u taitai o Tamaitai Talavou: e faitau o’u faamanuiaga i aso taitasi e ui lava i o’u mafatiaga. E ui lava e le o mama atoatoa lo’u pa’u i le taimi nei, ae ou te faafetai i lo’u aiga ma uo ma a’u taleni faamusika. Ou te faafetai ua i ai o’u vae e lua, o lima e lua, o mata e vaai ai, ma taliga e faalogo ai. Ou te iloa o le aulelei moni lava e i totonu o le tagata lava ia, ae le o fafo.
Ae ua faasolo ina aafia ai ma o’u lagona i le ma’i o le pa’u. Ua ou le toe faauo atu e pei ona ou masani ai ua ou le toe matafiafia foi. Sa talitonu foi le tele o fomai sa vaaia au, o le a “lelei atoatoa” a o lei oo i le Kerisimasi. Ae e leai. Sa ou tatalo i aso uma mo le malosi e faatoilalo ai lo’u matamuli ona o le faama’i o le pa’u sa ou maua ai.
Sa fai mai pea lava tagata e aua ou te mafaufau i le tulaga faigata ua ou i ai, ae fai lava a’u e pei ona masani ai ma faafoliga e leai se mea o faaletonu i lo’u pa’u. Ae sa lei faigofie ona faia lena mea. E faamatala mai pea lava pea ma le agamalu e lo’u tina ia tala faatusi paia, ma le faamoemoe e faamafanafana ma faamalosiauina ai au.
Fai mai le Mataupu Faavae ma Feagaiga 24:8, “Onosai i puapuaga, ona o le a tele o le a oo mai ia te oe; ae ia e onosaia i latou, aua, faauta, ua Ou faatasi ma oe, e oo lava i le iuga o ou aso.” Ua aumaia e lenei mau ni upu ou te ola ai. Ua ou tusia i luga o a’u faailogatusi, o a’u api, ma totonu o lo’u potu. Ua avea nei ma se tasi o a’u mau ou te fiafia i ai e faamalosiauina ai au e faia le mea sili tusa lava po o a o’u tofotofoga.
O le onosaia o lenei tofotofoga sa faigata, ae o lea ua sili atu ona ou saunia mo tofotofoga i le lumanai. Ua saunia au e le Tama Faalelagi ina ia mafai ona ou taulimaina soo se luitau e oo mai. Ua ou iloa nei po o le a lava le mea o le a oo mai, o le a ou le faia lava na o a’u.
O Le Tamai Mamoe na Se, saunia e Del Parson