O Le Solosolo o le Kerisimasi
O tausaga uma lava a o o’u laitiiti, sa ou fesoasoani ai i lo’u tina e afifi meaalofa o le Kerisimasi a le matou aiga. Sa i ai ni o’u tei se toa 5 ua faaipoipo ma a latou fanau teine ma tama e toa 13, ma sa le o se galuega faigofie lenei. Ae e ui lava i le gasu felanulanua’i, ae sa ou matauina sa foliga mai o taimi uma lava ma te afifiina ai se solosolo mo lo’u tuafafine. E tusa lava pe na ave i ai e lo’u tina se ofumoe po o se palausi po o se mea mo le umukuka, ae sa i ai foi lava lena solosolo mo Ane. Sa ou malamalama o solosolo sa aoga ma e le taugata, ae sa amata ona ou mafaufau po o a ni manatu o lo’u tuafafine i le mauaina soo o lenei meaalofa.
I se tasi Tesema, sa iu ai ina ou faapea atu: “O se isi foi solosolo mo Ane? Tina, e foliga mai e te aveina lava mo ia se solosolo e toetoe lava o tausaga uma. Pe ua e mafaufauina ea atonu ua lava ana solosolo ua i ai i le taimi nei? E fia ni solosolo na te manaomia? Ma o se isi meaalofa o le a atili ai le taugata o le lafoina o le afifi a lona aiga. Ou te manatu e le tatau ona e faia lenei mea.”
Sa faataatia ese e tina lana seleulu. “Sei ou faamatala atu ia te oe se tala. Ma atonu o le a e malamalama ai. O lenei mea na tupu ae e te le’i fanau mai.
“E te iloa le auala na ou oo mai ai i le atunuu lenei.” (Sa ou iloaina. Sa faateia le aiga o lo’u tina ina ua faaipoipo o ia i se alii ua maliu lona toalua e i ai se fanau e toafa ae o le tete’i o lona uiga sa ia tuua Holani mo le Iunaite Setete.) “Peitai o nisi mea e te le iloa. Ina ua ma o mai iinei, sa leai se mea sa ia i maua. Sa faigata le olaga. Sa faigaluega lou tama i ni galuega se lua, ae sa laitiiti lava lona totogi. Sa ou faigaluega i le faiga o tagamea ma auli. Ae sa le’i lava a ni a tatou tupe.
“O le taimi lena sa 17 tausaga o Ane ma sa malamalama i le aofai o le tupe sa ma nofo aitalafu ai. Sa filifili loa o ia o le a fesoasoani mai. Sa alu o ia e faigaluega. Sa maua sana galuega i le taulaga i se faleoloa e faatau ai lole. Sa tatau ona alu o ia i le pasi ia oo atu iina ma tu ai i le fata fai faatau i le aso atoa. Sa ia tuuina mai ia i maua na toetoe lava o lona totogi uma, ae na taofia tau lava o le tupe mo lona pasese i le pasi ma faatau ai sana meaai i le aoauli, aua sa le mafai ona ia tuuina ni meaai i lalo o le fata faifaatau.
“E ta’u mai e Ane ia te a’u sa fiafia na i ai sana galuega ma mafai ona fesoasoani lona totogi ia i matou. Ae na te le’i tauina mai faapea sa popole o ia mo ona tuagane laiti. Na oo mai le Kerisimasi. Sa talanoa a latou uo fou Amerika e uiga i meataalo sa latou fai atu ia Tama o le Kerisimasi e aumai mo i latou. Ae faapefea pe afai e le’i aumaia e Tama o le Kerisimasi ni meaalofa i le tatou fale?
“O ni nai aso a o le’i oo i le Kerisimasi, sa tuu mai ai e Ane ia te a’u se tupe. Ae sa le o le aso lea e totogi ai. Sa ou fesili atu ia te ia po o fea na ia aumaia ai lenei tupe. Sa ia fai ai, sa ia sefeina e ala i le le ai i le aoauli. Sa le o se tupe tele, ae na ou iloaina o lona uiga sa le’i ai o ia i aoauli mo ni vaiaso se tele. Sa fai mai o ia e ave le tupe e faatau mai ai ni meaalofa o le Kerisimasi mo ona tuagane. Sa ia faatuatuaina a’u, le toalua fou o lona tama, e faatau le mea sa talafeagai.
“Sa ou faatauina mai ni mea laiti. Ae sa ou filifili e mafai ona ou faia se Kerisimasi mo le aiga atoa. O ni moli saina e ai, fasimoli urosa, vali, taavale meataalo laiti, totini mo lou tama. Ma sa ou faatauina mai mo Ane se solosolo. Sa lanutasi, ae sa tuai ona ou moe i le po i le su’iina i ai o ni mamanu ma teuteu faamanaia. Sa ou fiafia lava ona sa tuuina mai mo i matou e la’u tama teine fou se Kerisimasi. Sa ou manao foi ia ona maua se mea faapitoa mo le Kerisimasi.
“Na oo mai le Kerisimasi. Sa faateia i matou ina ua aumai e a matou uo i le lotu se laau Kerisimasi ma se atigipusa na tumu i meaalofa. Sa latou faamalie mai ona sa o ni mea faatauvaa na afifi i nusipepa, ae sa matagofie! Sa tele ni mea aoga ma ni meaai lelei e ai sa i ai. Ona sosoo lea ma se isi mea na faateia ai, o le mealilo a ma’ua ma Ane: Na sau le Tama o le Kerisimasi i le tatou fale! Sa matuai fiafia ou uso! E le’i umi ae fola solo i luga o le fola o lena potu malolo laitiiti, i le faataavaleina o taavale i luga ma lalo o nusipepa. Sa paepae solo nusipepa! Ma sa tatala e Ane lana meaalofa ma maua ai le soloslo. Sa tagi o ia. Sa ou tagi laitiiti foi.
“Sa fai le matou aiga o le Kerisimasi. Oka, sa i ai ni a matou meaai mananaia ua leva matou te le’i toe aai ai! Ona tapena lea ma faamama mea uma. Sa alu Ane e teu lona solosolo. Peitai na leai se mea. Sa matou sueina i mea uma. Ona ou mafaufau lea faapea, oi aue, ua togi e lou tama le nusipepa i le afi. Pe ua alu ai ma le solosolo i le afi? Ia atonu aua matou te le’i toe mauaina. Peitai sa le’i faitio Ane. O le mea ua tupu ua tupu. Fai mai o ia, sa fiafia ona sa fiafia ona tuagane.
“O le Kerisimasi na sosoo ai, sa ou aveina mo Ane se solosolo. Sa ou faamautinoa e le toe leiloa le solosolo lena. Ina ua faaipoipo o ia ma siitia ese atu, sa ou lafoina atu ia te ia se solosolo o le Kerisimasi. Ou te le aveina atu ia te ia se solosolo i le taimi lenei ona e faapea na te manaomiaina. Ou te avatu ia te ia se solosolo e ta’u atu ai ia te ia, o le a le galo ia te au le mea sa ia faia mo le matou uluai Kerisimasi faatasi.”
O ni nai tausaga mulimuli ane ina ua uma ona faamatala mai e lo’u tina ia te a’u lenei tala, sa mafai ona matou faamanatuina le Kerisimasi ma le matou aiga atoa. I le vavao, sa ou matauina ai le tatalaina e lo’u tuafafine o se solosolo. Sa ou vaaia le susulu o ona foliga a o ia aapa ane ma oomi le lima o lo matou tina. Sa ou malamalama. Sa le na o se solosolo. Sa o se faailoga faapitoa ia i laua o le manatuaina o le alofa, meaalofa, ma le ositaulaga. Ma, i lona ala faatauvaa, sa faamanatu mai ai ia te au le mafuaaga tatou te faamanatuina ai le Kerisimasi—ona o se meaalofa maoae ma le agalelei lea na faapea ona manaomia ai le ositaulaga.
Ata na tusia e Sam Lawlor