O Le Saogalemu ma le Filemu o le Tausia o Poloaiga
O mamanu ma upumoni o loo maua i le Tusi a Mamona e manino ma aoga, mama ma taua. A tatou amata i le amiotonu ma le usiusitai, o le a tatou faaiu i faamanuiaga ma le olioli.
I o tatou vaitaimi o faamatalaga faafuainumera, e foliga mai o se faataamiloga o talafou e 24-itula e le mafai ona laa loa e aunoa ma ni mataupu o se tala masani e faaalia pea lava pea. O tagata o fuafuaga ua uma le aoga sa masani ona mauaina tulaga lauiloa ma le iloga e ala i taleni tulaga ese i le avea ai ma ni tagata fai ata tifaga, tagata afeleti, tagata fai polokiki, po o taitai o pisinisi. O le tele o tausaga o faataitaiga po o auaunaga tuuto ma osigataulaga—e fesootai atu i tulaga maualuluga o o latou tulaga faamanuiaina i se faiva faapitoa po o se matata—e vave ona nutililiiina i le totonugalemu o le faalumaina.
O le vaaiga faaiu e masani lava o le faatusa faanoanoa lea o tagata e augani lotulotu i se faamasino, le au faisea, po o itumalo po o i aiga, uo, ma aumea mo se faamagaloga o a latou amioga faavalevalea. O le iuga e masani lava ona lafo atu ai se upega tele o taunuuga e le’i mafaufauina—e aofia ai le lototiga, maasiasi, ma le le fiafia—ia i latou, o e pele ia i latou, ma a latou paaga.
O upu mama ae o’oo’o o le perofeta anamua o le Tusi a Mamona o Alema i le apoapoaiga i lona atalii e foliga mai e talafeagai lava i le seneturi lona 21 aua sa sili atu ma le 2,000 tausaga ua mavae: “E le’i avea lava le amioleaga ma fiafia” (Alema 41:10).
I le toetoe lava o faalumaina uma i aso nei, o se malamalama i le ma le usiusitai i poloaiga o loo maua i le talalelei toefuataiina semanu ua lava lea e liliuese ai mala faaletagata lava ia ma faalegaluega.
O Se Fuafaatatau mo le Fiafia
O se fuafaatatau ua vaaia i le talalelei a Iesu Keriso ua faaalia mai ai le ala i le fiafia. O se upumoni mama ma taua o loo maua i le Tusi a Mamona atoa. O loo faamatalaina lelei mai lava i aoaoga a le perofeta o Liae i ona atalii ina ua lata ina maliu o ia. I lona tautala atu i lona atalii o Iakopo, sa ia aoao mai, “Ona e ao lava ina i ai se faafeagai o mea uma” (2 Nifae 2:11). Sa ia faaopoopo mai i nai fuaiupu mulimuli ane, “Ua i ai le tagata, ina ia latou maua le olioli” (2 Nifae 2:25).
O aoaoga a Liae i lenei lauga ia Iakopo e ono otootoina faafaigofie: O le usiusitai ma le amiotonu e taitai atu ai i faamanuiaga, lea e oo atu ai i le olioli. I le isi itu, o le le usiusitai ma le amioleaga e taitai atu ai i le faasalaga, lea e oo atu ai i le faanoanoa. O le Faaola o le Fautua sili lea o tagata ola uma ma o le lagolago o le auala i le fiafia ma le ola e faavavau. O le tiapolo o le tama faanoanoa o pepelo ma o le lagolago o le auala e tau atu i le faapologaina ma le oti.
E manino lava, e malamalama le fili o le a tatou le filifilia ma le iloa le faapologaina ma le oti, ae ona o le a faanoanoa pea o ia e faavavau, o lea e saili ai o ia ia faanoanoa tagata uma (tagai i le 2 Nifae 2:27). Na te faia lenei mea e ala i le mimiloina o taunuuga o le agasala ma le le usiusitai. O le tasi lena o mafuaaga ua ta’ua ai o ia o le tama o pepelo.
Na saunoa Peresitene Spencer W. Kimball (1895–1985): “O outou uma … ua iloa Satani, o le tama o pepelo. Ua outou iloa le ala na te liliuina ai le mea moni i se pepelo. Na te teuteuina mea faatiapolo ia foliga mai e matagofie, moomia, faigofie pe lelei foi.”1
E manao Satani ia tatou talitonu e faapea o le fuafaatatau o le fiafia e amata atu i le amioleaga ma le agasala. Ua lapataia i tatou o ana faaosoosoga e faalafiina ma le poto lea e i ai taimi e faafoliga mai ai o ia “ia foliga mai o se agelu o le malamalama” (2 Nifae 9:9). Ua faamalamalama mai e le Alii le toilalo ma sini a Satani:
“O le mea lea, ona sa fouvale Satani ia te au, ma saili e faaumatia le faitalia a le tagata, lea na tuu atu e Au, o le Alii le Atua ia te ia, ma le tasi foi, ia Ou avatu ia te ia lou lava mana; i le mana o lau Toatasi na Fanaua, na Ou faia ai ia lafoina o ia i lalo;
“Ma sa avea o ia ma Satani, ioe, o le tiapolo lava lea, o le tama o pepelo uma e faasese ma faatauaso tagata ma taitai faatagataotaua i latou i lona loto” (Mose 4:3–4).
O le ala i le fiafia e amata i le amiotonu e ala i le usiusitai i poloaiga. O poloaiga ua tuuina mai ia i tatou o se tusitaalo faalelagi e taitaiese ai i tatou mai le tele o malaia o le olaga nei. Sa folafola mai e le Alii lenei mea i le talutalufou o le Toefuataiga: “O le mea lea o Au o le Alii, ona ua Ou iloa le malaia o le a oo mai i luga o e o nonofo i le lalolagi, na Ou valaau atu ai i luga o la’u auauna o Iosefa Samita, Laitiiti, ma tautala atu ia te ia mai le lagi, ma tuu atu ia te ia poloaiga” (MF&F 1:17; ua faatusilima mea ua faamamafa).
Tausi Poloaiga
O nisi tagata latou te iloa ua le tusa ai ma le tulaga e masani ona i ai le i ai o poloaiga i le amataga o le ala i le fiafia nai lo se mea e tauaveina i le ala. O le tala lenei mai la’u auaunaga o se peresitene o le misiona i Nagoya, Iapani, i nai tausaga ua mavae e faamalamalamaina ai lenei mea.
Sa ma masani ma lo’u toalua o Lesa, i se tamaitai talavou i se taimi e le’i leva ona sau i le lotu e auai i se vasega faaPeretania sa aoaoina e faifeautalai. Sa faamasani gofie o ia, ma fiafia ma pulea lelei lona olaga, lea sa aofia ai se galuega lelei, sana uo tama ua leva ona la faamasani, ma lona aiga. O lana masaniga ma faifeautalai ma le au paia e ala i le vasega faaPeretania sa faaosofia ai lona fiafia i le Ekalesia, ma sa amata ona fai ana lesona a faifeautalai. Sa foliga mai sa totogoa’e lana molimau i le moni o le talalelei toefuataiina i taimi taitasi latou te feiloai ai ma faifeautalai. A o ia faitauina le Tusi a Mamona, ma mafaufau loloto ma tatalo e uiga i ai ma mea sa ia faalogoina, sa ia iloaina ua moni.
Ina ua amata ona aoaoina o ia e faifeautalai e uiga i poloaiga, sa ia iloaina e tatau ona ia usitai. Sa faauma le la faigauo ma lana uo tama ma faamavae i lana galuega, lea sa manaomia ai lona faigaluega i Aso Sa. Sa amata ona ia tausia le Upu o le Poto ma taliaina le tulafono o le sefuluai. Sa matuai malosi lona faatuatua o lea sa amata ai ona ia tausia poloaiga i le toetoe lava o le taimi na te aoao ai e uiga i ai.
Ina ua ia logoina lona aiga e uiga i lona fiafia i le Ekalesia ma lana suesuega i le talalelei toefuataiina, sa ta’u atu e ona matua o se taunuuga o lana filifiliga o le a afaina ai le latou mafutaga. I totonu o ni nai vaiaso o le taliaina o poloaiga, sa iu ina leai sana galuega, se potu mautotogi, po o se lagolago a lona aiga. O le mea moni lava, o taunuuga o lona usiusitai na aafia ai lona olaga i le mea sa foliga mai o se auala pagatia.
Sa matuai ou popole lava i lona tulaga. I se leva o se tasi po, i le faaiuga o se aso pisi, sa ma tuua ai ma Lesa le fale o le misiona mo se savalivaliga, i le sailia o sina taimi faatasi filemu. Sa ma tetei ina ua ma oo mai i se pupuvao i le fetaulaiga o ala i le taimi tonu foi lea na oo mai ai lenei tagata sailiili talavou malosi i lana uila. Sa ia faafeiloaia i maua i se ataata alofa ma se opo. O le ma tete’i i le leva o le po ae o loo fealuai lava o ia, sa ma fesili atu ai po o a ana mea sa fai.
“O lea ou te alu atu i la’u galuega fou ou te faigaluega i le sifi o le vaveao o se faatauoloa i se faleaiga o meaai faavavave,” sa ia faamatala mai ai ma le fiafia tele.
O lenei galuega ua fai ma faailoga o se pau tele o le totogi, matafaioi, ma itula mai lana galuega muamua. E ui lava i tofotofoga iloga ma mea faalavefau i mea faaletino o lona olaga, ae sa susulu mai ia te ia le fiafia. Ona ia ta’u mai lea ua uma ona seti le aso o lona papatisoga. A o ma toe savavali toe foi atu i le fale o le misiona, sa ma ofo ma Lesa i le tuuina o ia e lona faatuatua ma le usiusitai i poloaiga fou na faatoa ia mauaina i le ala i le fiafia moni.
O ni nai vaiaso mulimuli ane sa papatisoina ai o ia. Ina ua mavae sina taimi, sa toe faalelei o ia ma lona aiga ma toe maua se galuega lelei atu. O ni nai tausaga talu ona uma lona papatisoga, sa faamauina ai o ia i le Malumalu o Tokyo Iapani i se faifeautalai ua maea sana misiona sa la fetaui i se gaoioiga a le autalavou matutua nofofua. I le avea nei ma se aiga e faavavau, sa faamanuiaina lata mai nei i se pepe tama aulelei. O se viiga puupuu ma le manaia e faamatalaina ai le mea na tupu i lona olaga o se taunuuga o lona tausia o poloaiga:
Tausi poloaiga; tausi poloaiga!
O i ai le malu; ma le filemu.
E faamanuia mai; O lo tatou Matai.
O upu ia a le perofeta: E malutia ma filemu ai.
O loo i ai i i le saogalemu ma le toafilemu.2
O mamanu ma upumoni o loo maua i le Tusi a Mamona e manino ma aoga, mama ma taua. A tatou amata i le amiotonu ma le usiusitai, o le a tatou faaiu i faamanuiaga ma le olioli.
Tulafono
Usiusitai (amiotonu)
Faamanuiaga
Fiafia (olioli)
Le usiusitai (amioleaga)
Faasalaga
Le fiafia (faanoanoa)
Ata na tusia e Dilleen Marsh