1 Korinito 15: 20–22

I nei fuaiupu o loo folafola mai e le Aposetolo o Paulo e faapea o le Toetu o Keriso o lona uiga o le a toetutu tagata uma.

O Loo Soifua o Ia, na saunia e Simon Dewey

20 A o lenei ua toe faatuina mai Keriso i e ua oti, ua avea ma faapolopolo o e ua momoe.

21 Aua ua oo mai le oti talu le tagata, ua oo mai foi le toe tutu o e ua oti talu le tagata.

22 Aua faapei ona oti uma ia Atamu, e faapea foi ona faaolaina uma ia Keriso.

O Lenei Ua Toetu Mai Keriso mai le Oti

“E leai ni upu a atunuu Kerisiano e sili atu ona anoa ia te a’u nai lo na upu na fai atu ai le agelu ia Maria le Makatala ma le isi Maria a o fetagisi, ina ua la taunuu atu i le tuugamau e asi le tino o lo laua Alii: ‘Se a le mea tou te saili ai le ua soifua i e ua oti? E le o iinei o ia, a ua tu’ (Luka 24:5–6).

“Faatasi ai ma lenei folafolaga aloaia, o i latou o e sa ola ma ua maliliu, o e o loo ola nei ma o le a maliliu i se aso, ma i latou o e e lei fananau mai ma e lei maliliu ua faatoa laveaia lava.

“O se taunuuga o le manumalo o Keriso i le tuugamau, o le a tatou toe tutu uma ai. O le faaolataga lenei o le agaga.”

Peresitene Thomas S. Monson, “E Le o Iinei o Ia ae Ua Toetu,” Liahona, Ape. 2011, 4.

Faapolopolo o E Ua Momoe

Uluai fua—o fualaauaina mata, fualaau faisua, ma fatu e muamua pula i le seleselega.

I lalo o le tulafono a Mose, o uluaifua e ofoina o se taulaga paia i le Alii e faaali ai le agaga faafetai ma le tuuto. Talu ai o uluaifua o se faailo ua amatalia le seleselega ma e tele atu isi laau toto o le a maua mai, o loo faapea mai ai le Aposetolo o Paulo, o Iesu Keriso o le uluai tagata (“o e ua momoe”) ua toetu mai i e ua oti ma e toatele isi tagata o le a toetutu mai.

E Pei Ona Oti Uma ia Atamu

Ona sa pauu Atamu ma Eva, o lea e tatau i tagata ola uma ona oo i ai le oti faaletino (tagai i le 2 Nifae 9:6; Mose 6:48).

E Faapea Ona Faaolaina Uma Ia Keriso

“Ou te le iloa po o tatou faafetaia atoatoa le matua taua tele o lo tatou talitonuga i se toetu moni lava, mo le lalolagi. O le mautinoa o le tino ola pea o le faavae lea o lo tatou faatuatuaga. …

“I la tatou faigamalaga e faavavau, o le toetu o le pou faailo malosi lea e faailoga ai le iuga o le olaga lenei ma le amataga o le olaga a sau. … Ua tatou iloa foi, mai faaaliga i onaponei, a aunoa ma le toe faatasia o o tatou agaga ma o tatou tino i le toetu e le mafai ona tatou maua se ‘atoatoaga o le olioli’ (MF&F 93:33–34).”

Elder Dallin H. Oaks o le Korama a Aposetolo e Toasefululua, “Toetu,” Liahona, Iulai 2000, 17.