Mai le Misiona
Fafagaina O E Fiaaai
O mea laiti e mafai ai ona tatou faafetauia manaoga tetele—i le faaletino ma le faaleagaga.
Ata na tusia e Carolynn Vibbert
Ia Tesema o le 2004, sa ou auauna ai o se faifeautalai faamisiona i Lins, São Paulo, Pasila. Sa filifili le uarota ma le paranesi i le lotoifale e auai i le polokalama faaletausaga a Pasila o le “Natal sem Fome” (Kerisimasi e aunoa ma se Fiaai). O le aufaatasi ai ma isi tagata—e aofia ai fitafita mai le vaegaau a Pasila, ave meli, ma tagata o isi ekalesia—sa matou uia ai nisi o pitonuu i le aoina o meaai ia o le a tuuina atu i se taimi mulimuli ane i tagata matitiva o le aai. Sa matou faaaogaina foi lenei mea o se avanoa lelei lea e tufa atu ai kata e pasi solo, po o “kata mo faauooga” e pei ona matou ta’ua ai. E tusa ma le 2,000 na tufatufaina ai.
E toatele le au paia na faailoa mai ni lagona lelei sa latou lagonaina a o latou auauna atu ma fetufaai i le agaga o le Kerisimasi i lalo o le la vevela o Pasila. O se vaaiga faagaeetia le vaaia o fitafita o tufaina atu nei kata e pasi solo mai se ekalesia latou te le auai.
E tasi le vaiaso mulimuli ane, ae ma maua ni talosaga se 127 mo le DVD o le Kerisimasi Joy to the World lea e faaalia ai le Aufaipese a le Tapeneko Mamona. O le vaiaso sa sosoo ai e 22 isi talosaga na maua mai. Sa amata ona ma aoaoina ma la’u soa ia nei tagata ma sa mafai ona ma ulu atu i le tele o maota ona o se taunuuga o lenei galuega faatino.
O le a le galo ia te a’u le olioli ma le alofa o lena galuega faatino faapitoa, ina ua ma fesoasoani e faasalalau atu le talalelei ma aumai le mapusaga i le tele o le fiaaai o aiga. Sa tuuitiitia uma le fiaaai faaleagaga ma le faaletino.
Ou te iloa e ala atu i mea laiti ma faatauvaa (e pei o kata e pasi solo) na oo mai ai le tele o mea maoae ma le matagofie (e pei o le faaolataga o agaga o tagata). O lenei aafiaga sa o se molimau e faapea e tele avanoa e siomia ai i tatou i le vaitau o le Kerisimasi ma isi vaitau ina ia faataunuuina ai lenei galuega maoae ma le ofoofogia.