Savali a Faiaoga Asiasi
Faiaoga Asiasi, o se Galuega o le Faaolataga
Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.
Faatuatua, Aiga, Toomaga
O faiaoga asiasi e maua ai e tamaitai le avanoa e vaavaai ai, faamalolosia, ma aoao e le tasi le isi—o se galuega moni lava o le faaolataga. O faiaoga asiasi, e auauna atu ai tamaitai e fai ma sui o le Faaola e fesoasoani e sauniuni tamaitai mo faamanuiaga o le ola e faavavau.
“E tatau ona tatou ‘lapatai atu, faamalamalama atu, apoapoai atu, ma aoao atu, ma valaaulia [isi] e o mai ia Keriso’ (MF&F 20:59), e pei ona fetalai mai le Alii i ana faaaliga,” o le saunoaga lea a Peresitene Spencer W. Kimball (1895–1985). E le gata i lea, na ia saunoa mai, “O lau molimau o se auala maoae lea e avatu ai le savali.”1
O i tatou o faiaoga asiasi, a oo ina faateleina lo tatou iloa i upumoni o le talalelei, e faamalolosia ma lagolagoina e a tatou molimau ia tuafafine o loo sauniuni e papatiso ma faamauina. Tatou te fesoasoani i tagata fou o le ekalesia ia taula i le talalelei. E fesoasoani a tatou asiasiga ma le alofa “e toe aumaia ai i latou ua se [ma] faamafanafanaina ai loto o i latou ua maalilili i le talalelei.”2 Tatou te faamalosiauina foi tuafafine e o mai ia Keriso e ala i le ō i le malumalu.
“O le a outou laveaiina agaga,” na saunoa ai Peresitene i faiaoga asiasi, “ae o ai na te iloa pe o lena toatele o tagata lelei ua malolosi i le Lotu i le taimi nei, ua ala ona toaaga mai ona sa outou i ai i o latou fale ma avatu ia i latou se malamalamaaga fou, ma se vaaiga fou. Sa outou faailoa atu ia i latou mea sa latou le iloa. Ua outou faalauteleina la latou vaai. …
“Tou te iloa, ua le gata ina outou faaolaina nei tuafafine, ae atonu ua faapena foi a latou tane ma o latou aiga.”3
Mai Tusitusiga Paia
Mai lo Tatou Talafaasolopito
Ina ua faatulagaina e le Perofeta o Iosefa Samita le Aualofa, sa saunoa o ia, o tamaitai sa le gata ina latou tausia e matitiva ae ia laveai foi agaga. Na ia aoao mai foi e taua tele matafaioi a tamaitai o le Ekalesia i le fuafuaga a le Tama Faalelagi mo le faaolataga.4 I le taialaina ai e mataupu faavae na aoao mai e le Perofeta o Iosefa Samita, e mafai e i tatou o uso o le Aualofa ona galulue faatasi e saunia tamaitai ma o latou aiga mo faamanuiaga silisili a le Atua.
“Ia tatou agaalofa le tasi i le isi,” na saunoa ai Peresitene Polika Iaga (1801–77), “ma tuu atu [ia i latou o e] malolosi ia tausia faalelei ē ua vaivai ina ia malolosi, ma tuu atu ia i latou o ē mafai ona vaai e taiala ē o tauaso, seia oo ina mafai ona iloa e i latou lava le ala.”5
Ata na tusia e Robert Casey