2012
Na Toefuataiina mai le Talalelei a Iesu Keriso e ala i le Perofeta o Iosefa Samita
Tesema 2012

O Le Mea Tatou Te Talitonu I Ai

Na Toefuataiina mai le Talalelei a Iesu Keriso e ala i le Perofeta o Iosefa Samita

Ina ua mavae le Faasatauroga o le Faaola ma maliliu foi Ana Aposetolo, sa suia e tagata nisi o aoaoga faavae ma sauniga o le talalelei. E ui ina toatele tagata lelei sa talitonu ia Iesu Keriso ma taumafai ia malamalama ma aoao atu Lana talalelei, ae sa le i toe i ai le atoaga o le talalelei. O le mea na oo i ai, na eseese tulaga o le liliuese na i ai Kerisiano na soifua. E ui sa tele a latou upumoni sa i ai, ae sa leai se tasi o i latou na i ai le atoaga o aoaoga faavae a Keriso, sauniga, po o le perisitua.

Na silafia e lo tatou Tama Faalelagi o le a tulai mai le leiloa malie atu o upumoni, o lea na ia faasaoina ai le atoaga o le talalelei a Iesu Keriso i se tusi anamua o tusitusiga paia e faatusa i le Tusi Paia. I le popofou o le 1800, sa faasino ai e se avefeau mai le lagi e igoa ia Moronae ia Iosefa Samita i le mea na natia ai lenei tusitusiga paia mo le tele o seneturi. Na tusia i luga o papatusi auro, ma o lenei faamaumauga sa i ai tusiga a perofeta na faamatala mai ai fegalegaleaiga a le Atua ma nisi o tagata na nonofo i Amerika anamua. Sa faaliliuina e le Perofeta o Iosefa Samita ia tusiga sa i luga o nei papatusi, i le meaalofa ma le mana o le Atua. O lenei faamaumauga o le Tusi a Mamona: O Se Tasi Molimau ia Keriso.

O le faagasologa o le faaliliuina o le Tusi a Mamona na maua ai e Iosefa Samita se aoaoina i aoaoga faavae a le Atua—o le Agaga o lona faiaoga, ma o le Tusi a Mamona o lana tusia’oga lea. A i ai se fesili a Iosefa Samita, sa alu atu o ia i le Atua i le tatalo ona faailoa mai lea e le Atua le tali ia te ia. O lea faagasologa na aoaoina ai Iosefa Samita, o se taulealea e le’i aotauina, ia upumoni taua ia na tatau ai mo lona valaauga o le Perofeta o le Toefuataiga.

Ua Molimau Mai le Perofeta o Iosefa Samita

  1. “Na ou vaai moni lava i se malamalama, ma i totonu o lena malamalama na ou vaaia ai ni Tagata se toalua, ma sa la fetalai moni mai lava ia te au; ma e ui ina sa inosia ma sauaina a’u i lo’u fai atu sa ou vaai i se faaaliga vaaia, ae ua moni lava; … Sa ou mautinoa lena mea, ma sa ou mautinoa sa silafia e le Atua lena mea, ma e le mafai ona ou faafitia lena mea, pe ou te fiatoa e fai.”1

  2. “E ala i le mana o le Atua na ou faaliliuina ai le Tusi a Mamona mai tusitusiga o ata anamua, lea e lei malamalama ai le lalolagi, ae na ou tu ai na o au i lenei tulaga matagofie, o au o se talavou e le’i aoga, e faaaogaina se faaaliga fou, ou te faafetaia’ia ai le poto faalelalolagi ma le valea ua faateleina o le seneturi e sefuluvalu.”2

  3. “Na ou tauina atu i le usoga e faapea o le Tusi a Mamona o se tusi silisili ona sa’o i tusi uma lava o i le lalolagi, ma o le maa autu o la tatou ekalesia, ma e sili atu ona latalata le tagata i le Atua e ala i le usitaia o ona mataupu, nai lo se isi lava tusi.”3

  4. “Ou te … umiaina ki o le malo faaiu, lea o loo i ai le augatupulaga o le atoaga o mea uma na taua e fofoga o Perofeta paia uma talu le amataga o le lalolagi, e tusa ai ma le mana o faamauga o le Perisitua Mekisateko.”4 (Tagai i le MF&F 27:12–13.)

  5. “O Le Ekalesia a Iesu Keriso o le Au Paia o Aso e Gata Ai, sa faatuina i luga o faaaliga tuusao, e pei lava ona i ai le Ekalesia moni a le Atua, … ma e auala mai i le finagalo ma faamanuiaga a le Atua, ua avea ai au ma mea faigaluega i Ona aao, e oo mai i lenei taimi, ina ia faaalualu i luma le galuega a Siona.”5

  6. “[O lenei tusi … ua tau maia ia i tatou na faatino e le Faaola Lona faailoa atu i lenei konetineta [i Amerika] ina ua mavae Lona toetu; na Ia totoina ai le Talalelei iinei i lona atoatoa, ma le tamaoaiga, ma le mana, ma faamanuiaga.”6

Faamatalaga

  1. Iosefa Samita—Talafaasolopito 1:25

  2. Aoaoga a Peresitene o le Ekalesia: Iosefa Samita (2007), 64.

  3. Aoaoga: Iosefa Samita, 68.

  4. Aoaoga: Iosefa Samita, 544.

  5. Aoaoga: Iosefa Samita, 207.

  6. Aoaoga: Iosefa Samita, 64.

E ui ina tatou talitonu o Iosefa Samita o se perofeta a le Atua, ae tatou te tapuai i lo tatou Tama Faalelagi ma Lona Alo, o Iesu Keriso.

Mai le tauagavale: Viia Le na Fetaia’i ma Ieova, saunia e Jon McNaughton; Uluai Faaaliga Vaaia a Iosefa Samita, saunia e Greg Olsen, e le mafai ona kopiina; Iosefa Samita o Loo Faaliliuina le Tusi a Mamona, saunia e Del Parson © 1996; Perofeta a le Alii, saunia e David Lindsley, e le mafai ona kopiina; faamatalaga mai le O Le Toefuataiga Mai o le Perisitua Mekisateko, saunia e Liz Lemon Swindle, e le mafai ona kopiina; Ua Faatulagaina le Ekalesia a Iesu Keriso, 1830, saunia e Joseph Brickey, e le mafai ona kopiina; Faauta i O Outou Tamaiti, saunia e David Lindsley © 1983