O Perofeta i le Taimi o le Kerisimasi
O soifuaga o o tatou perofeta e 16 o aso e gata ai, e faaalia ai le agaga o le Kerisimasi, ma faamanatu mai ai ia i tatou lena mea e le mafaatusalia na tupu i le falemanu i Peteleema i le silia ma le 20 seneturi talu ai: o le soifua mai o lo tatou Faaola, o Iesu Keriso. E le mafai lava ona tatou sese pe a mulimuli i a latou faataitaiga—aemaise lava i le Kerisimasi.
Meaalofa o le Alofa
O le foai atu o meaalofa o le alofa ma le auaunaga ia i latou e le tagolima, o se uiga tulagaese lea o aafiaga a perofeta i le Kerisimasi. I le 1931, i le taimi o le Pau Tele o le Tamaoaiga, sa avea Peresitene Harold B. Lee ma peresitene o se siteki tele i le Aai o Sate Leki, Iuta. Sa naunau Peresitene Lee ia iloa manaoga o tagata o lana siteki ma faia mea uma na te mafaia e faamama avega ai i o latou manaoga. O se sailiiliga sa faia na ia iloa ai e silia ma le afa o lana siteki e toeitiiti atoa le 5,000 tagata, sa faalagolago i isi mo se fesoasoani, e aofia ai le toeitiiti atoa le 1,000 o tamaiti e i lalo ifo o le taʼi 10 tausaga le matutua. Sa ia auina atu tagata o le au paia e ao mai meataalo ma faatulaga ia vaega e lipea, vali, ma fufulu mama meataalo tuai pe faia foi ni meataalo fou ina ia leai se tamaitiiti e leai se meaalofa i le Kerisimasi. Sa tonu ia te ia, e tatau i aiga uma o le siteki ona faia se toonai mo le Kerisimasi ma talosagaina ia foa’i o meaai ina ia mafai ai ona fai lena mea.1 I se taimi mulimuli ane ina ua avea o se Aposetolo, sa talosagaina ai Elder Lee e faatulaga le polokalama uelefea a le Ekalesia, e faavae i mataupu faavae faapena o le auaunaga, ositaulaga, ma le galue.
A o talavou, sa faamanatu ai e Peresitene Thomas S. Monson le Kerisimasi ina ua fai atu e lana uo se fesili na te’i ai, “Pe faape’ī se tofo o le pīpī?” Sa ia tali atu e pei lava o le tofo o le moa, ae o iina na ia iloa ai e le’i tofo lava foi si ana uo i se moa. E le gata i lea, ae sa leai se mea i le fale o lana uo e saunia ai se toonai o le Kerisimasi. “Sa ou mafaufau loloto i se tali,” le tala a Peresitene Monson. “E leai ni a’u pīpī, leai ni a’u moa, leai sa’u tupe. Ona ou manatua ai lea sa i ai ni a’u fagafao lapiti se lua. Na ou tago atu loa lava uu le lima o la’u uo ma faatopetope atu loa i le pa o lapiti, tuu lapiti i se atigipusa, ma tuu atu ia te ia ma fai atu i ai, ‘Ia, ave lapiti ia e lua. E lelei i le ‘ai—e pei lava o le moa.’ … Sa vave ona maligi ifo o’u loimata a o ou tapunia le faitotoa o le pa ua gaogao o lapiti. Ae ou te lei faanoanoa. Sa faatumulia lo’u loto i se lagona o le mafanafana e le mafaamatalaina, o le fiafia. O se Kerisimasi e manatua pea.”2
Tutu Faatasi o se Aiga
O se tasi o Kerisimasi aupito matagofie e manatua e Peresitene Ezra Taft Benson, na tupu i le 1923, ina ua ia toe foi i le Po o le Kerisimasi i le faatoaga a lo latou aiga i Whitney, Idaho, ISA, ina ua mavae le lua ma le afa tausaga na faamisiona ai i Egelani. O le toetuufaatasiga fiafia ma ona matua ma uso ma tuafafine e toa 10 sa faatumulia i le naunautai ma le sagisagi fiafia mo le Kerisimasi. E avea o se mea faapitoa, na faatagaina ai o ia e ona matua e ala e fesoasoani i tapenapenaga o le Kerisimasi ina ua momoe uma isi tamaiti. A o galue ai o ia faatasi ma ona matua, sa ia faamatalaina lemu i ona matua ona aafiaga o se faifeautalai. Sa le mafai ona taofi ona loimata i lenei “afiafi faapitoa” i lona aiga na ola ae ai o se tamaitiiti.3
O soifuaga o perofeta e uunaia ai i tatou e latalata atili i o tatou aiga i taimi o le Kerisimasi. Na manatua e Peresitene Iosefa F. Samita se tasi Kerisimasi a o avea o se tamā talavou, e leai sana tupe—e oo lava i se pene—e faatau ai ni meaalofa mo lana fanau. Ae o le a oo lava i le Kerisimasi, sa ia tuua ai lona fale ae savalivali atu i le aualatele, ma autilotilo i mea mananaia i faamalama o faleoloa ae sa iloa e le mafai ona ia faatauina se mea. I le toeitiiti a leai se faamoemoe, na ia maua ai se pausisi ma “tagi ai pei o se tamaitiiti” e faamafanafana ai i lona loto tiga. Peitai, sa ia soloi ona mata, ma alu i le fale ma taaalo ai ma lana fanau i le aso atoa, “ma le lotofaafetai ma le fiafia mo na o i latou.”4 E ui i lona le mafai ona tuuina atu ni meaalofa o le Kerisimasi mo lana fanau, ae na ia tuuina atu ia i latou ni meaalofa aupito silisili sa mafai e soo se tamā ona tuuina atu—o lona alofa ma lona taimi.
Na faaalu e le Perofeta o Iosefa Samita le Kerisimasi o le 1838 i le falepuipui i Liperate i Misuri. Sa taofia o ia ma nisi o ana paaga i se sela pogisa i le pito i lalo malulu, palapala, ma asu mai le afi tafu sa faamalosia i latou e faaaoga. Sa maualalo tele le taualuga ma sa le mafai ai ona latou tutu sa’o i luga. Ae sa i ai se taimi fiafia i lena vaitau o le Kerisimasi. Sa mafai ona asiasi atu i ai le faletua o le Perofeta, o Ema mo sina taimi mo ni nai aso a’o loma le Kerisimasi. E le gata i lena, ae na ia aumaia le la tama tama, o Iosefa Samita III. O le lagonaina o le alofa mo lona aiga, na tusia ai e Iosefa upu faamalosiau mai le sela i le Au Paia: “Matou te olioli i o matou puapuaga, aua ua matou iloa o loo mafuta mai le Atua ma i matou.”5
I le 1937, na taufetuunai ai Peresitene Filitia Samita i le olaga e aunoa ma lona faletua pele o Eteli, e lei leva na maliu. Na talosaga Eteli, ia pese ia Jessie Evans, o se tamaitai nofofua e matagofie lona leo pese, i lona falelauasiga. O lena feiloaiga, na masani ai Jessie Evans ma Iosefa Filitia Samita, ma i’u ai ina fuga mai lena mafutaga i le alofa. Sa ia taliaina le faamalamalamaga la te faaipoipo a o le’i leva ona mavae le Kerisimasi. Ina ua mafaufau Peresitene Samita i meaalofa na ia mauaina i le Kerisimasi o le 1937, na ia tusia ai, “Sa ou mauaina [Jessie] o se meaalofa o le Kerisimasi, ma o lea ou te matua faafetai ai.”6 Na faaipoipoina i la’ua ia Aperila na sosoo ai.
O se tasi o agaifanua masani faaletausaga a le aiga o Peresitene Tavita O. MaKei, o le aveina lea o fanau a fanau e faatietie i taavale faaseʼe i le kiona e tosoina e ni solofanua, e i ai “logo tagitagi.” O lea tietiega o se tasi o a latou agaifanua masani e fiafia i ai. Sa faia pea e Peresitene MaKei seia oo i lona 80 tausaga. Ina ia mafanafana, e fai e Peresitene MaKei lona ofutalaloa umī, mafiafia ma ona totigilima lapopoa. E tietie tamaiti laiti i le taavale faaseʼe, ae o tamaiti matutua e mulimuli atu i a latou lava faaseʼe” e nonoa i tua o le taavale faaseʼe. O nei faamanatuga o le Kerisimasi e umi ona manatua, ma o nisi taimi e faaiu ai i pesepesega a o faataaliolio i le piano ma usu le “A i ai i le Aiga le Alofa.”7
O Le Molimau ia Iesu Keriso
Atonu o le mea e aupito sili ona taua, o aafiaga i le Kerisimasi a perofeta ua aoao mai ai i tatou ia faateleina a tatou molimau ia Iesu Keriso, a o tatou tuuina o Ia i le totonugalemu o a tatou faafiafiaga. I le 1876, ina ua lata ina maea le Malumalu o St. George Utah. Sa faatulaga le sauniga o le faapaiaga mo le fogafale i lalo, potu autu, ma le potu mo faamauga mo le aso 1 Ianuari, 1877.8 I le toe fitu aso oo i le Kerisimasi a o lei faia le faapaiaga, e toatele tagata i St. George sa galulue punouai e fesoasoani ina ia mautinoa ua maeʼa le malumalu.
Na tusia e Peresitene Uilifoti Uitilafi, o lē sa avea ma uluai peresitene o le malumalu, i lana api o talaaga e faapea, i le aso Kerisimasi, sa pisi tamaloloa e galulue i masini ma ‘ili ae sa faaalu e fafine e 40 le aso atoa i le malumalu e suʼi kapeta. Sa latou folaina kapeta ma tautau ie pupuni.9
E ui ina toetoe a le uma le galuega i le taimi na atofaina, ae o la latou taulaga i le vaitau o le Kerisimasi na matua aoga lava. O lena galuega o la latou faamanatuga lea o le Kerisimasi. Faatasi ai ma tagata e 2,000 na i ai i le aso 1 Ianuari, na tuuina atu ai e Peresitene Uilifoti Uitilafi le tatalo o le faapaiaga mo vaega o le malumalu—ua silia ma le 30 tausaga talu ona faamalosia le Au Paia o Aso e Gata Ai e lafoai le Malumalu o Navu.
I le taimi o le Taua Lona Lua a le Lalolagi, e tele aai o le Iunaite Setete na faamalosi ona tapē moli i le po ina ia faasaoina ai le suauu. I le Aai o Sate Leki, sa tapē moli e tatau ona mu faasoloatoa o le Malumalu o Sate Leki. Ina ua manu i Europa ua mae’a le taua, sa faatonuina loa e Peresitene Heber J. Grant ia moli mu faasoloatoa o le malumalu ina toe ki.
O le Kerisimasi i le 1945, na fuafua ai e Peresitene Siaosi Alapati Samita se kata musuia ma le anoa o le Kerisimasi. I le pito i luma sa i ai se ata o tumutumu e tolu i le itu i sasae o le Malumalu o Sate Leki, ua manaia le susulu i luma mai o le agelu o le faatusa o Moronae i luga aʼe. O lalo ifo sa tusia ai upu “Kerisimasi—1945” ma le savali “Ua toe ola moli.”10 E leai se mea sili e mafai ona atagia lelei ai le olioli na lagonaina e tagata uma talu mai tausaga uumi o le oti ma le faatafunaga.
Ae o lenei foi kata matagofie o le Kerisimasi o se ala foi lea a Peresitene Samita na tuuina atu ia lana molimau ia Iesu Keriso ma le Toefuataiga o le talalelei. Pei lava ina aumaia e le faaiuga o le taua o le fiafia ma le malamalama i nofoaga pogisa, ae na faapena foi e le Toefuataiga o le talalelei ina ua mavae seneturi uumi o le Liliuese ona “toe ki” moli malamalama o le upumoni mo tagata uma i le lalolagi.
O faataitaiga a o tatou perofeta o aso e gata ai o le alofa, auaunaga, faatuatua, ma le ositaulaga ua molimau mai ai o le olioli moni i le vaitau o le Kerisimasi, e maua i le ola ai e faapei ona soifua Keriso. E pei ona saunoa Peresitene Howard W. Hunter, “O le Kerisimasi moni lava e oo mai i lē na te aveina Keriso i lona olaga e fai ma malosiaga ola, maoae, ma le malosi. O le agaga moni o le Kerisimasi o loo i ai lea i le soifuaga ma le misiona a le Matai.”11
Ata na tusia e Welden C. Andersen