Punaoa Fou e Aoao Ai mo le Autalavou

Fesili ma Tali

Aisea ua sui ai?

O lenei metotia fou faaleaoaoga o le a fesoasoani i talavou ina ia lava saunia e talatalanoa ai e uiga i le talalelei ma a latou uo, saunia ai mo auaunaga faafaifeautalai ma faaleaiga i le taimi nei faapea ma le lumanai, ma faalautele a latou molimau i le talalelei. O le a tupu lenei mea pe a latou galulue ma le punouai e suesue i tusitusiga paia, fefaasoaai o latou manatu, ma talia ni valaauga e faaaoga ai mea sa latou aoaoina i fafo atu o le vasega. O le a latou aoaoina i totonu o le vasega ni aoaoga o i ai nei a perofeta soifua.

O a vasega o le a faaaogaina ia lesona fou?

O korama a le Perisitua Arona, vasega a Tamaitai Talavou, ma vasega o le Aoga Sa mo talavou e i le vaitausaga o le 12 e oo i le 18 o le a faaaogaina ia lesona i aoaoga i Aso Sa. O le a taulai atu i masina taitasi ia korama, vasega a Tamaitai Talavou, ma vasega o le Aoga Sa i le aoaoina o le aoaoga faavae lava e tasi, e pei o le Aiga Atua, ma le fefaamalosiau o le tasi i le isi i le ola ai ma aoao atu.

O le a faapei ia lesona o le Aso Sa?

O le a taulai atu ia lesona i se autu faapitoa i masina taitasi, e faatatau i fesili a le autalavou e uiga i le talalelei. O autu taitasi—e 12 le aofai—e tofu ma ni otootoga eseese e mafai e faiaoga ona filifili mai ai. E mafai ona faaaluina se taimi e sili atu ma le vaiaso i se otootoga pe a manaomia. O le a aoaoina ma faataitaia e le autalavou pe faapei le aoao atu o le talalelei pe a latou faasoa atu ni aafiaga ma ni manatu e uiga i autu faalemasina o le talalelei.

O a ni mea o i ai i otootoga e aoaoina?

O nei otootoga e le o ta’u tonu atua ni mea po o ni auala e aoao atu ai. Nai lo lena, o le a fesoasoani i faiaoga ina ia muai aoaoina i latou lava i aoaoga faavae, ona tuuina atu lea o ni aafiaga faaleaoaoga mo le autalavou. E mafai e faiaoga ona fetuunai ia aafiaga faaleaoaoga e tusa ai ma mea e manaomia e tamaiti aoga. E tofu le otootoga ma ni punaoa e faasino i ai ma ni sootaga, lea o le a faafou i taimi uma, e tusa ai ma aoaoga lata mai a taitai o le Ekalesia.

O fea e maua ai e se tagata ia lesona fou a le autalavou?

O loo maua ia otootoga e aoaoina (ma nisi e ese mai ai mo le au Perisitua Arona, Tamaitai Talavou, ma le Aoga Sa) i luga o le initoneti i le lds.org/youth/learn. O le a maua ni kopi ua lolomiina mo i latou e le maua se Initoneti.

Pe e aafia le Mutuale i lenei aoaoga fou i Aso Sa?

Ua uunaia ia au peresitene o vasega ma korama e mafaufau i autu faalemasina ao fuafuaina ia gaoioiga a le Mutuale. E mafai ona faaaoga ni manatu mo gaoioiga mai otootoga e aoaoina e avea o se mea amata mo lena fuafuaga. Ina ia maimoa i otootoga, alu i le lds.org/youth/learn.

O a gagana o le a maua ai ia lesona?

O le a maua ia lesona i le gagana Saina (Kenitonisia ma Meniterini), Tenimaka, Take, Peretania, Fiti, Finelani, Farani, Siamani, Hanikeri, Initonesia, Italia, Iapani, Korea, Monokolia, Nouei, Potukale, Samoa, Suetena, Taialani, Toga, ma Iurukuei. O iunite e le o faaaoga ai ia gagana nei o le a faaauau pea ona aoao atu mai tusi lesona ia na faaaogaina i le taimi ua mavae.