I Tala Fou

O Le Uluai Siteki na Faavaeina i Cape Verde

I le Aso Sa, 29 Aperila, 2012, na faatulagaina ai e Elder Erich W. Kopischke, a o avea ma Peresitene Eria o le-Eria a Europa, le uluai siteki i Cape Verde (o loo lauiloa foi o Cabo Verde) i le taulaga o Praia, ma e silia ma le 1,000 le Au Paia na auai.

Na tofia ma vaetofia e pulefaamalumalu i le Siteki fou o Praia Cape Verde ia Rosiveltt Teixeira, peresitene, ma Adilson Monteiro o le fesoasoani muamua ma José Pires e avea ma fesoasoani lua.

O Le Toe Faapaiaina o le Falesa i Lonetona ua Avatu ai le Talalelei i le Toatele

Sa toe faafou ma toe faapaia le Falesa iloga o le Ekalesia i Hyde Park i Lonetona, Egelani, e fai ma falesa mo sauniga tapuai, ma fai foi ma nofoaga autu mo tagata asiasi atu, a o lei amataina Olimipeka o le 2012, i le aso 1 Iulai, 2012.

Na toe faapaiaina le maota e Elder Erich W. Kopischke o le Fitugafulu, a o avea o ia ma Peresitene o le Eria a Europa. “O lo’u faamoemoe, ia fiaselau afe ni tagata i le gasologa o tausaga o le a o mai i lenei fale e aoao ai e uiga i le talalelei a Iesu Keriso,” na ia saunoa ai.

Ua Faamanatuina e Niu Kaletonia le Faatupulaia o le Ekalesia

I le aso 27 o Me, 2012, na faatulagaina ai e Elder James J. Hamula o le Fitugafulu, Peresitene o le Eria a le Pasefika, le uluai siteki i Niu Kaletonia, a o maimoaina e le 800 tagata o le Ekalesia.

“O le a faamanuiaina le Au Paia o Aso e Gata Ai ma Niu Kaletonia atoa, a o aoaoina atu le talalelei a Iesu Keriso ma talia e le tele o tagata,” na saunoa ai Elder Hamula.

O le siteki fou, Siteki a Noumea Niu Kaletonia, e aofia ai tagata lotu e 2,000 ma faletapuai e valu.

“O la tatou misiona aupito taua o le folafola atu lea o le talalelei ma ona mataupu faavae uma i tagata o Niu Kaletonia, lea o le a aumaia ai le fiafia mo i latou, mo o latou aiga, ma o latou siosiomaga e faigaluega ai ma nuu,” na saunoa ai ia Georgie Guidi, lea na valaauina e avea ma peresitene muamua o le siteki. Na valaauina Marc Mocellin ma Thierry Gorodey e avea ma ona fesoasoani.

O Le Uluai Faletapuai o le AAG i Itiopia

Ua vaai nei tagata o le ekalesia i Itiopia i o latou faamanuiaga e maua mai i lo latou uluai faletapuai. E tu i le alatanu i le va o aai o Addis Ababa ma Adama, o le fale e tolu ona fogafale, ma e aofia ai se fale e paka ai taavale i le manava o le eleele.

Ae o le mea e sili ona taua nai lo le itu i la le tino, o le avea lea o se faatusa o le faatuatua i tagata o le paranesi, sa lolotu i fale o aiga e le mamao mai le fale fou.

Fai mai peresitene o le Paranesi a Debre Zeit o Efrem Aemero Mekonen, “O taimi uma lava ou te pasia ai le fale fou, e faamanatu mai ai lava ia te au a tatou feagaiga. E faapei ona siitia e le Taitaiau o Moronae le tagavai o le saolotoga, ua faapena foi ona faamalosia a’u.”

O sui auai o le au peresitene o le Siteki a Praia Cape Verde o (tauagavale i le taumatau): Adilson Monteiro, fesoasoani muamua; Rosiveltt Teixeira, peresitene; ma José Pires, fesoasoani lua.

Ata na pueina e Elder José A. Teixeira